ឃាត់ខ្លួនជនជាតិវៀតណាម ៥នាក់សង្ស័យជាប់ពាក់ព័ន្ធបទល្មើសឆបោ.កតាមប្រព័ន្ធបច្ចេកវិទ្យាក្នុងប្រតិបត្តិការឆែកឆេរ៨៨ ទីតាំង
- ភ្នំពេញ
រាជធានីភ្នំពេញ ៖ ជនវៀតណាមចំនួន ៥នាក់ត្រូវបានកម្លាំងគណៈបញ្ជាការឯកភាពរដ្ឋបាលរាជធានីភ្នំពេញ ឃាត់ខ្លួននៅក្នុងប្រតិបត្តិការត្រួតពិនិត្យឆែកឆេរ តាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារចំនួន៨៨ទីតាំង។ការឃាត់ខ្លួនជនជាតិវៀតណាមនេះព្រមទាំងដកហូតសម្ភារៈមួយចំនួនដោយ សង្ស័យជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា។
តាមរដ្ឋបាលរាជធានីភ្នំពេញបានឱ្យដឹងថា នៅថ្ងៃទី៨ ខែកក្កដា ឆ្នាំ២០២៦ គណៈបញ្ជាការឯកភាពរដ្ឋបាលរាជធានីភ្នំពេញ បានដឹកនាំគណៈបញ្ជាការឯកភាពរដ្ឋបាលខណ្ឌទាំង១៤ ធ្វើការត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួន ក្នុងគោលដៅ បោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ។
ក្នុងកិច្ចប្រតិបត្តិការនេះកម្លាំងសមត្ថកិច្ចចម្រុះ បានត្រួតពិនិត្យឆែកឆេរសរុបចំនួន៨៨ទីតាំង រកឃើញជនបរទេសស្នាក់នៅសរុបចំនួន ២៥២នាក់ (ស្រី ៨៤នាក់) មានលិខិតឆ្លងដែនត្រឹមត្រូវ។
ក្នុងនោះក្រុមការងារបានចុះពិនិត្យនៅខុដូរ R&F អគារ A-5 ជាន់ទី២៧ បន្ទប់លេខ ២៧០៨ ស្ថិតនៅផ្លូវ 60ម៉ែត្រ ភូមិព្រែកតាគង់ទី១ សង្កាត់ចាក់អង្រែលើ ដោយបានរកឃើញជនបរទេសស្នាក់នៅចំនួន០៥នាក់ ជាជនជាតិវៀតណាម និងសម្ភារពាក់ព័ន្ធមួយចំនួន។ តាមការសន្និដ្ឋានបឋមសង្ស័យជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា។
ក្រោយបញ្ចប់ប្រតិបត្តិការ ជនសង្ស័យត្រូវបានឃាត់ខ្លួន និងដកហូត សម្ភារៈ បញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីតាមផ្លូវច្បាប់ និងបានបិទឃ្លុំ បន្ទប់នោះបណ្តោះអាសន្ន៕
ចែករំលែកព័តមាននេះ