ខេត្តស្ទឹងត្រែង ៖ ក្នុងប្រតិបត្តិការយ៉ាងក្តៅគគុករយៈពេល ២ថ្ងៃ គិតចាប់ពីថ្ងៃទី៣១ ខែកក្កដា ដល់ថ្ងៃទី០១ ខែសីហា ឆ្នាំ២០២៦ កម្លាំងជំនាញនៃស្នងការដ្ឋាននគរបាលខេត្ត បានចុះប្រតិបត្តិការស្រាវជ្រាវ និងបង្ក្រាបករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀនបានជាបន្តបន្ទាប់រហូតដល់ ៥គោលដៅផ្សេងគ្នា ដោយបានឃាត់ខ្លួនជនសង្ស័យសរុប ១៧នាក់ (ស្រី ០៣នាក់) ។
ដកហូតវត្ថុតាង រួមមាន ៖ សារធាតុ ញៀនម្សៅក្រាមពណ៌សថ្លា ០៥កញ្ចប់ (ធំ ០១ និងតូច ០៤) គ្រឿងញៀនប្រភេទគ្រាប់ចំនួន ១៤៥គ្រាប់ (ស្ថានភាពត្រូវទឹករលាយចូលគ្នា) ជញ្ជីងសម្រាប់ថ្លឹងគ្រឿងញៀន ០២គ្រឿង, រថយន្ត ០១គ្រឿង, ម៉ូតូ ១២
គ្រឿង, ទូរសព្ទដៃ ១៧គ្រឿង ។
បច្ចុប្បន្ន កម្លាំងជំនាញកំពុងបន្តនីតិវិធីស្រាវជ្រាវយ៉ាងសកម្ម ដើម្បីស្វែងរកបក្សពួក និងមេខ្លោងពាក់ព័ន្ធផ្សេងទៀត យកមកផ្តន្ទាទោសតាមច្បាប់ជាធរមាន ដោយមិនលើកលែងឡើយ ។
ក្រោយប្រតិបត្តិការបង្ក្រាបអំពើពាក់ព័ន្ធនឹងបទល្មើសគ្រឿងញៀនខាងលើថ្នាក់ដឹកនាំជំនាញជាន់ខ្ពស់ នៃស្នងការដ្ឋាននគរបាលខេត្តស្ទឹងត្រែង បានផ្ញើសារយ៉ាងសំខាន់ដោយលើកឡើងថា ៖ គ្រឿងញៀន មិនត្រឹមតែបំផ្លាញអនាគតខ្លួនឯង គ្រួសារ និងសង្គមជាតិប៉ុណ្ណោះទេ ប៉ុន្តែត្រូវប្រឈមមុខនឹងទោសទណ្ឌយ៉ាងធ្ងន់ធ្ងរតាមច្បាប់ ស្តីពីការត្រួតពិនិត្យគ្រឿងញៀន ។
ប្រតិបត្តិការដ៏ជោគជ័យនេះ បានស្តែងឱ្យឃើញពីកិច្ចខិតខំប្រឹងប្រែង និងស្មារតីទទួលខុសត្រូវខ្ពស់របស់កងកម្លាំងនគរបាលខេត្ត ដែលបានខិតខំបំពេញភារកិច្ចទាំងយប់ទាំងថ្ងៃ ដោយមិនខ្លាចនឿយហត់ ដើម្បីការពារសុវត្ថិភាព សន្តិសុខ និងសណ្តាប់ធ្នាប់សាធារណៈជូនប្រជាពលរដ្ឋក្នុងមូលដ្ឋាន ។
អាជ្ញាធរដែនដី ក៏សូមអំពាវនាវដល់បងប្អូនប្រជាពលរដ្ឋទាំងអស់ ចូលរួមសហការផ្តល់ព័ត៌មាន និងរាយការណ៍រាល់សកម្មភាពសង្ស័យពាក់ព័ន្ធនឹងគ្រឿងញៀន ដើម្បីរួមគ្នាកសាងសហគមន៍មួយដែល “គ្មានគ្រឿងញៀន” និងមានសុវត្ថិភាពពេញលេញ ៕
ចែករំលែកព័តមាននេះ