ប្រធានាធិបតីយេម៉ែន លោកអាលី អាប់ដាល់ឡាហ៍ សាឡេហ៍ បានស្នើកាលពីថ្ងៃទី១០ មីនា ពីការតាក់តែងរដ្ឋធម្មនុញ្ញថ្មីមួយដែលធានាឯករាជភាពរបស់សភា និងរបស់តុលាការ ក៏ប៉ុន្តែបាតុករជាច្រើនពាន់នាក់ដែលមានកំហឹងនៅតែបន្តហែក្បួនតាមដងវិថីដើម្បីទាមទារការចាកចេញពីអំណាចរបស់លោក។
បណ្តាមេដឹកនាំប្រឆាំងបានបដិសេធសំណើនេះរបស់ប្រធានាធិបតីយេម៉ែនដោយអំពាវនាវឱ្យមានបាតុកម្មធំៗនាថ្ងៃទី១១ មីនា ១ខែក្រោយចាប់ផ្តើមចលនាតវ៉មកា។
ក្នុងស្តាតមួយនៃទីក្រុងសាណា រដ្ឋធានីយេម៉ែន មុខអ្នកគាំទ្រលោកជាច្រើនពាន់នាក់ លោកអាលីអាប់ដាល់ឡាហ៍ សាឡេហ៍ ដែលកាន់អំណាចចាប់តាំងពី៣២ឆ្នាំមកហើយសន្យាថា រដ្ឋធម្មនុញ្ញថ្មីនឹងតាក់តែងចាប់ពីពេលនេះទៅរហូតដល់ដំណាច់ឆ្នាំ ហើយនឹងធានាដល់ការចែកគ្នាដាច់រវាងរដ្ឋអំណាចនីតិបញ្ញត្តិ និងនីតិប្រតិបត្តិ។ ប្រធានាធិបតីយេម៉ែនក៏សន្យាផងដែរពីការបោះឆ្នោតសភា និងការបង្កើតរដ្ឋាភិបាលថ្មីមួយរហូតដល់ដើមឆ្នាំ២០១២។ លោកបន្តថា លោកបានចេញបញ្ជាដល់រដ្ឋាភិបាលឱ្យឆ្លើយតបតាមការទាមទាររបស់ពួកយុវជនដែលបោះជំរំតវ៉ានៅក្រុងសាណា អាដេន និងតាអេស ហើយស្នើឱ្យពួកគេចាកចេញ។ ក្រោយសុន្ទរកថានេះ របស់ប្រធានាធិបតីបន្តិច មនុស្សប្រមាណជា៤.០០០នាក់ ពិសេសពួកនិស្សិតបាននាំគ្នាហែក្បួនបាតុកម្មនៅតាមដងវិថីក្រុងសាណាទាមទារឱ្យលោកចាកចេញពីអំណាច។ បាតុកម្មមួយទៀតកើតមានក្នុងរដ្ឋធានីដែរចូលរួមដោយគ្រូពេទ្យ បុគ្គលិកពេទ្យ និងបណ្តានិស្សិតពេទ្យមកពីទូទាំងប្រទេសដែលបរិហារការបង្ក្រាបរបស់កងទ័ពប្រឆាំងពួកបាតុករដែលប្រមូលផ្តុំគ្នានៅសាកលវិទ្យាល័យក្រុងសាណាដែលកាលណោះកងទាំហានបានបាញ់គ្រាប់ពិតបណ្តាលឱ្យមនុស្សម្នាក់ស្លាប់ និងជាច្រើននាក់ត្រូវរបួសនាសប្តាហ៍នេះ៕
ចែករំលែកព័តមាននេះ