កីឡាករម៉ូតូស្ព័រឆ្នើមកម្ពុជាឈឹម ពិសិដ្ឋ ត្រៀមចូលរួមប្រកួតព្រឹត្តិការណ៍អន្តរជាតិនៅម៉ាឡេស៊ី
- ភ្នំពេញ
រាជធានីភ្នំពេញ ៖ សហព័ន្ធកីឡាយានយន្តកម្ពុជា បានបង្ហាញការគាំទ្រយ៉ាងពេញទំហឹង ចំពោះការប្ដេជ្ញាចិត្ត និងឆន្ទះដ៏មោះមុតរបស់កីឡាករប្រណាំងម៉ូតូឆ្នើមកម្ពុជាឈឹម ពិសិដ្ឋក្នុងការចូលរួមព្រឹត្តិការណ៍ប្រណាំងម៉ូតូវាលរាប ថ្នាក់អន្តរជាតិធំជាងគេរបស់ប្រទេសម៉ាឡេស៊ី(Malaysia Superbike Champion)ជុំទី៣ ឆ្នាំ២០២៦ ដែលនឹងប្រព្រឹត្តទៅចាប់ពីថ្ងៃទី១ ដល់ថ្ងៃទី២ ខែសីហា ឆ្នាំ២០២៦ ។
កីឡាករ ឈឹម ពិសិដ្ឋ បានឱ្យដឹងកាលពីថ្ងៃទី២៥ ខែកក្កដា ថា ការប្រកួតលើកនេះ ខុសសព្វដងដែលខ្លួនបានទៅចូលរួមប្រកួតលើកមុនៗគឺជាការប្រកួតប្រណាំងកម្រិតខ្ពស់ដែលមានកម្លាំងម៉ូតូ1000cc ទន្ទឹមគណៈកម្មការបានវាយតម្លៃគុណផលកីឡាករកម្ពុជា ធ្លាប់ធ្វើបានល្អលើម៉ូតូដែលមានកម្លាំង600ccកាលពីឆ្នាំមុន។
ការដំឡើងកម្លាំងម៉ូតូកម្រិតខ្ពស់បែបនេះ គឺជាបទពិសោធន៍ថ្មីមួយ ហើយព្រឹត្តិការណ៍ដែលប្រជុំដោយកំពូលអ្នកប្រណាំងម៉ូតូខ្លាំងប្រចាំប្រទេសម៉ាឡេស៊ី និងកីឡាករអាជីពមកពីក្នុងទ្វីបលើកនេះ គឺជាឧបសគ្គដ៏ធំមួយដែលជំរុញឱ្យលោកផ្ដោតលើការខិតខំប្រឹងប្រែងកាន់តែខ្លាំង ជាពិសេសការប្រើប្រាស់បច្ចេកទេសដោយប្រុងប្រយ័ត្នបំផុត ដើម្បីឈានទៅសម្រេចគោលដៅ និងឆន្ទះរបស់ខ្លួនក្នុងការថែរក្សាគម្លាតពីគូប្រជែងមិនឱ្យដាច់ឆ្ងាយពេក ទោះបីកន្លងមកខ្លួនមិនសូវមានឱកាសហាត់ហ្វឹកហ្វឺនលើទីលានស្តង់ដាអន្តរជាតិក្ដី។
សមាជិកក្លិបMekong motorcycle Clubដដែលបានសង្កត់ធ្ងន់ថា ការចូលរួមនេះគឺជាមោទនភាពមួយក្នុងនាមជាកីឡាករតំណាងជាតិ ដោយសាររាល់ការបង្ហាញវត្តមានក្នុងព្រឹត្តិការណ៍អន្តរជាតិម្ដងៗ តែងតែធ្វើឱ្យបណ្ដាប្រទេសចូលរួមជាច្រើនមានការភ្ញាក់ផ្អើលថា កម្ពុជាក៏មានកីឡាករប្រណាំងម៉ូតូSuperbikeចូលរួមដែរ។នេះគឺជាកម្លាំងចិត្តមួយដែលធ្វើឱ្យលោកខិតខំហ្វឹកហាត់ដើម្បីមានឱកាសបានចូលរួមប្រកួត។
លោក ខៃ វណ្ណៈ អគ្គលេខាធិការសហព័ន្ធកីឡាយានយន្តកម្ពុជាបានបង្ហាញនូវការគាំទ្រយ៉ាងពេញទំហឹង ទោះបីបានដឹងពីកម្រិតសមត្ថភាពកីឡាករកម្ពុជា ។ ចំពោះការតាំងចិត្តមិនធ្វើឱ្យមានគម្លាតឆ្ងាយពីគូប្រជែងខ្លាំងពេក ជាពិសេសជាមួយគូប្រជែងខ្លាំងៗដែលបានមកចូលរួមក្នុងព្រឹត្តិការណ៍កម្រិតអន្តរជាតិដ៏ធំមួយនេះវាមិនមែនជារឿងធម្មតានោះឡើយ ។ លោកសង្ឃឹមថា កីឡាករ ឈឹម ពិសិដ្ឋ អាចធ្វើបាន និងទទួលបានលើសពីបទពិសោធន៍ក្នុងការបោះជំហានថ្មីឈានទៅប្រកួតប្រជែងកម្រិតអន្តរជាតិបន្ទាប់ទៅថ្ងៃអនាគត ៕
ចែករំលែកព័តមាននេះ