ខេត្តប៉ៃលិន ៖ តាំងពីសម័យបុរាណរហូតមកដល់បច្ចុប្បន្ន គេសង្កេតឃើញថា ការប្រកបមុខរបរច្នៃត្បូង ធ្វើជាគ្រឿងអលង្ការលក់ របស់ប្រជាពលរដ្ឋមួយចំនួន រស់នៅក្នុងខេត្តប៉ៃលិន នៅតែបន្តមានដដែល ព្រោះខេត្តនេះ ជាតំបន់ដែលសំបូរទៅដោយត្បូងធម្មជាតិ ដែលមានតម្លៃខ្ពស់ ហើយល្បីល្បាញស្ទើរពាសពេញសកលលោក ។
ប្រភពព័ត៌មានបានឱ្យដឹងថា នាពេលបច្ចុប្បន្ននេះ សកម្មភាពជីកត្បូងជាលក្ខណៈអាជីព មិនមានទៀតនោះឡើយ នៅក្នុងខេត្តប៉ៃលិន ពោលគឺ មានតែសកម្មភាពប្រជាពលរដ្ឋរែងត្បូងបន្តិចបន្ទួច នៅតាមដងស្ទឹងបយ៉ាខា និងតាមដងស្ទឹងប៉ៃលិនតិចតួចប៉ុណ្ណោះ។ ក្រោយពេលពួកគាត់ទំនេរពីការងារស្រែចំការ ឬឱកាសសមស្របណាមួយនារដូវប្រាំង ដែលមានទឹករាក់សម្រាប់ពួកគាត់ប៉ុណ្ណោះ។ ទោះជាយ៉ាងណាក៏ដោយ គេសង្កេតឃើញមានប្រជាពលរដ្ឋប្រមាណជាង១០០នាក់ នៅទូទាំងខេត្តប៉ៃលិន កំពុងប្រកបរបរច្នៃត្បូងនេះ ដើម្បីចិញ្ចឹមជីវិតរស់នៅប្រចាំថ្ងៃ ។
បើតាមប្រភពព័ត៌មានពីលោក វាសនា ជាកុងសែទិញ និងលក់ត្បូង រស់នៅក្នុងក្រុងប៉ៃលិន បានរៀបរាប់ឱ្យដឹងថា គ្រាប់ត្បូងជាច្រើន គឺបានបន្សល់ទុកនៅតាំងពីពេលមុនមកម្លេះ ហើយត្បូងមួយចំនួនទៀត ត្រូវបានទិញចូលមកពីបណ្តាខេត្តនានាដូចជា ខេត្តកំពង់ធំ ខេត្តព្រះវិហារ ខេត្តតាកែវ និងខេត្តរតនគិរីជាដើម ហើយក៏ត្រូវបានយកមកកែច្នៃនៅក្នុងខេត្តប៉ៃលិន ។
លោក វាសនា បានបន្តទៀតថា គ្រាប់ត្បូងកែច្នៃរួច គឺមានអតិថិជនកម្មង់ទិញត្បូង ដោយអ្នកខ្លះមកពីបណ្តាខេត្តនានា រហូតដល់រាជធានីភ្នំពេញ និងអ្នកខ្លះទៀតជិះយន្តធ្វើដំណើរមកពីក្រៅប្រទេស ដូចជា ប្រទេសចិន វៀតណាម និងប្រទេសអឺរ៉ុបមួយចំនួនដែរ ។
លោកបញ្ជាក់ថា ការប្រកបមុខរបរច្នៃត្បូងនេះ គឺជាដំណើរការដែលទាមទារឱ្យមានជំនាញ និងការយកចិត្តទុកដាក់ប្រិតប្រៀបខ្ពស់បំផុត ។ កម្មករស៊ីឈ្នួលច្នៃត្បូង នឹងធ្វើការកាត់ កែច្នៃ ដោយធ្វើយ៉ាងណាឱ្យរក្សាពន្លឺត្បូង ឬត្រូវការឡាំបៀរត្បូងសិន មុននឹងយកទៅច្នៃជាម៉ូដផ្សេងៗ ។
លោកបន្ថែមទៀតថា បើសិនជាត្បូងនោះ មានការបែកបន្តិចបន្ទួច និងមានពណ៌ ឬពន្លឺ មិនសូវល្អ ដើម្បីបង្កើតជាត្បូងស្រស់ស្អាត ដែលមានតម្លៃស្តង់ដា ។ ម្យ៉ាងវិញទៀត សកម្មភាពច្នៃត្បូង ភាគច្រើន គឺធ្វើឡើងនៅតាមផ្ទះ ឬរោងសិប្បកម្ម ដែលមានទីតាំងនៅក្នុងក្រុងប៉ៃលិន និងនៅស្រុកសាលាក្រៅ ខេត្តប៉ៃលិន ។ មុខរបរច្នៃត្បូងនេះ អាចរកបានប្រាក់ចំណូលសម្រាប់ផ្គត់ផ្គង់គ្រួសារដ៏ល្អមួយ ដោយមិនភ័យខ្លាចខ្វះមុខខ្វះក្រោយនោះទេ ឱ្យតែចេះច្នៃច្បាស់លាស់ ។ បើតាមការប៉ាន់ស្មានរបស់លោក អ្នកប្រកបរបរច្នៃត្បូង អាចរកបានប្រាក់ចំណូមចាប់ពី ៧០,០០០ រៀល ទៅដល់ ៨០,០០០ រៀល ឬលើសនេះ ក្នុងមួយថ្ងៃ ពោលគឺពឹងផ្អែកទៅលើជំនាញផ្ទាល់ខ្លួន និងប្រភេទត្បូង ឬបរិមាណការងារ ដែលខ្លួនទទួលពីថៅកែ ។
ចំណែកលោក ហូ ប្រកបរបរច្នៃត្បូងបានរៀបរាប់ឱ្យដឹងដែរថា គាត់បានធ្វើការស៊ីឈ្នួលច្នៃត្បូងអស់រយៈពេល៥ឆ្នាំមកហើយ ។
លោកបន្តទៀតថា ការច្នៃត្បូងនេះ មិនសូវមានការលំបាកប៉ុន្មានទេ ព្រោះជាជំនាញរបស់ខ្លួន តែក៏ត្រូវការភាពអត់ធ្មត់ និងការព្យាយាមខ្ពស់បំផុត ។ ហើយមុខរបរច្នៃត្បូងនៅខេត្តប៉ៃលិន គឺជាវិស័យសេដ្ឋកិច្ច និងជាវប្បធម៌ដ៏សំខាន់មួយតាំងពីយូរលង់ណាស់មកហើយ ពោលគឺតកូនតចៅ ។
លោកបន្ថែមទៀតថា មិនត្រឹមតែផ្តល់ប្រាក់ចំណូលដល់គ្រួសារប៉ុណ្ណោះទេ របរច្នៃត្បូងនេះ ថែមទាំងជម្រុញកិត្តិនាមរបស់ខេត្តប៉ៃលិន ក៏ដូចជាប្រទេសកម្ពុជា ក្នុងវិស័យត្បូងពិភពលោកថែមទៀតផង ។ ដូច្នេះហើយ មុខរបរច្នៃត្បូងនេះ អាចចូលរួមចំណែកយ៉ាងខ្លាំង ទៅលើការអភិវឌ្ឍសេដ្ឋកិច្ចគ្រួសារ និងសង្គមនៅក្នុងខេត្តប៉ៃលិន ដែលជាទឹកដីត្បូងពេជ្រផងដែរ ៕
ចែករំលែកព័តមាននេះ