មិនឃើញប្ដីក្រោករៀបចំខ្លួនទៅធ្វើការ ប្រពន្ធស្រែកហៅនិងចាប់អង្រួន ទើបដឹងថាស្លា.ប់
- ភ្នំពេញ
រាជធានីភ្នំពេញ៖ បុរសជាកម្មកររោងចក្រម្នាក់ ជិតដល់ម៉ោងធ្វើការហើយនៅដេកមិនព្រមក្រោក ដើម្បីរៀបចំខ្លួនទៅធ្វើការទៀត បន្ទាប់ពីបានឃើញប្ដីដេកយូរខុសប្លែកពីរាល់ថ្ងៃ ប្រពន្ធក៏បានចាប់អង្រួនដាស់ឲ្យក្រោក ។ ខណៈនោះស្រាប់តែនាងស្រឡាំងកាំងស្ទើរតែគាំងបេះដូង ព្រោះឃើញប្ដីស្លាប់ប្ដីទន់ដូចបបរបាត់ទៅហើយ ប៉ុន្តែនាងមិនអស់ចិត្តថាប្ដីស្លាប់នោះឡើយ ដោយសារតែខ្លួនប្រាណប្ដីនៅទន់និងក្ដៅនៅឡើយ ។ ពេលនោះនាងប្រពន្ធក៏បានសង្កត់ទ្រូងប្ដីធ្វើចលនាបេះដូងជាការសង្គ្រោះបឋម ប៉ុន្តែទោះបីជានាងខំប្រឹងយ៉ាងណាដោយ ក៏មិនអាចជួយសង្គ្រោះប្ដីដែលស្លាប់ទៅហើយនោះឲ្យរស់ឡើងវិញបានទេ ។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៦ព្រឹកថ្ងៃទី៣០ ខែកក្កដា ឆ្នាំ២០២៦ នៅក្នុងបន្ទប់ជាន់ទី១ នៃផ្ទះជួលមួយកន្លែង ដែលមានទីតាំងស្ថិតនៅក្នុងភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
បុរសខាងលើឈ្មោះខេន សុខា (KEN SOKHA) អាយុ៤៣ឆ្នាំ មុខរបរកម្មកររោងចក្រ មានស្រុកកំណើតនៅខេត្តបន្ទាយមានជ័យ ។ ចំណែកមានប្រពន្ធឈ្មោះ នាង ពុន អាយុ៣៤ឆ្នាំ មុខរបរកម្មករិនីរោងចក្រកាត់ដេរ មានទីលំនៅភូមិក្រសាំងជ្រុំត្បូង ឃុំសំព្រោជ ស្រុកស្ទោង ខេត្តកំពង់ធំ សព្វថ្ងៃអ្នកទាំង២ស្នាក់នៅបន្ទប់ជួលកើតហេតុខាងលើ ។
ស្ត្រីជាប្រពន្ធបាននិយាយថា នាងនិងប្ដីបានធ្វើការនៅក្នុងរោងចក្រតែមួយជាមួយគ្នា ហើយកាលពីថ្ងៃទី២៩ ខែកក្កដា ឆ្នាំ២០២៦ ប្ដីនាងធ្វើការតែពេលព្រឹកកន្លះថ្ងៃប៉ុណ្ណោះ ដោយសុំច្បាប់ប្រធានឈប់កន្លះថ្ងៃ ប៉ុន្តែនាងមិនបានដឹងថា ហេតុអ្វីទើបប្ដីសុំច្បាប់ឈប់កន្លះថ្ងៃនោះទេ ។ ចំណែករូបនាងបានធ្វើការថែមម៉ោងដល់ម៉ោង១០យប់ទើបចេញ ពេលនោះប្ដីក៏បានទៅដឹកនាងត្រលប់មកបន្ទប់ជួលវិញ បន្ទាប់មកបានហូបបាយជុំគ្នាជាធម្មតា ហើយប្ដីនាងបានផឹកស្រាបៀរអស់១កំប៉ុង រួចទើបនាំគ្នាដេក ។
ស្ត្រីរូបនោះបាននិយាយបន្តថា រហូតដល់វេលាម៉ោង៦ព្រឹកថ្ងៃទី៣០ ខែកក្កដា មិនឃើញប្ដីក្រោកដើម្បីរៀបចំខ្លួនទៅធ្វើការ នាងក៏បានស្រែកហៅនិងចាប់អង្រួនដាស់ប្ដីឲ្យក្រោក ប៉ុន្តែប្ដីអត់ឆ្លើយហើយខ្លួនប្រាណទន់ដូចស្លាប់បាត់ទៅហើយ ។ ខណៈនោះដោយសារតែតែខ្លួនប្រាណប្ដីនៅក្ដៅ និងទន់នៅឡើយ ទើបធ្វើឲ្យនាងមិនអស់ចិត្តថាប្ដីស្លាប់ទេ ក៏បានសង្កត់ទ្រូងប្ដីធ្វើចលនាសង្គ្រោះបឋម ប៉ុន្តែទោះជានាងខំប្រឹងយ៉ាណា ក៏មិនអាចសង្គ្រោះប្ដីដែលស្លាប់ទៅហើយនោះឲ្យរស់ឡើងវិញបានដែរ ។
នគរបាលបានប្រាប់ថា ក្រោយពីទទួលបានដំណឹងថាមានមនុស្សដេកស្លាប់បែបនេះ កម្លាំងនគរបាលប៉ុស្តិ៍កន្ទោកនិងនគរបាលខណ្ឌកំបូល បានចុះទៅកាន់ទីនោះ ។ បន្ទាប់មករាយការណ៍ជូនកម្លាំងការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការពិនិត្យកោសល្យវិច័យ ។ ក្រោយពេលធ្វើការពិនិត្យរួចរាល់ នគរបាលបានបញ្ជាក់ប្រាប់ថា បុរសនោះស្លាប់ដោយជំងឺគាំងបេះដូង រួចប្រគល់សពជូនក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