រាជធានីភ្នំពេញ ៖ ប្រាសាទតាមាន់ធំ ស្ថិតក្នុងទឹកដីកម្ពុជា បើយោងតាមផែនទីមាត្រដ្ឋាន ១/២០០ ០០០ និងកំណត់ហេតុ (PV) បោះបង្គោលរបស់គណៈកម្មការឥណ្ឌូចិន-សៀម ឆ្នាំ១៩០៨ និង១៩១៩ និងយោងតាមផែនទី L7017 មាត្រដ្ឋាន១/៥០ ០០០ ដែលថៃគូសដោយឯកតោភាគី ។ នេះបើតាមការលើកឡើងរបស់លោកបណ្ឌិត គី សេរីវឌ្ឍន៍អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ។
លោកបណ្ឌិតបានសរសេរលើបណ្តាញសង្គម នៅថ្ងៃទី៩ ខែកក្កដា ឆ្នាំ២០២៦ថា ថៃបានចូលកាន់កាប់ប្រាសាទតាមាន់ធំ និងទីតាំងផ្សេងទៀតរបស់កម្ពុជា ដោយកម្លាំងយោធា និងខុសច្បាប់ ដោយមានចេតនាផ្លាស់ប្តូរបន្ទាត់ព្រំដែនដោយឯកតោភាគី ។
លោកបណ្ឌិតថា ករណីប្រាសាទតាមាន់ធំ ផ្ទាល់ដែលយោធាថៃ កំពុងកាន់កាប់ដោយខុសច្បាប់នេះដាច់ខាត គឺស្ថិតនៅលើអធិបតេយ្យដែនដីកម្ពុជាយ៉ាងប្រាកដ ៖
ទី១- ដោយផ្អែកលើផែនទីផែនទី បារាំង-សៀម មាត្រដ្ឋាន ១/២០០ ០០០ និងកំណត់ហេតុ (PV) បោះបង្គោលរបស់គណៈកម្មការឥណ្ឌូចិន-សៀម ឆ្នាំ១៩០៨ និង១៩១៩ និងយោងតាមផែនទី L7017 មាត្រដ្ឋាន១/៥០ ០០០ ដែលថៃគូសដោយឯកតោភាគី ។
ទី២- ហើយម្យ៉ាងទៀត ប្រសិនបើយើងសិក្សាពីប្រវត្តិសាស្ត្រនិងបុរាណវិទ្យា ក៏បានបញ្ជាក់យ៉ាងច្បាស់ថា ជនជាតិសៀម គ្មានកំណើតសង់ប្រាសាទទាំងនោះទេ ។
ទី៣- ថៃ ឈប់កុហកពលរដ្ឋខ្លួនឯង និងឈប់កុហកអន្តរជាតិបន្តទៀត ជាពិសេសUNSC ។ UNSCមិនអាចកែប្រែច្បាប់ស្តីពីព្រំដែនមិនកែប្រែ (Uti Possidetis) បានតាមថៃបាននោះទេ ។
មន្ត្រីរដ្ឋលេខាធិការដ្ឋានកិច្ចការព្រំដែន បានលើកឡើងថា ប្រាសាទតាមាន់ធំស្ថិ តក្នុងទឹកដីកម្ពុជាបើយោងតាមផែនទីមាត្រដ្ឋាន ១/២០០ ០០០ និងកំណត់ហេតុ (PV) បោះបង្គោលរបស់គណៈកម្មការឥណ្ឌូចិន-សៀម ឆ្នាំ១៩០៨ និង ១៩១៩ និងយោងតាមផែនទី L7017 មាត្រដ្ឋាន ១/៥០ ០០០ ដែលថៃគូសដោយឯកតោភាគី ។
រដ្ឋលេខាធិការដ្ឋានកិច្ចការព្រំដែនបន្ថែមថា គ្មានបុគ្គល ស្ថាប័ន អង្គការ ឬអង្គភាពណាមួយ មិនថា កម្ពុជា និងថៃ ដែលយល់ច្បាស់ខ្សែបន្ទាត់ព្រំដែន និងទីតាំងបង្គោលព្រំដែនជាងគណៈកម្មការ JBC និងក្រុមការងារបច្ចេកទេសវាស់វែងចម្រុះនោះទេ ហើយដែលមានសមត្ថកិច្ចក្នុងការផ្ទៀងផ្ទាត់ និងបញ្ជាក់ច្បាស់ពីខ្សែបន្ទាត់ព្រំដែនអន្តរជាតិកម្ពុជា-ថៃ និងទីតាំងបង្គោលព្រំដែនពិតប្រាកដសម័យអាណានិគមបារាំងនៅលើដីជាក់ស្តែង ។
ប្រភពបានអះអាងថា ថៃកំពុងបំភ័ន្តមតិសាធារណៈ និងបំភ័ន្តប្រជាពលរដ្ឋថៃខ្លួនឯង តាមរយៈសកម្មភាពខុសច្បាប់នៅតាមបណ្តាប្រាសាទក្នុងដែនអធិប តេយ្យភាពកម្ពុជា ដែលខ្លួនបានកាន់កាប់ដោយខុសច្បាប់ ប៉ុន្តែមិនអាចបំភ័ន្តច្បាប់អន្តរជាតិបាននោះទេ! សម្រាប់ជាទិដ្ឋភាពផ្លូវច្បាប់ ប្រាសាទទាំងនេះ គឺជារបស់កម្ពុជា និងស្ថិតក្នុងដែនអធិបតេយ្យកម្ពុជា ។
ជាមួយគ្នានោះដែរJBC ភាគីកម្ពុជា បានផ្ញើកំណត់ទូតជាច្រើនទៅកាន់ JBC ភាគីថៃ ដើម្បីចាត់បញ្ជូនក្រុមវាស់វែងចម្រុះឱ្យចុះបន្តការងារវាស់វែងលើដីជាក់ស្តែង ប៉ុន្តែយើងមិនបានទទួលការឆ្លើយតបជាវិជ្ជមាន ដោយថៃរកលេសរហូត ដែលផ្ទុយនឹងកឋាខណ្ឌទី៣ នៃសេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥ ដែលបញ្ជាក់ថា «កម្ពុជា និងថៃ ត្រូវបញ្ជូនក្រុមវាស់វែងចម្រុះចុះលើដីជាក់ស្តែង ដើម្បីបន្តការងាររបស់ខ្លួនឱ្យបានឆាប់បំផុត»៕
ចែករំលែកព័តមាននេះ