ទីក្រុងវ៉ាស៊ីនតោន៖ ទីភ្នាក់ងាររបស់អង់គ្លេសទទួលបន្ទុកខាងឃ្លាំមើលសភាពការណ៍នៅលំហសមុទ្រថ្លែងថាថ្ងៃនេះ កប៉ាល់ដឹកទំនិញមួយគ្រឿងរងការបាញ់ប្រហារដោយមីស៊ីលមួយគ្រាប់នៅលើដែនសមុទ្រប្រទេសអូម៉ង់ និងស្ថិតនៅលើច្រកសមុទ្រហ័រម៉ូស។ ព្រឹត្តិការណ៍នេះកើតឡើងចំពេលដែលអាមេរិក និងអ៊ីរ៉ង់ធ្វើអត្ថាធិប្បាយផ្ទុយគ្នាពាក់ព័ន្ធនឹងការចរចា។ លោកដូណាល់ត្រាំមានប្រសាសន៍ថាភាគីទាំង២ចាប់ផ្ដើមបើកការចរចាគ្នាឡើងវិញហើយដើម្បីដោះស្រាយជម្លោះ។ ផ្ទុយទៅវិញ អ៊ីរ៉ង់នៅតែនិយាយយ៉ាងទទូចថាគ្មានការចរចាគ្នារវាងអ៊ីរ៉ង់ និងអាមេរិកទេ។ អ៊ីរ៉ង់ថាខ្លួនចរចាគ្នាតែជាមួយប្រទេសអូម៉ង់ប៉ុណ្ណោះដោយផ្ដោតសំខាន់ទៅលើការគ្រប់គ្រងច្រកសមុទ្រហ័រម៉ូស។
កប៉ាល់ដឹកទំនិញមួយគ្រឿងត្រូវបានវាយប្រហារដោយមីស៊ីលដែលគេមិនស្គាល់អត្តសញ្ញាណនៅវេលាម៉ោង២រំលងអធ្រាត្រ។ កប៉ាល់នោះបើកនៅរយៈចម្ងាយ៣៧គីឡូម៉ែត្រភាគឦសាននៃទីក្រុងកំពង់ផែអាល់កាសាប (Al Khasab) ប្រទេសអូម៉ង់។ គេមិនបានដឹងលម្អិតប៉ុន្មានទេអំពីករណីនេះ។ សូម្បីតែកប៉ាល់នោះដោតទង់ជាតិប្រទេសណា ឬក៏កប៉ាល់នោះដឹកទំនិញអ្វីខ្លះក៏គេមិនបានដែរ។ ប្រភពខ្លះថាកប៉ាល់នោះរងការខូចខាតនៅត្រង់ផ្នែកខ្លះ។ ទីក្រុងអាល់កាសាបស្ថិតនៅចុងឧបទ្វីបអារ៉ាប់ដែលលយចូលច្រកសមុទ្រហ័រម៉ូស។
ចាប់តាំងពីចុងខែកុម្ភៈ ច្រកសមុទ្រនេះត្រូវបានបិទដំណើរការទាំងស្រុង និងប្រកបដោយប្រសិទ្ធភាពខ្ពស់ថែមទៀតផង មានន័យថាគ្មានកប៉ាល់ណាអាចបើកចេញចូលបានឡើយបើគ្មានការអនុញ្ញាតពីអ៊ីរ៉ង់។ ហេតុនេះ អាមេរិកក៏បិទដែនសមុទ្រអ៊ីរ៉ង់វិញដែរដើម្បីមិនឱ្យកប៉ាល់នានាអាចបើកចេញ ឬចូលកំពង់ផែរបស់ប្រទេសនេះបានឡើយ។ លោកត្រាំមានប្រសាសន៍ថាអ៊ីរ៉ង់ និងអាមេរិកចាប់ផ្ដើមចរចាគ្នាឡើងវិញហើយ។ លោកថ្លែងដូច្នេះមួយថ្ងៃបន្ទាប់ពីលោកអំពាវនាវឱ្យយោធាអាមេរិកវាយប្រហារអ៊ីរ៉ង់យ៉ាងខ្លាំងក្លា។ ប៉ុន្តែក្រោយមក លោកថាលោកផ្អាកផែនការវាយប្រហារនោះវិញតបតាមសំណើរបស់ប្រទេសកាតា អារ៉ាប៊ីសាអូឌីត និងអារ៉ាប់រួម។ លោកអះអាងថាទោះបីអ៊ីរ៉ង់ទទួលស្គាល់ ឬមិនទទួលស្គាល់យ៉ាងណាក្ដី ជាក់ស្ដែង យើងកំពុងចរចាគ្នា។ អ្នកនាំពាក្យក្រសួងការបរទេសអ៊ីរ៉ង់ប្រកាសថាគ្មានគណៈប្រតិភូអ៊ីរ៉ង់ណាមួយកំពុងចរចាគ្នាជាមួយអាមេរិកទេ។ លោកថាអ៊ីរ៉ង់ចរចាតែជាមួយអូម៉ង់ប៉ុណ្ណោះដើម្បីពិគ្រោះគ្នាអំពីការបង្កើតច្រកសុវត្ថិភាពសម្រាប់កប៉ាល់នានាឆ្លងកាត់ច្រកសមុទ្រហ័រម៉ូស។
លោកត្រាំចាប់ផ្ដើមបង្ហាញអារម្មណ៍ខឹងសម្បារយ៉ាងខ្លាំងចំពោះអ៊ីរ៉ង់។ លោកអះអាងថាអ៊ីរ៉ង់ជាអ្នកបោះដៃទៅអាមេរិកដើម្បីចរចាគ្នា។ នេះជាចំណុចសំខាន់ដើម្បីឈានទៅដល់ការបញ្ចប់សង្គ្រាម និងបើកដំណើរការច្រកសមុទ្រហ័រម៉ូសឡើងវិញ។ លោកបង្ហោះសារនៅលើបណ្ដាញសង្គមថាថ្នាក់ដឹកនាំអ៊ីរ៉ង់និយាយក្រឡិចក្រឡុចបាតដៃជាខ្នងដៃ។ ពួកគេស្នើសុំទៅអាមេរិកដើម្បីចរចាគ្នា អាចនិយាយបានថាពួកគេសូមសំពះអង្វរចរចាគ្នាក៏បានដែរ។ ការចរចាគ្នាចាប់ផ្ដើមជាបណ្ដើរៗហើយ ហើយនឹងបន្តការចរចាគ្នានាពេលអនាគតដ៏ខ្លីខាងមុខនេះ។ ផ្ទុយទៅវិញ ពួកគេបែរជាប្រកាសក្ដែងៗជាចំហ និងដោយអំនួតថាគ្មានការចរចាគ្នាទៅវិញ៕ ប្រភព៖ AP
ចែករំលែកព័តមាននេះ