ក្រចេះ៖ បង្ក្រាបទីតាំងរុករករ៉ែមាសខុសច្បាប់១កន្លែង ក្នុងតំបន់ព្រៃឡង់ ខណៈជនសង្ស័យរត់គេចខ្លួនបាត់
- ក្រចេះ
ខេត្តក្រចេះ ៖ ក្រោយទទួលបានសេចក្តីរាយការណ៍ភ្លាមៗពីបណ្តាញសារព័ត៌មាន មន្ទីរបរិស្ថានខេត្តក្រចេះ បានបើកប្រតិបត្តិការចុះបង្ក្រាប និងទប់ស្កាត់សកម្មភាពរុករករ៉ែមាសដោយខុសច្បាប់ ស្ថិតក្នុងដែនជម្រកសត្វព្រៃព្រៃឡង់ ។ ប្រតិបត្តិការនេះ បានធ្វើឡើងកាលពីថ្ងៃទី១៦ ខែកក្កដា ឆ្នាំ២០២៦ ដឹកនាំផ្ទាល់ដោយលោក គា ប៊ូប្រធាន មន្ទីរបរិស្ថានខេត្តក្រចេះ ។
ជាលទ្ធផលនៃកិច្ចប្រតិបត្តិការ បន្ទាប់ពីបានធ្វើការរុករក និងធ្វើដំណើរទៅដល់ចំណុច គោលដៅត្រង់ចំណុចថ្មពួយ (និយាមកា 572899-1429880) ស្ថិតក្នុងឃុំកំពង់ចាម ស្រុកសំបូរ ខេត្តក្រចេះ (តំបន់ជើងភ្នំជី ជាប់ព្រំប្រទល់ខេត្តក្រចេះ និងខេត្តកំពង់ធំ) ។
យោងតាមការអោយដឹងថា ប្រតិបត្តិការនោះក្រុមការងារបានរកឃើញស្លាកស្នាមជីកកាយ និងខួងរុករករ៉ែមាសចំនួន០១កន្លែង ។ រោងស្នាក់នៅប្រក់តង់កៅស៊ូ ចំនួន០១ខ្នង ។
ទាក់ទិនករណីខាងលើនេះ នៅពេលកម្លាំងសមត្ថកិច្ចទៅដល់ក្រុមជនសង្ស័យបានរត់គេចខ្លួនបាត់ស្រមោល ដោយបន្សល់ទុកតែសម្ភារ និងរោងស្នាក់នៅ ។ ក្រោយសកម្មភាពប្រតិបត្តិការកម្លាំងឧទ្យានុរក្សបានសម្រេចរុះរើ និងដុតបំផ្លាញចោលវត្ថុតាងទាំងនោះភ្លាមៗនៅនឹងកន្លែង ។
ជាមួយគ្នានេះ លោកប្រធានមន្ទីរបរិស្ថានខេត្តក្រចេះបានសង្កត់ធ្ងន់ថា ទោះបីជាក្រុមជនល្មើសបានរត់គេចខ្លួនជាបណ្តោះអាសន្នក៏ដោយ លោកបានដាក់បញ្ជាយ៉ាងម៉ឺងម៉ាត់ដល់កម្លាំងមន្ត្រីឧទ្យានុរក្សទាំងអស់ឱ្យបន្តការស្រាវជ្រាវ និងបង្កើនការចុះល្បាត ដើម្បីទប់ស្កាត់ និងបង្ក្រាបបទល្មើសធនធានធម្មជាតិគ្រប់រូបភាពឱ្យបាន ១០០% នៅក្នុងដែនសមត្ថកិច្ច។
បច្ចុប្បន្ន មន្ទីរបរិស្ថានខេត្តក្រចេះ កំពុងបន្តសហការយ៉ាងជិតស្និទ្ធជាមួយអាជ្ញាធរពាក់ព័ន្ធ ដើម្បីក្តាប់ព័ត៌មាន និងកំណត់មុខសញ្ញាជនល្មើស ក្នុងគោលបំណងនាំខ្លួនមកផ្តន្ទាទោសតាមច្បាប់ជាធរមាន និងធានាថា ដែនជម្រកសត្វព្រៃព្រៃឡង់ ត្រូវបានការពារយ៉ាងម៉ត់ចត់បំផុត ៕
ចែករំលែកព័តមាននេះ