ខេត្តឧត្តរមានជ័យ ៖ លោក មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានឲ្យដឹងថា ស្ពានដែកបេឡេតិ៍ ១កន្លែង គឺជាកន្លែងតភ្ជាប់ដ៏សំខាន់ពីស្រុកចុងកាល់ ខេត្តឧត្តរមានជ័យ ទៅកាន់ ឃុំវ៉ារិន ស្រុកវ៉ារិន ខេត្តសៀមរាប ប៉ុន្តែដោយសាររថយន្ដធន់ធំ ដឹកលើសទម្ងន់កំណត់ បានបណ្ដាលឱ្យស្ពាននេះ បាក់ធ្លាក់ដល់បាតអូរ ស្ថិតនៅផ្លូវមួយខ្សែ ដែលជាផ្លូវយុទ្ធសាស្ដ្រដ៏សំខាន់សម្រាប់ខេត្តទាំងពីរ ។
នារសៀលថ្ងៃទី៦ ខែសីហា ឆ្នាំ២០២៦ លោក មាន ចាន់យ៉ាដា បានដឹកនាំក្រុមការងារ អមដំណើរ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ចុះពិនិត្យជាក់ស្ដែងនៅចំណុចទីតាំងស្ពានដែកបេឡេតិ៍ ១កន្លែង ដែលបានបាក់ដល់បាតអូរ ស្ថិតនៅព្រំប្រទល់ខេត្តសៀមរាប និងខេត្តឧត្តរមានជ័យ ។
គួរបញ្ជាក់ថា ស្ពានដែកបេឡេតិ៍នេះ មានប្រវែង ៣០ម៉ែត្រ ទទឹង ៤ម៉ែត្រ ត្រូវបានបាក់ធ្លាក់ដល់បាតអូរត្រាច កាលពីថ្ងៃទី៤ ខែសីហា ឆ្នាំ២០២៦ ដោយសាររថយន្ដធន់ធំ ដឹកដំឡូង លើសកម្រិតទម្ងន់កំណត់ ។
តាមរយៈការពិនិត្យជាក់សែ្ដង ឯកឧត្តមរដ្ឋមន្ត្រី បានណែនាំដល់នាយកដ្ឋានអភិវឌ្ឍន៍ ហេដ្ឋារចនាសម្ព័ន្ធផ្លូវជនបទ នៃក្រសួងអភិវឌ្ឍន៍ជនបទ សិក្សាលទ្ធភាពបច្ចេកទេស ដើម្បីជួសជុលស្ពានដែកបេឡេតិ៍ជាថ្មី ឱ្យបានឆាប់រហ័ស ឆ្លើយតបទៅនឹងតម្រូវការប្រើប្រាស់ប្រចាំថ្ងៃរបស់អាជ្ញាធរមូលដ្ឋាន និងប្រជាពលរដ្ឋនៅក្នុងមូលដ្ឋាននៃខេត្តទាំងពីរ ៕
ចែករំលែកព័តមាននេះ