ខេត្តព្រះវិហារ ៖ ឧបករណ៍ សំភារ ថវិកា និងគ្រឿងឧបភោគ បរិភោគចំនួន២៤មុខដែលមានតំលៃជាទឹកប្រាក់ប្រមាណ១៥លាន៧សែន៥ពាន់រៀល ជាការចូលរួមចំណែកបរិច្ចាគពីបងប្អូនកម្មករ-កម្មការិនីតាមបណ្តារោងចក្រ សហគ្រាសនានាត្រូវបានលោកសោម អូន ប្រធានក្រុមប្រឹក្សាភិបាលសភាសម្ព័ន្ធសហជីពជាតិកម្ពុជា និងជាតំណាងសហជីពកាយឫទ្ធិជាតិកម្ពុជា ដឹកនាំប្រតិភូមកពីតាមបណ្តាសម្ព័ន្ធសហជីពក្រោមឱវាទរបស់ខ្លួនយកទៅចែកជូនផ្ទាល់ដល់កងទ័ព កងរថក្រោះដែលកំពុងឈរជើងការពារបូរណភាពទឹកដីទិសប្រាសាទព្រះវិហារកាលពីថ្ងៃទី ៣ ខែមីនា ឆ្នាំ២០១១។
លោកសោម អូន បានឱ្យដឹងថា អំណោយទាំងនេះរួមមានទឹកត្រី៩៦០ដប ទឹកស៊ីអ៊ីវ១.២០០ដប ទឹកបរិសុទ្ធ៥០យួរ ត្រីប្រឡាក់៦០គីឡូក្រាម អាវយឺត៣៤០អាវ មីគុយទាវ៥៧៦កញ្ចប់ សាច់ផាត់៣០គីឡូក្រាម មី១០កេស និងសំភារប្រើប្រាស់ចំនួន២៤មុខ។ អំណោយទាំងនេះបានមកពី កម្មករនិយោជិតជាសមាជិក សមាជិការបស់សម្ព័ន្ធសហជីពកម្មករកម្ពុជា សមាគម និងសហព័ន្ធសហជីពជាសមាជិកសភាសម្ព័ន្ធសហជីពជាតិកម្ពុជា រោងចក្រកាត់ដេរក្លេភី រោងចក្រហ្គ្រេនធិច និងសាលាឆទានបឹងសាឡាង។ ក្នុងនាមកម្មករ កម្មការិនីដែលកំពុងបំរើការងារតាមបណ្តារោងចក្រសហគ្រាសទាំងអស់បានថ្លែងអំណរគុណ និងកោតសរសើរចំពោះវីរភាពដ៏អង់អាចក្លាហានរបស់នាយ និងពលទាហានដែលកំពុងបំពេញបេសកកម្មដ៏ឧត្តុង្គឧត្តមក្នុងការការពារបូរណភាពទឹកដី មិនឱ្យសត្រូវឈ្លានពានបាន។
លោកសោម អូន បានឱ្យដឹងទៀតថា អំណោយដែលបានយកមកផ្តល់ជូនដល់កងទ័ពនាពេលនេះមានចំនួនតិចតួច ប៉ុន្តែគឺជាទឹកចិត្តដ៏ស្មោះសរដែលកើតចេញពីសន្តានចិត្តរបស់បងប្អូនកម្មករ កម្មការិនីចំពោះនាយ និងពលទាហានទាំងអស់។ បងប្អូនកម្មករទាំងអស់ក៏ដូចជាប្រជាពលរដ្ឋកម្ពុជាទាំងក្នុង និងក្រៅប្រទេសនៅតែបន្តគាំទ្រចូលរួមបរិច្ចាគធនធានជាបន្តទៀតជាការលើកទឹកចិត្តដល់កងទ័ពក្នុងការការពារបូរណភាពទឹកដី មិនឱ្យសត្រូវឈ្លានពានបានឡើយ។
លោកឧត្តមសេនីយ៍ទោ ឡាញ់ កៅ មេបញ្ជាការកងរថក្រោះនៃកងយោធពលខេមរភូមិន្ទដែលកំពុងឈរជើងការពារទឹកដីទិសច្រកតាថាវ តំបន់ប្រាសាទព្រះវិហារក្នុងនាមនាយ និងពលទាហានទាំងអស់បានថ្លែងអំណរគុណចំពោះទឹកចិត្តសប្បុរសធម៌របស់បងប្អូនកម្មករ កម្មការិនីដែលបានចូលរួមឧបត្ថម្ភនូវអំណោយទាំងអស់នេះ។ នេះគឺជាការលើកទឹកចិត្តមួយដល់កងទ័ពក្នុងការខិតខំការពារបូរណភាពទឹកដីមិនឱ្យសត្រូវសៀមឈ្លានពានបានឡើយ។ លោកឧត្តមសេនីយ៍ទោបានលើកឡើងពីមហិច្ឆតាឈ្លានពានរបស់ចោរសៀមមកលើទឹកដីកម្ពុជា ជាពិសេសប្រាសាទព្រះវិហារដែលជានិច្ចកាលពួកវាតែងតែចិញ្ចឹមចិត្តចង់បានដោយឥតអៀនខ្មាស ។ លោកបានលើកឡើងផងដែរពីទឹកចិត្តអង់អាចក្លាហានរបស់កងទ័ពកម្ពុជាក្នុងការត្រៀមប្រយុទ្ធគ្រប់វិនាទីជាមួយខ្មាំងសត្រូវក្នុងការការពារទឹកដីមិនឱ្យបាត់បង់មួយមិល្លីម៉ែត្រឡើយ ៕
ចែករំលែកព័តមាននេះ