ប្រទេសនេប៉ាល់៖ អាជ្ញាធរនេប៉ាល់បានប្រកាសថា សាកសពមនុស្ស ៥នាក់ ដែលគេជឿថាជាអ្នកឡើងភ្នំបាត់ខ្លួនដោយសារគ្រោះព្រិលបាក់សង្កត់លើនៅលើភ្នំហិមាល័យ ត្រូវបានរកឃើញ ក្រោយបាត់ខ្លួនអស់រយៈពេលជិត ៩ខែ។ នេះបើយោងតាមការចុះផ្សាយរបស់សារព័ត៌មាន ស៊ីនហួ នៅថ្ងៃទី៧ ខែសីហានេះ។
សាកសពទាំងនោះត្រូវបានប្រជាពលរដ្ឋប្រទះឃើញនៅជំរំមូលដ្ឋាននៃភ្នំកម្ពស់ ៥.៦៣០ម៉ែត្រ ស្ថិតក្នុងខេត្តដូឡាខា បន្ទាប់ពីព្រិលរលាយ និងប្រទះឃើញសាកសព។
អ្នកនាំពាក្យនគរបាលខេត្តដូឡាខា បានឱ្យដឹងថា សាកសពទាំងនេះត្រូវបានសង្ស័យថា ជាក្រុមអ្នកឡើងភ្នំដែលបានបាត់ខ្លួនក្នុងហេតុការណ៍ព្រិលបាក់កាលពីថ្ងៃទី៣ ខែវិច្ឆិកា ឆ្នាំ២០២៥។ ទោះជាយ៉ាងណា អត្តសញ្ញាណនឹងត្រូវបញ្ជាក់ក្រោយពេលយកសាកសពចុះពីភ្នំ និងធ្វើកោសល្យវិច័យ។
អាជ្ញាធរបានបញ្ជូនកម្លាំងនគរបាលតាមឧទ្ធម្ភាគចក្រទៅកាន់ទីតាំងកើតហេតុ ប៉ុន្តែប្រតិបត្តិការយកសាកសពចុះត្រូវផ្អាក ដោយសារអាកាសធាតុអាក្រក់។ មន្ត្រីបានបញ្ជាក់ថា នឹងបន្តប្រតិបត្តិការភ្លាមៗ នៅពេលអាកាសធាតុអំណោយផល៕
ចែករំលែកព័តមាននេះ