រាជធានីភ្នំពេញ ៖ កាលពីរសៀលថ្ងៃទី៨ ខែសីហា នៅសាលាខណ្ឌដូនពេញត្រូវបានរៀបចំធ្វើការវាយកម្ទេចទូហ្គេមចំនួន៣៦ទូ ដោយមានការចូលរួមពីលោកសុខ សម្បត្តិ អភិបាលខណ្ឌ និងអភិបាលរងមេនគរបាល មេប៉េអឹម លោកគឹម វុត្ថា ប្រធានផ្នែកសណ្តាប់ធ្នាប់ ព្រមទាំងចៅសង្កាត់មេប៉ុស្តិ៍រដ្ឋបាលទាំង១១ចូលរួម។
លោកគឹម វុត្ថា ប្រធានផ្នែកសណ្តាប់ធ្នាប់ខណ្ឌដូនពេញ បានឲ្យដឹងថា យោងតាមការចង្អុលបង្ហាញពីលោកអភិបាលខណ្ឌបានឲ្យកម្លាំងសមត្ថកិច្ចតែងតែឃ្លំមើលការបើកល្បែងស៊ីសងគ្រប់ប្រភេទដែលមាននៅក្នុងភូមិសាស្រ្តខណ្ឌដូនពេញ ជាក់ស្តែងនៅក្នុងខែកក្កដា ឆ្នាំ២០១១ កន្លងមកនេះ កម្លាំងសមត្ថកិច្ចចំរុះដឹកនាំដោយលោកយស់ យុទ្ធី អភិបាលរង លោកហែម ឫទ្ធី នាយករងរដ្ឋបាលខណ្ឌបានចុះបង្រ្កាបទីតាំងលួចលាក់បើកហ្គេមប្រភេទល្បែងស៊ីសងនៅក្នុងសង្កាត់ស្រះចក និងសង្កាត់ផ្សារថ្មីទី៣ ជាលទ្ធផលដកហូតទូហ្គេមបានចំនួន៣៦ទូ។ នៅរសៀលថ្ងៃទី៨ ខែសីហា ឆ្នាំ២០១១ តាមការឯកភាពពីលោកអភិបាលខណ្ឌ និងការចូលរួមពីលោកអភិបាលរងផងដែរនោះ កម្លំាងសមត្ថកិច្ចបានធ្វើការវាយកម្ទេចចោលទូហ្គេមទាំងនោះនៅមុខមហាជន ដើម្បីជាការព្រមានដល់អ្នកដែលបន្តលួចបើកហ្គេមប្រភេទល្បែងស៊ីសង។ ក្នុងឱកាសនោះដែរ លោកអភិបាលបានរំលឹកដល់កម្លាំងផ្នែកសណ្តាប់ធ្នាប់ខណ្ឌឲ្យបន្តការរៀបចំសណ្តាប់ធ្នាប់លើចិញ្ចើមផ្លូវទូទាំងខណ្ឌដែលប្រជាពលរដ្ឋខ្លះយកចិញ្ចើមផ្លូវដាក់តាំងទំនិញលក់យ៉ាងអនាធិបតេយ្យ ជាពិសេសណែនាំម្ចាស់ផ្ទះឱ្យទុកប្រវែងពីរម៉ែត្រពីមុខផ្ទះរបស់ខ្លួនសំរាប់អ្នកថ្មើរជើង ។
សាលាខណ្ឌដូនពេញ នឹងបន្តការបង្រ្កាបទីតាំងបើកល្បែងសុីសងឲ្យដូចភ្លៀងរលឹមស្របតាមគោលនយោបាយភូមិ-សង្កាត់មានសុវត្ថិភាព៕
ចែករំលែកព័តមាននេះ