ទីក្រុងសេអ៊ូល៖ ប្រធានាធិបតីកូរ៉េខាងត្បូង លោកលីជេម្យុង ជំរុញឱ្យអាជ្ញាធរខិតខំបន្ថែមទៀតដើម្បីការពារអាយុជីវិតរបស់ប្រជាជនដែលរងគ្រោះដោយសារការឡើងកម្ដៅ។ លោកចាត់ទុកថានេះជាគ្រោះមហន្តរាយរបស់ប្រទេសជាតិព្រោះមនុស្សយ៉ាងតិច១៩នាក់បានស្លាប់។ នៅក្នុងកិច្ចប្រជុំគណៈរដ្ឋមន្ត្រីកាលពីព្រឹកមិញ លោកលីបញ្ជាឱ្យមន្ត្រីក្រោមឱវាទចាត់វិធានការដែលចាំបាច់ទាំងអស់ដើម្បីការពារជីវិតមនុស្ស និងត្រួតពិនិត្យមើលប្រព័ន្ធចែកចាយអគ្គិសនីស្របពេលដែលមនុស្សបើកម៉ាស៊ីនត្រជាក់កាន់តែច្រើនដើម្បីទប់ទល់នឹងការឡើងកម្ដៅ។ លោកថ្លែងបន្តទៀតថាអ្វីដែលជាកង្វល់ដ៏ធំនៅត្រង់ថាកម្ដៅអាចនឹងបន្តកើតឡើងរយៈពេលយូរអង្វែងតទៅមុខទៀត។ លោកចង់ឱ្យមានការកែសម្រួលឡើងវិញនូវវិធានការទប់ទល់នឹងគ្រោះធម្មជាតិដើម្បីទប់ស្កាត់មិនឱ្យកើតមានហានិភ័យធ្ងន់ធ្ងរ។
ទីភ្នាក់ងារឧតុនិយមជាតិថ្លែងថាទីក្រុងយ៉ាងសាន (Yangsan) ឡើងកម្ដៅដល់៤២,៥អង្សាកាលពីថ្ងៃអាទិត្យដែលជាកម្ដៅខ្ពស់មិនធ្លាប់មាននៅក្នុងរយៈពេល១២២ឆ្នាំចុងក្រោយ។ គណៈកម្មការឧតុនិយមកូរ៉េខាងត្បូងក៏បានចេញសេចក្ដីព្រមានជាលើកដំបូងរបស់ខ្លួនផងដែរថាផ្នែកខ្លះនៃទីក្រុងសេអ៊ូល និងទីក្រុងគ្យុងជី (Gyeonggi) ដែលនៅក្បែរនោះត្រូវបង្កើនការប្រុងប្រយ័ត្នខ្ពស់។ ថ្ងៃនេះ គណៈកម្មការដដែលអំពាវនាវឱ្យប្រុងប្រយ័ត្នទូទាំងរដ្ឋធានីតែម្ដង។ អាជ្ញាធរក៏បានចេញសារដាស់តឿនខ្លីៗដើម្បីឱ្យប្រជាជនផ្អាកធ្វើសកម្មភាពនៅទីចំហដូចជានៅតាមកសិដ្ឋាន កន្លែងលេងកីឡា និងការដ្ឋានសំណង់ជាដើម។
ប្រជាជនម្នាក់ប្រាប់ថាខ្លួនពុំដែលជួបប្រទះសីតុណ្ហភាពក្ដៅហួតហែងដល់ថ្នាក់នេះទេពីមុនមក។ គាត់រស់នៅភូមិចូបាងជិតម្ភៃឆ្នាំហើយ។ ទីនេះជាផ្ទះមានតែមួយបន្ទប់ស្ថិតនៅសង្កាត់យ៉ុងឌឺនប៉ូនៃទីក្រុងសេអ៊ូលភាគខាងលិច។ អ្នកខ្លះទ្រាំទ្រនឹងកម្ដៅមិនបានតទៅទៀតក៏សម្រេចចិត្តផ្លាស់ទៅស្នាក់នៅបណ្ដោះអាសន្នក្នុងគេហដ្ឋានដែលរដ្ឋាភិបាលរៀបចំទុកឱ្យមានម៉ាស៊ីនត្រជាក់។ ជនអនាថាដែលគ្មានទីជម្រកក៏ស្នាក់នៅទីនោះតាំងពីមុននេះទៅទៀត។ ប្រជាជនកូរ៉េខាងត្បូងម្នាក់ឈ្មោះសុនគីយ៉ាំងប្រាប់ថាខ្លួនមានចិត្តក្រៀមក្រំនៅពេលឃើញជនអនាថារស់នៅតាមចិញ្ចើមថ្នល់ទទួលរងកម្ដៅដ៏ខ្លាំងបែបនេះ។
ភ្នាក់ងារអគ្គិភ័យ និងមន្ត្រីរដ្ឋាភិបាលបន្តបាញ់ទឹកឱ្យបានជោគជាំនៅតាមដងវិថីនានា និងដើរពិនិត្យមើលក្រែងលោមានប្រជាជនដែលងាយរងគ្រោះពីការឡើងកម្ដៅនេះធ្លាក់ខ្លួនឈឺ។ ភ្នាក់ងារទប់ស្កាត់ និងគ្រប់គ្រងជំងឺឆ្លងកូរ៉េថ្លែងថាចំនួនអ្នកស្លាប់ដោយសារការឡើងកម្ដៅនេះកើនឡើងដល់១៩នាក់។ ក្នុងនោះ ១៣នាក់ជាមនុស្សចាស់អាយុចាប់ពី៨០ឆ្នាំ ឬច្រើនជាងនេះ។ ចាប់តាំងពីថ្ងៃទី១៥ ខែឧសភា ឆ្នាំ២០២៥មក ប្រជាជនកូរ៉េខាងត្បូងប្រឈមនឹងការកើតជំងឺតម្កាត់ពេញផ្ទៃប្រទេសដោយសារការឡើងកម្ដៅ។ ការប្រកួតកីឡាចំនួន២ដែលគ្រោងធ្វើនៅទីក្រុងសេអ៊ូល និងក្វាងជូនៅថ្ងៃនេះត្រូវបានលុបចោលវិញហើយព្រោះតែការឡើងកម្ដៅ៕ ប្រភព៖ Reuters
ចែករំលែកព័តមាននេះ