ប្រធានមន្ទីរកសិកម្មខេត្តកំពង់ស្ពឺ ណែនាំបច្ចេកទេសបូមទឹកសង្គ្រោះស្រូវដល់កសិករ ដើម្បីធានាបានទិន្នផលល្អ
- កំពង់ស្ពឺ
ខេត្តកំពង់ស្ពឺ៖ លោក យឹម ណន បប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ស្ពឺ កាលពីថ្ងៃទី១ ខែសីហា ឆ្នាំ២០២៦ កន្លងទៅថ្មីៗនេះ បានដឹកនាំក្រុមការងារការិយាល័យជំនាញ ចុះពិនិត្យលើស្ថានភាពបង្កបង្កើនផលដំណាំស្រូវរបស់បងប្អូនប្រជាកសិករ ក្នុងភូមិសាស្ត្រឃុំស្វាយចចិប ស្រុកបសេដ្ឋ ខេត្តកំពង់ស្ពឺ។
លោក យឹម ណន ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ស្ពឺ បាននិយាយឱ្យដឹងថា ការចុះពិនិត្យស្រែស្រូវរបស់ប្រជាកសិករថ្ងៃនេះ ធ្វើឡើងដើម្បី ទី១- សង្កេតផ្ទាល់អំពីផលប៉ះពាល់នៃបាតុភូតអែលនីញ៉ូ ក្នុងផលិតកម្មដំណាំស្រូវក្នុងមូលដ្ឋាន
និង២- ពិនិត្យមើលលទ្ធភាពជាក់ស្តែង ដើម្បីសង្គ្រោះស្រូវដែលរងផលប៉ះពាល់ដោយភាពរាំងស្ងួត។
ជាក់ស្ដែងលោកប្រធានមន្ទីរ និងក្រុមការងារបានពិនិត្យឃើញថា មានកិច្ចអន្តរាគមន៍ក្នុងការបូមទឹកសង្គ្រោះដោយមន្ទីរធនធានទឹក និងឧតុនិយមខេត្តកំពង់ស្ពឺ ប្រជាកសិករ មានទឹកគ្រប់គ្រាន់នៅក្នុងការបូមបន្តពីប្រឡាយរង ដាក់បញ្ចូលក្នុងស្រែ សង្គ្រោះស្រូវដើមរដូវដែលរងផលប៉ះពាល់ដោយគ្រោះរាំងស្ងួតបានទាន់ពេលវេលា។
ជាមួយគ្នានេះ លោក យឹម ណន ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ស្ពឺ ក៏បានចូលរួមផ្ដល់ជាយោបល់ ជូនប្រជាកសិករក្នុងការពិនិត្យលើអទិភាពនៃការសង្គ្រោះ ដោយបូមទឹកបញ្ចូលស្រែដែលមានស្រូវក្នុងវគ្គបង្កើនផល អោយបានមុនស្រូវដែលស្ថិតនៅក្នុងវគ្គលូតលាស់។ សរុបជារួម គឺស្រូវអាចធានាបានទាំងការលូតលាស់ គុណភាពគ្រាប់ និងទិន្នផលផងដែរ៕
ចែករំលែកព័តមាននេះ