រាជធានីភ្នំពេញ ៖ ជនជួញដូរគ្រឿងញៀនចំនួន៥នាក់ត្រូវប៉ូលិសនៃអធិការដ្ឋានខណ្ឌដង្កោ ដឹកនាំដោយលោកអធិការ ប៊ន សំអាត ចាប់ខ្លួនបាននៅកន្លែង២ផ្សេងគ្នា ព្រមទាំងដកហូតថ្នាំញៀនមួយចំនួន។ សកម្មភាពចាប់ក្រុមជួញដូរគ្រឿងញៀននោះ លើកទី១ចាប់បាន២នាក់ កាលពីវេលាម៉ោង១និង៥នាទីរសៀល ថ្ងៃទី១៨ ខែមីនា ឆ្នាំ២០១១ នៅចំណុចជាប់របងសណ្ឋាគារភ្នំពេញ សង្កាត់ស្រះចក ខណ្ឌដូនពេញ រាជធានីភ្នំពេញ។ ក្នុងការបង្ក្រាបការជួញដូរ និងចែកចាយគ្រឿងញៀននោះ កម្លាំងប៉ូលិសខណ្ឌដង្កោបានសហការជាមួយកម្លាំងប៉ូលិសខណ្ឌដូនពេញ និងព្រះរាជអាជ្ញាសាលាដំបូងរាជធានីភ្នំពេញ។
ជនសង្ស័យទាំង២នាក់ដែលត្រូវចាប់ខ្លួននោះ ម្នាក់ឈ្មោះយ៉ាន សុភ័ក្ក្រ ភេទប្រុស អាយុ២៣ឆ្នាំ មានទីលំនៅក្នុងភូមិ១ សង្កាត់ជ្រោយចង្វា ខណ្ឌប្ញស្សីកែវ និងម្នាក់ទៀតឈ្មោះញ៉ឹក ចាន់សុថៃ ភេទប្រុស អាយុ២៨ឆ្នាំ រស់ទីលំនៅផ្ទះលេខ២៣A ផ្លូវលេខ៩៣ ក្រុមទី៧៧ សង្កាត់ស្រះចក ខណ្ឌដូនពេញ។ ក្នុងពេលចាប់ខ្លួននោះ សមត្ថកិច្ចដកហូតបានថ្នាំញៀនគ្រាប់ពណ៌ផ្កាឈូក មានអក្សរ WY ចំនួន៩គ្រាប់ ម៉ូតូម៉ាក Citi C100 កូរ៉េ ពណ៌ក្រហម ពាក់ស្លាកលេខព្រៃវែង 1A-1929 ម្សៅក្រាមពណ៌ស១០កញ្ចប់ ម្សៅម៉ដ្ឋពណ៌ស១កញ្ចប់តូច និងឧបករណ៍សម្រាប់ជក់១សំរាប់។
សមត្ថកិច្ចឱ្យដឹងថា ការចាប់ជនសង្ស័យទាំងនោះ ព្រមទាំងដកហូតបានវត្ថុតាង គឺតាមរយៈការស្រាវជ្រាវស៊ើបអង្កេត ក្រោមការដឹកនាំដោយលោកអធិការ ប៊ន សំអាត។ វត្ថុតាង និងជនទាំង២នាក់នោះបានបញ្ជូនទៅកាន់ផ្នែកព្រហ្មទណ្ឌខណ្ឌដើម្បីកសាងសំណុំរឿងបញ្ជូនទៅតុលាការ។ ដោយឡែកការបង្ក្រាបលើកទី២ ធ្វើឡើងកាលពីវេលាម៉ោង៩និង៣០នាទីព្រឹក ថ្ងៃទី១៩ មីនា នៅផ្ទះលេខ១៥ ក្រុមទី១ ភូមិថ្មគោលទី១ សង្កាត់ចោមចៅ ខណ្ឌដង្កោ។ ក្នុងខណៈនោះកម្លាំងប៉ូលិសប៉ុស្តិ៍ចោមចៅ ក្រោមការដឹកនាំរបស់លោកអធិការ ប៊ន សំអាត បានឃាត់ខ្លួនជនសង្ស័យប្រុស២នាក់ និងស្ត្រីម្នាក់ ព្រមទាំងដកហូតបានថ្នាំញៀនមេតំហ្វេតាមីនប្រភេទម៉ាកទឹកកក១កញ្ចប់ និងថ្នាំញៀនមេតំហ្វេតាមីនប្រភេទយ៉ាម៉ា១គ្រាប់ ដែលជនទាំងនោះកំពុងចែកចាយ។
ជនសង្ស័យដែលត្រូវចាប់ខ្លួន ១-ឈ្មោះជា ងួន ភេទប្រុស អាយុ៣០ឆ្នាំ រស់នៅស្រុកសំរោង ខេត្តតាកែវ, ២-ញ៉ែម ស្រីយុត ភេទស្រី អាយុ៣៤ឆ្នាំ មានស្រុកកំណើតនៅភូមិប៉ាក់ខ្លង ឃុំប៉ាក់ខ្លង ស្រុកស្រែកអំបិល ខេត្តកោះកុង និង៣-ឈ្មោះម៉ក់ ស៊ីម៉ន រស់នៅសង្កាត់ទួលទំពូង ខណ្ឌចំការមន រាជធានីភ្នំពេញ សព្វថ្ងៃស្នាក់នៅផ្ទះជួលក្នុងភូមិកើតហេតុ។ ប៉ូលិសនិយាយថា នៅពេលសមត្ថកិច្ចចេញល្បាតពួនស្ទាក់បទល្មើសនានា មានប្រជាពលរដ្ឋរាយការណ៍ថា មានជនសង្ស័យកំពុងចែកចាយថ្នាំញៀន។ ភ្លាមនោះកម្លាំងប៉ូលិសបានទៅឃាត់ខ្លួនជនសង្ស័យបាន៣នាក់ ឯម្នាក់ទៀតគេចខ្លួនបាត់។ ជនសង្ស័យទាំងនោះត្រូវបានបញ្ជូនទៅកាន់ផ្នែកព្រហ្មទណ្ឌខណ្ឌដង្កោ ដើម្បីកសាងសំណុំរឿងបញ្ជូនទៅតុលាការ៕
ចែករំលែកព័តមាននេះ