ទីក្រុងម៉ាឌ្រីត៖ នាយករដ្ឋមន្ត្រីអេស្ប៉ាញចាប់ផ្ដើមបញ្ចេញប្រតិកម្មតបទៅក្រុមអ្នករិះគន់លោកពាក់ព័ន្ធនឹងការចាប់បញ្ចូនត្រឡប់ទៅវិញនូវជនចំណាកស្រុករាប់ម៉ឺននាក់ដែលហែលឆ្លងទឹកសមុទ្រពីប្រទេសម៉ារ៉ុកចូលទីក្រុងសេអ៊ូតារបស់អេស្ប៉ាញកាលពីប៉ុន្មានថ្ងៃមុន។ ថ្នាក់ដឹកនាំរដ្ឋជាសមាជិកសហភាពអឺរ៉ុបជួបប្រជុំគ្នានៅថ្ងៃនេះបន្ទាប់ពីមានបាតុភូតមិនប្រក្រតីដែលអ្នកចំណាកស្រុកសម្រុកឆ្លងកាត់ព្រំដែនយ៉ាងច្រើនសន្ធឹកសន្ធាប់។ ករណីមនុស្សធ្វើដំណើរសរុប៧,២ម៉ឺននាក់កាលពីថ្ងៃព្រហស្បតិ៍ និងថ្ងៃសុក្រនោះនាំឱ្យមានវិបត្តិមនុស្សធម៌នៅទីក្រុងសេអ៊ូតា ហើយធ្វើឱ្យអឺរ៉ុបចាប់ផ្ដើមជជែកដេញដោលគ្នាជាថ្មីអំពីបញ្ហាចំណាកស្រុក។ ពួកគេស្លាប់អស់ជាង៨០នាក់ដោយសារការលង់ទឹក និងការប្រជ្រៀតគ្នា។
លិខិតចំហរបស់ថ្នាក់ដឹកនាំសហភាពអឺរ៉ុបទាំង២២ប្រទេស និងការចាប់បញ្ជូនអ្នកចំណាកស្រុកត្រឡប់ទៅវិញបានធ្វើឱ្យមានការជជែកដេញដោលគ្នាយ៉ាងក្ដៅគគុកប្រឆាំងនឹងមេដឹកនាំអេស្ប៉ាញ លោកសាន់ឆេស។ លោកតែងតែប្រឆាំងជំទាស់នឹងនយោបាយអន្តោប្រវេសន៍របស់អឺរ៉ុប ហើយក៏ប្រឆាំងនឹងខ្ទង់ចំណាយរបស់អឺរ៉ុបនៅក្នុងអង្គការណាតូ ប្រឆាំងនឹងសង្គ្រាមនៅហ្កាហ្សា និងអ៊ីស្រាអែលផងដែរ។ រដ្ឋាភិបាលរបស់លោកសាន់ឆេសចាត់ទុកការនិយាយវាយប្រហារគោលនយោបាយរបស់លោកជារឿងនយោបាយ។ លោកថាអ្នកចំណាកស្រុកភាគច្រើនត្រូវបានចាប់បញ្ចូនត្រឡប់ទៅវិញមិនយុរប៉ុន្មានបន្ទាប់ពីពួកគេធ្វើដំណើរទៅដល់ទីក្រុងសេអ៊ូតាក្រោមកិច្ចសហការពីអាជ្ញាធរម៉ារ៉ុក។
