ប្រទេសប៉េរូ ៖ ក្រុមជើងឯកលីគកំពូលប៉េរូ ៤ សម័យកាល Deportivo Municipal កំពុងតែព្យាយាមរំដោះខ្លួនចេញពីការក្ស័យធន តាមរយៈរបៀបធ្វើពាណិជ្ជកម្មដ៏ប្លែកខុសគេ។ នេះបើយោងតាមប្រភពពីកាសែត The Sun បានចេញផ្សាយកាលពីថ្ងៃទី៣១ ខែកក្កដា ឆ្នាំ២០២៦។
ក្លិបយក្សប៉េរូដែលធ្លាក់កូដមួយនេះ បានដាក់បង្ហាញឯកសណ្ឋានថ្មីរបស់ខ្លួន ដែលពោរពេញទៅដោយស្លាកសញ្ញាអ្នកឧបត្ថម្ភរហូតដល់ទៅ ១ ០០០ ស្លាកសញ្ញា ដែលជួយឱ្យពួកគេអាចរកចំណូលបានប្រហែល ២៨ ម៉ឺនដុល្លារអាមេរិកពីការធ្វើបែបនេះ។ ដ្បិតការគំរាមកំហែងផ្នែកហិរញ្ញវត្ថុដែលកៀកទៅរកការក្ស័យធន បានបង្ខំឱ្យក្រុមដែលមានមូលដ្ឋាននៅទីក្រុងលីម៉ា (Lima) មួយនេះ រិះរកវិធីសាស្ត្រប្លែកៗ និងមិននឹកស្មានដល់ ហើយថ្នាក់ដឹកនាំកំពូលក៏បានឆ្លើយតប តាមរយៈការកែប្រែអាវប្រកួតរបស់ពួកគេ ក្លាយទៅជាបណ្តុំស្លាកសញ្ញាផ្សាយពាណិជ្ជកម្មបែបនេះ។
បកត្រឡប់ទៅក្នុងឆ្នាំ ២០១៧ ក្រុម Deportivo Municipal ធ្លាប់បានតទល់ជាមួយក្រុមខ្លាំងៗបំផុតប្រចាំតំបន់អាមេរិកខាងត្បូង នៅក្នុងពានរង្វាន់ Copa Libertadores ហើយក្រុមនេះ នៅតែប្រកួតប្រជែងក្នុងលីគកំពូលប៉េរូ កាលពី៣ឆ្នាំមុននៅឡើយ។ ទោះយ៉ាងណាក៏ដោយ ក្លិបដែលជំពាក់បំណុលវណ្ឌកមួយនេះ ក្រោយមកត្រូវបានពិន័យដកពិន្ទុជាបន្តបន្ទាប់ ដែលបានធ្វើឱ្យពួកគេធ្លាក់ទៅលេងនៅលីគទី ២ រដូវកាល ២០២៣/២៤។
មិនដល់១ឆ្នាំផងបន្ទាប់ពីនោះ ក្រុមរហ័ស្សនាម «Muni» មួយនេះ ត្រូវបានកាត់ចោលឱ្យទៅលេងនៅលីគទី៣ ដោយសារគ្មានលទ្ធភាពបង់ប្រាក់ថ្លៃអាជ្ញាប័ណ្ណជូនសហព័ន្ធបាល់ទាត់ប៉េរូ។ កាលពីដើមឆ្នាំនេះ ស្ថានភាពក្លិបធ្លាក់ដុនដាបដល់កម្រិតអស់សង្ឃឹមថ្មីមួយទៀត នៅពេលពួកគេត្រូវបានដកសិទ្ធិចេញពីប្រព័ន្ធលីគអាជីពប៉េរូ ហើយត្រូវបានធ្លាក់ទៅលេងនៅពានរង្វាន់ Copa Perú វិញ។
អាវថ្មីដ៏គួរឱ្យភ្ញាក់ផ្អើលរបស់ពួកគេ កើតចេញពីការព្យាយាមប្រមែប្រមូលមូលនិធិ បន្ទាប់ពីបញ្ហាហិរញ្ញវត្ថុដ៏ដុនដាប បង្ខំឱ្យក្លិបបែងចែកអាវប្រកួតពួកគេទៅជាប្រឡោះទុកផ្សាយពាណិជ្ជកម្មតូចៗចំនួន ១ ០០០ ប្រឡោះ និងចាប់ផ្តើមយុទ្ធនាការដែលហៅថា «អ្នកឧបត្ថម្ភ១ពាន់របស់ក្លិប Muni) កាលពីខែមករាដើមឆ្នាំនេះ។
អាជីវកម្មក្នុងស្រុកជាច្រើនបាននាំគ្នាទិញយកប្រឡោះផ្សាយពាណិជ្ជកម្មខ្នាតតូចទាំងនោះយ៉ាងលឿន ដោយក្នុង១ប្រឡោះមានតម្លៃ ៦០ ដុល្លារអាមេរិក ហើយការលក់ក្នុងគម្រោងពាណិជ្ជកម្មនេះបានលក់ដាច់គ្មានសល់ក្នុងរយៈពេលត្រឹមតែ ៣ ខែប៉ុណ្ណោះ។ អ្នកគាំទ្រថ្មីៗយ៉ាងច្រើនសន្ធឹកសន្ធាប់របស់ក្លិប រួមមានទាំងរោងចក្រផលិតស្រាទំពាំងបាយជូរ និងហាងលក់សត្វចិញ្ចឹមនៅក្បែរនោះ ដែលសុទ្ធសឹងតែចង់ជួយជ្រោមជ្រែងក្លិបដែលកំពុងជួបវិបត្តិនេះឱ្យរស់ឡើងវិញ។
ទោះបីជាទទួលបានចំណូលរយៈពេលខ្លី និងបង្កើតឱ្យមានការចាប់អារម្មណ៍ខ្លាំងពីប្រព័ន្ធផ្សព្វផ្សាយអន្តរជាតិជុំវិញឯកសណ្ឋានរបស់ពួកគេកាលពីពេលថ្មីៗនេះក្តី ក៏ក្រុមបានធ្លាក់ចេញពីការប្រកួតពានរង្វាន់ Copa Perú កាលពីចុងសប្តាហ៍មុនបាត់ទៅហើយ ហើយនេះក៏ជាការខកចិត្តយ៉ាងខ្លាំងបំផុត ចំពោះកិច្ចខិតខំប្រឹងប្រែងស្តារកេរ្តិ៍ឈ្មោះរបស់ពួកគេឡើងវិញ៕
ចែករំលែកព័តមាននេះ