ក្រសួងបរិស្ថានចាត់មន្ត្រីជំនាញចុះពិនិត្យជុំវិញផលប៉ះពាល់ គ្រោះថ្នាក់កើតចេញពីអគ្គិភ័យឆេះរោងចក្រច្នៃថ្មពិលនៅខេត្តកំពង់ស្ពឺ
- កំពង់ស្ពឺ
ខេត្តកំពង់ស្ពឺ៖ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន បានបញ្ជាឱ្យក្រុមការងារជំនាញក្រសួងបរិស្ថានធ្វើការចុះត្រួតពិនិត្យជាបន្ទាន់ ករណីមានអគ្គិភ័យឆាបឆេះរោងចក្រកែច្នៃថ្មពិល ក្នុងភូមិទួលសំបូរ ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ។ គួររំលឹកថា គិតត្រឹមព្រឹកនេះ! ករណីឆេះរោងចក្រកែច្នៃលោហធាតុ នៅខេត្តកំពង់ស្ពឺ មិនទាន់រលត់ទាំងស្រុងនោះទេ នៅតែបន្តឆេះ និងឮសម្លេងផ្ទុះរប៉េះរបោះនៅឡើយ
បើយោងតាមផេកផ្លូវការរបស់ក្រសួងបរិស្ថានបង្ហោះថា ក្នុងថ្ងៃទី៣០ ខែកក្កដា ឆ្នាំ២០២៦នេះ មន្ត្រីជំនាញនឹងនាំយកឧបករណ៍តេស្តគុណភាពខ្យល់ និងត្រួតពិនិត្យសាធាតុគ្រោះថ្នាក់ទៅជាមួយ ដើម្បីត្រួតពិនិត្យនិងចាត់វិធានការទប់ស្កាត់ករណីមានការបំពុល ប៉ះពាល់ដល់បរិស្ថាននិងសុខភាពសាធារណៈ។
សូមបញ្ជាក់ផងដែរថា សេចក្តីរាយការណ៍បានបញ្ជូនមកក្រសួងបរិស្ថាន ករណីកើតឡើងភ្លើងឆេះរោងចក្រកែច្នៃលោហៈធាតុផ្សេងៗ ដូចជាថ្មពិលចាស់ៗ ឈ្មោះ ស៊ីនសេងសេង មេថល មេធីរៀល អុិនដាស្ទ្រៀល ផាក ឯ.ក ជាកម្មសិទ្ធិរបស់ជនជាតិចិន ឈ្មោះZHANG JINGCHUAN កាលពីវេលាម៉ោង១និង១០នាទី រសៀលថ្ងៃទី២៩ ខែកក្កដា ឆ្នាំ២០២៦ នៅក្នុងភូមិទួលសំបូរ ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ។ នេះបើយោងតាមសេចក្តីរាយការណ៍ពីអាជ្ញាធរមូលដ្ឋាន រហូតមកទល់ពេលនេះ ផ្សែងនៅបន្តហុយចេញពីទីតាំងរោងចក្រ។
ចំពោះមូលហេតុ ដែលនាំឱ្យឆាបឆេះសណ្ធោរសន្ធៅបណ្ដាលមកពីការឆ្លងចរន្ដអគ្គីសនី ចេញពីទូរក្លាសេថ្មពិល។ នេះបើតាមការបញ្ជាក់របស់ស្នងការដ្ឋាននគរបាលខេត្តកំពង់ស្ពឺ លើទំព័រហ្វេសប៊ុកផ្លូវការ។
តាមប្រភពដដែល ហេតុការណ៍នេះ បណ្ដាលឱ្យខូចខាតឃ្លាំង ទំហំ ៤០ម៉ែត្រ គុណនិង១០០ម៉ែត្រ រងការខូចខាតទាំងស្រុង ខូចខាតផលិតសម្រេចទាំងអស់ និងឆេះគ្រឿងចក្រសម្រាប់លើកអីវ៉ាន់២គ្រឿង ម៉ូតូចំនួន២គ្រឿង និងសម្ភារ: មួយចំនួនច្រើនថែមទៀតផង៕
ចែករំលែកព័តមាននេះ