ចប់វេលាអនុគ្រោះ! ចាប់ពីថ្ងៃ១ ខែកញ្ញា ក្រសួងមហាផ្ទៃនឹងផាកពិន័យលើអ្នកបើកបរស្រវឹង បើកលឿន និងដឹកសំពីងសំពោង
- ភ្នំពេញ
រាជធានីភ្នំពេញ ៖ បន្ទាប់ពីមានការអនុញ្ញាតពីប្រមុខរាជរដ្ឋាភិបាល ក្រសួងមហាផ្ទៃ និងចាប់ផ្តើមរឹតបន្តឹងអនុវត្តច្បាប់ចរាចរណ៍ផ្លូវគោក នៅតាមបណ្តាខេត្តមួយចំនួនឡើងវិញ ចាប់ពីថ្ងៃទី១ ខែកញ្ញា ឆ្នាំ២០២៦តទៅ ។ នេះបើតាមការអ្នកនាំពាក្យរងក្រសួងមហាផ្ទៃ ។
លោក ទូច សុឃៈ អ្នកនាំពាក្យក្រសួងមហាផ្ទៃ បានឱ្យដឹងនៅថ្ងៃទី៥ ខែសីហា ឆ្នាំ២០២៦ បានឱ្យដឹងថា សម្តេចបវរធិបតីហ៊ុន ម៉ាណែត នាយករដ្ឋមន្ត្រីទទួលសំណើររបស់ក្រសួងមហាផ្ទៃ សុំអនុវត្តវិធានការរឹតបន្ដឹងច្បាប់ស្តីពីចរាចរណ៍ផ្លូវគោកឡើងវិញ ចាប់ពីថ្ងៃទី១ ខែកញ្ញា ឆ្នាំ២០២៦តទៅ បន្ទាប់ពីបានផ្អាកដោយសារស្ថានការណ៍សង្គ្រាមតាមព្រំដែន និងវិបត្តិសេដ្ឋកិច្ចសកលដោយសង្គ្រាមនៅមជ្ឈឹមបូព៌ា ។
អ្នកនាំពាក្យថា ការរឹតបន្តឹងអនុវត្តច្បាប់ស្តីពីចរាចរណ៍ផ្លូវគោកនឹងអនុវត្តតែនៅភូមិសាស្ត្រដែលមានគ្រោះថ្នាក់ច្រើន រួមមាន រាជធានីភ្នំពេញ ខេត្តព្រះសីហនុ ខេត្តកណ្តាល ខេត្តកំពង់ស្ពឺ និងខេត្តស្វាយរៀង ផ្តោតលើអំពើល្មើសដែលបង្កគ្រោះថ្នាក់ រួមមាន ការបើកបរលើសល្បឿនកំណត់ ការបើកបរក្នុងស្ថានភាពស្រវឹង ការមិនគោរពសញ្ញាសិទ្ធិអាទិភាព និងភ្លើង ស្តុប និងការដឹកជញ្ជូនទំនិញសំពីងសំពោង ។
ជាមួយគ្នានោះដែរ អ្នកនាំបានលើកឡើងថា នគបាលចរាចរណ៍នៅទីតាំងផ្សេងទៀតក៏លោកនៅតែមានសិទ្ធិធ្វើការអប់រំណែនាំបងប្អូនប្រជាពលរដ្ឋ ដែលបើកបរដែលខុសពីបញ្ញាត្តិដែលច្បាប់ចរាចរណ៍បានចែង ។ អ្នកនាំពាក្យក៏អំពាវនាវដល់ប្រជាពលរដ្ឋទាំងអស់បង្កើតការប្រុងប្រយ័ត្នចំពោះការបើកបរដោយគោរពច្បាប់ចរាចរណ៍ឱ្យបានគ្រប់គ្នា ៕
ចែករំលែកព័តមាននេះ