ចៀសមិនផុត ! អ្នកបើកបរខ្វះសីលធម៌នៅតាកែវ ត្រូវសមត្ថកិច្ចកោះហៅចូលខ្លួនដោះស្រាយតាមច្បាប់
- តាកែវ
ខេត្តតាកែវ ៖ កម្លាំងជំនាញនៃស្នងការដ្ឋាននគរបាលខេត្តតាកែវ បានបើកការស្រាវជ្រាវ និងឈានទៅដល់ការកោះហៅអ្នកបើកបររថយន្តល្មើសច្បាប់ចរាចរណ៍ និងខ្វះសីលធម៌ម្នាក់ ឱ្យចូលខ្លួនមកដោះស្រាយហើយ ។
ជាក់ស្តែងស្នងការដ្ឋាននគរបាលខេត្តតាកែវ បានប្រកាសនាថ្ងៃទី៨ ខែកក្កដានេះថា ៖ ចំណាត់ការក្តៅនេះ ធ្វើឡើងបន្ទាប់ពីទទួលបានបទបញ្ជាដ៏ម៉ឺងម៉ាត់ និងខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក្នុងគោលបំណងរឹតបន្តឹងច្បាប់ចរាចរណ៍ផ្លូវគោក និងលើកកម្ពស់សីលធម៌ក្នុងការបើកបរតាមដងផ្លូវសាធារណៈ ។
ក្រោយពីបានឃើញការបង្ហោះ ឬការរាយការណ៍អំពីសកម្មភាពបើកបរដោយខ្វះការប្រុងប្រយ័ត្ន និងខ្វះសីលធម៌ ដែលបង្កការរំខាន ឬអាចគ្រោះថ្នាក់ដល់អ្នកដំណើរដទៃ កម្លាំងសមត្ថកិច្ចជំនាញចរាចរណ៍ បានធ្វើការស្រាវជ្រាវភ្លាមៗ រហូតកំណត់អត្តសញ្ញាណ និងឈានដល់ការកោះហៅតៃកុងរថយន្តរូបនោះ ឱ្យចូលខ្លួនមកកាន់ស្នងការដ្ឋាននគរបាលខេត្តមកធ្វើការអប់រំ និងធ្វើកិច្ចសន្យា ។
ជាចុងក្រោយ សូមអំពាវនាវយ៉ាងទទូចដល់បងប្អូនប្រជាពលរដ្ឋ ជាពិសេសអ្នកបើកបររថយន្តគ្រប់ប្រភេទ មេត្តាបើកបរដោយការទទួលខុសត្រូវខ្ពស់ ព្រោះការបើកបរខ្វះសីលធម៌ និងល្មើសច្បាប់ មិនត្រឹមតែប្រឈមមុខនឹងចំណាត់ការច្បាប់ប៉ុណ្ណោះទេ ប៉ុន្តែវាអាចបង្កជាសោកនាដកម្មដល់អាយុជីវិត និងទ្រព្យសម្បត្តិរបស់អ្នកដទៃផងដែរ ៕
ចែករំលែកព័តមាននេះ