ខេត្តប៉ៃលិន៖ ដោយអនុវត្តតាមបទបញ្ជារបស់លោកឧត្តមសេនីយ៍ត្រីឡី ចាន់ឆាយ ស្នងការនគរបាលខេត្ត និងលោកវរសេនីយ៍ឯក ជា ចាន់ឌិន ស្នងការរងនគរបាលខេត្តទទួលផែនកណ្តាលយុត្តិធម៌បានចាត់ឱ្យកម្លាំងក្រោមឱវាទចុះទៅបង្ក្រាបផ្ទះរកស៊ីផ្លូវភេទដែលជ្រកក្រោមស្លាកម៉ាស្សា-កោសជប់មួយកន្លែង និងរំដោះស្រ្តីរកស៊ីផ្លូវភេទបានចំនួន២នាក់ ហើយឃាត់ខ្លួន២នាក់ប្តីប្រពន្ធ ដែលជាម្ចាស់ទីតាំង ។ ហេតុការណ៍នេះ កើតឡើងកាលពីថ្ងៃទី៦ សីហា វេលាម៉ោង១រសៀល នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
តាមព័ត៌មានពីលោកអនុសេនីយ៍ឯកយិត ខន នាយរងការិយាល័យប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តបានឱ្យដឹងថា ២នាក់ប្តីប្រពន្ធដែលត្រូវឃាត់ខ្លួននោះឈ្មោះសួន សាឫទ្ធិ អាយុ៤៨ឆ្នាំ ជាប្តី និងប្រពន្ធឈ្មោះម៉ៅ សារ៉ន អាយុ៦០ឆ្នាំ ។ ការបង្ក្រាបនេះបានដឹកនាំដោយផ្ទាល់ពីលោកសេង គឹមឡាក់ ព្រះរាជអាជ្ញារងអមសាលាដំបូងខេត្ត។
លោកយិត ខន បានបន្តថា មុនពេលចុះបង្ក្រាបសមត្ថកិច្ចបានធ្វើការអប់រំពួកគេម្តងរួចមកហើយ ដោយឱ្យបញ្ឈប់អាជីវកម្មរកស៊ីផ្លូវភេទតទៅទៀត។ បន្ទាប់មកលោកបានប្រើប្រាស់កម្លាំងភ្នាក់ងារចុះទៅឃ្លាំមើលក៏ឃើញកន្លែងនោះលួចបើកធ្វើអាជីវកម្មផ្លូវភេទដោយខុសច្បាប់ដដែល ដោយមានដំណើរការអស់រយៈពេលមួយឆ្នាំមកហើយទើបឈានដល់ការបង្ក្រាបតែម្តង ។ ក្នុងប្រតិបត្តិការនោះកម្លាំងចាប់បានភស្តុតាងមានស្រោមអនាម័យប្រើរួចមួយចំនួននិងស្រោមមិនទាន់ប្រើចំនួនពីរទៀត ហើយរំដោះស្រ្តីរកស៊ីផ្លូវភេទបានពីរនាក់បញ្ជូនទៅអប់រំរួចឱ្យវិលត្រលប់ទៅកាន់លំនៅឋានវិញ ។
លោកជុំ សែនសទ្ធា ព្រះរាជអាជ្ញាអមសាលាដំបូងខេត្តមានប្រសាសន៍ថា ពីរនាក់ប្តីប្រពន្ធដែលត្រូវនគរបាលការិយាល័យប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តធ្វើការបង្ក្រាបនោះ ត្រូវបានចេញដីកាឃុំខ្លួននៅថ្ងៃទី៧ សីហា ដោយចោទប្រកាន់ពីបទផ្តល់កន្លែងសម្រាប់បើកពេស្យាចារ និងត្រូវបាននាំទៅឃុំខ្លួននៅពន្ធនាគារខេត្តជាបណ្តោះអាសន្នរងចាំការវិនិច្ឆ័យទោសតាមនីតិវិធី ៕
ចែករំលែកព័តមាននេះ