ទីក្រុងព្យុងយ៉ាង៖ កងឯកភាពមីស៊ីលរបស់កូរ៉េខាងជើងចាប់ផ្ដើមចុះទៅឈរជើងនៅប្រទេសរុស្ស៊ីភាគខាងលិចជាបណ្ដើរៗហើយ ហើយអាចនឹងបំពាក់មីស៊ីលផ្លោង១២០គ្រាប់ និងជើងទម្របាញ់មីស៊ីល៦គ្រឿងដើម្បីត្រៀមវាយប្រហារអ៊ុយក្រែន។ នេះបើតាមការអះអាងរបស់ទីភ្នាក់ងារស៊ើបការណ៍សម្ងាត់យោធាអ៊ុយក្រែន។ ព្រឹត្តិការណ៍នេះកើតឡើងចំពេលដែលអ៊ុយក្រែនកំពុងខ្វះខាតប្រព័ន្ធការពារដែនអាកាសស្រាប់ផង។ ដូច្នេះ រុស្ស៊ីឆ្លៀតឱកាសនេះសម្រុកវាយប្រហារដោយមីស៊ីលដែលពិបាកក្នុងការបាញ់ទម្លាក់។ តាមពិត រុស្ស៊ីចាប់ផ្ដើមប្រើប្រាស់មីស៊ីលរបស់កូរ៉េខាងជើងតាំងពីចុងឆ្នាំ២០២៣មកម៉្លេះ។ ប៉ុន្តែការដាក់ពង្រាយកងឯកភាពមីស៊ីលរបស់កូរ៉េខាងជើងលើកនេះជាការឆ្លុះបញ្ចាំងអំពីកិច្ចសហប្រតិបត្តិការយោធាកាន់តែស៊ីជម្រៅ។
អគ្គនាយកអង្គភាពចារកម្មអ៊ុយក្រែន លោកអានឌ្រី ឆឺនញ៉ាក់ (Andrii Cherniak) ថ្លែងថារុស្ស៊ីមានផែនការដាក់ពង្រាយកងឯកភាពមីស៊ីលកូរ៉េខាងជើងដែលមានគ្នា៩០នាក់នៅតំបន់វ៉ូរ៉ូនេសដើម្បីចូលរួមប្រតិបត្តិការជាមួយកងវរសេនាធំមីស៊ីលទី១១២របស់រុស្ស៊ី។ កូរ៉េខាងជើងបានបញ្ជូនមីស៊ីលម៉ាក 40 KN-23 និង KN-24 រួមទាំងទាហានមួយចំនួនទៅរុស្ស៊ី។ ប៉ុន្តែបើចង់ដឹងថាចំនួនទាហានដែលបញ្ជូនទៅប៉ុន្មាន និងមីស៊ីលមានចំនួនប៉ុន្មានលុះត្រារង់ការបូកសរុបតួលេខនៅក្នុងកិច្ចប្រជុំកម្រិតខ្ពស់នាខែកញ្ញាខាងមុខនេះទើបដឹងអស់សេចក្ដី។ រុស្ស៊ីរំពឹងថានឹងដាក់ពង្រាយមីស៊ីលកូរ៉េខាងជើង១២០គ្រាប់ និងជើងទម្រ៦គ្រឿង។ រហូតមកដល់ពេលនេះ គេមិនទាន់ដឹងច្បាស់ថាតើកងឯកភាពមីស៊ីលរបស់កូរ៉េខាងជើងនឹងដើរតួនាទីកម្រិតណានៅក្នុងប្រតិបត្តិការបាញ់មីស៊ីល។
ការដាក់ពង្រាយកងឯកភាពទាំងនេះតាមការអះអាងរបស់លោកឆឺនញ៉ាក់ហាក់ដូចជាគាប់ជួននឹងករណីដែលរុស្ស៊ីបាញ់មីស៊ីលកូរ៉េខាងជើង២គ្រាប់ជាថ្មីម្ដងទៀតបន្ទាប់ពីអាក់ខានតាំងពីខែសីហា ឆ្នាំ២០២៥។ លោករ៉ប់លី (Rob Lee) ជាអ្នកវិភាគប្រចាំរដ្ឋហ្វ៊ីឡាដែលហ្វ្យា។ លោកថ្លែងថាប្រភពធនធានដែលបញ្ជូនពីកូរ៉េខាងជើងគឺជាការគំរាមកំហែងដ៏ធំមួយសម្រាប់អ៊ុយក្រែន។ ការខ្វះខាតប្រព័ន្ធការពារមីស៊ីលផ្លោងគឺជាចំណុចខ្សោយដ៏ធំបំផុតមួយសម្រាប់អ៊ុយក្រែនស្រាប់ទៅហើយ។ ហេតុនេះ នៅពេលរុស្ស៊ីមានមីស៊ីលវាយប្រហារកាន់តែច្រើនដូច្នេះ វាកាន់តែបង្កបញ្ហាសម្រាប់អ៊ុយក្រែនថែមមួយកម្រិតទៀត។ អ្វីដែលជាក្ដីបារម្ភដ៏ធំសម្រាប់អ៊ុយក្រែនគឺការខ្វះខាតប្រព័ន្ធការពារដែនអាកាសនៅរដូវរងាឆ្នាំនេះ។ នៅអំឡុងពេលនោះ រុស្ស៊ីច្រើនវាយប្រហារទីតាំងផលិតថាមពលរបស់អ៊ុយក្រែន។
ចាប់តាំងពីសង្គ្រាមអ៊ុយក្រែនផ្ទុះឡើងដំបូង កូរ៉េខាងជើងក្លាយជាសម្ព័ន្ធមិត្តដ៏ជិតស្និទ្ធរបស់រុស្ស៊ី ហើយប្រទេសទាំង២បានចុះហត្ថលេខាលើកតិកាសញ្ញាការពារគ្នាទៅវិញទៅមកកាលពីឆ្នាំ២០២៤។ កូរ៉េខាងជើងបានបញ្ជូនទៅឱ្យរុស្ស៊ីនូវគ្រាប់កាំភ្លើងធំរាប់លានគ្រាប់ និងបញ្ជូនកងទ័ព១៤០០០នាក់ទៅជួយរុស្ស៊ីនៅតំបន់ខឺសដើម្បីបណ្ដេញកងទ័ពអ៊ុយក្រែនចេញពីទីនោះ។ កាលពីសប្ដាហ៍មុន អាជ្ញាធរអ៊ុយក្រែនថ្លែងថាមីស៊ីលរបស់កូរ៉េខាងជើងវាយប្រហារខ្ទេចដូចបង្អួលនូវផ្ទះមួយខ្នងនៅភូមិរ៉ាឌូសស្នេ (Radushne) ស្លាប់មនុស្សយ៉ាងតិច៥នាក់ជាសមាជិកគ្រួសារតែមួយ។ គ្រាប់មីស៊ីលរបស់កូរ៉េខាងជើងថ្វីដ្បិតមានទំហំធំជាងរុស្ស៊ី ប៉ុន្តែបាញ់មិនសូវចំគោលដៅល្អប៉ុន្មានទេ៕ ប្រភព៖ Reuters
ចែករំលែកព័តមាននេះ