ទោះបីកិច្ចប្រជុំរបស់សហភាពអឺរ៉ុបនៅថ្ងៃនេះចេញលទ្ធផលបែបណាក្ដី អឺរ៉ុបចាប់ផ្ដើមបង្ហាញសញ្ញាប្រេះឆាគ្នាយ៉ាងខ្លាំងចំពេលដែលប្លុកមួយនេះប្រឈមនឹងការគំរាមកំហែងផ្នែកសន្តិសុខពីរុស្ស៊ី, បញ្ហាអស្ថិរភាពនៅវ៉ាស៊ីនតោន និងភាពតានតឹងពាណិជ្ជកម្មជាមួយប្រទេសចិន។ ខាងលើនេះជាការថ្លែងរបស់លោកស្រីអាលីសៀ ហ្កាសៀ ហេរ៉េរ៉ូ (Alicia García-Herrero) ជាប្រធានក្រុមអ្នកវិភាគសេដ្ឋកិច្ចប្រចាំតំបន់អាស៊ី-ប៉ាស៊ីហ្វិច និងមជ្ឈិមបូព៌ាប្រចាំក្រុមហ៊ុនវិភាគហិរញ្ញវត្ថុ Natixis។ លោកស្រីយល់ថាអឺរ៉ុបកំពុងបង្ហាញចំណុចខ្សោយរបស់ខ្លួនហើយ។ នេះជាចំណុចខ្សោយដ៏ធំមួយ។ លោកសាន់ឆេសការពារសេចក្ដីសម្រេចរបស់តុលាការ ទោះបីការសម្រេចនេះរងការរិះគន់ពីសំណាក់ប្រទេសម៉ារ៉ុក និងសហភាពអឺរ៉ុបយ៉ាងណាក្ដី។ អឺរ៉ុបរិះគន់លោកសាន់ឆេសឥតសំចៃមាត់បន្ទាប់ពីវីឌីអូឃ្លីបបង្ហាញអំពីអ្នកចំណាកស្រុកសម្រុកឡើងគោកនៅទីក្រុងសេអ៊ូតា។ ថ្នាក់ដឹកនាំអឺរ៉ុបភាគច្រើនដាក់ការស្ដីបន្ទោសទៅលើគោលនយោបាយរបស់លោក និងប្រកូកប្រកាសឱ្យមានវិធានការថ្មីសម្រាប់ពិនិត្យមើលស្ថានការណ៍នៅតាមព្រំដែនគោក អាកាស និងសមុទ្រ។
នាយករដ្ឋមន្ត្រីអ៊ីតាលីបានរិះគន់លោកសាន់ឆេសចំៗ និងប្រកាសថាអ៊ីតាលីនឹងពង្រឹងព្រំដែនអាកាស និងសមុទ្រដែលជាប់នឹងអេស្ប៉ាញ។ ប៉ុន្តែគេគិតថាអ៊ីតាលីនឹងមិនមានហានិភ័យទេដោយសារទីក្រុងសេអ៊ូតាស្ថិតនៅឆ្ងាយដាច់ស្រយាល អាចនិយាយបានថាឱកាសមានតិចតួចជាទីបំផុតដែលថាមនុស្សនឹងឆ្លងចូលទឹកដីអេស្ប៉ាញ ហើយបន្តដំណើរចូលទឹកដីអ៊ីតាលី។ ខាងលើនេះជាការយល់ឃើញរបស់លោកម៉ាតេអូ វីឡា (Matteo Villa) ដែលសង្កេតឃើញថាមានតែអ្នកចំណាកស្រុក២%ប៉ុណ្ណោះហូរចូលប្រទេសអ៊ីតាលី។ លោកណាន់ដូ ស៊ីហ្គោណា (Nando Sigona) ជាគ្រូបង្រៀននៅសាកលវិទ្យាល័យបឺមីងហេម។ លោកថ្លែងថានាយករដ្ឋមន្ត្រីអ៊ីតាលីមិនពេញចិត្តនឹងចំណាត់ការរបស់លោកសាន់ឆេសដែលផ្ដល់សិទ្ធិស្របច្បាប់សម្រាប់អ្នករស់នៅលើទឹកដីអេស្ប៉ាញមួយលាននាក់។ លោកស្រីចង់បង្ហាញថាវិធានការនេះនឹងបរាជ័យ៕ ប្រភព៖ AP
ចែករំលែកព័តមាននេះ