ទីក្រុងអង់ការ៉ា៖ លោកដូណាល់ត្រាំធ្វើឱ្យថ្នាក់ដឹកនាំរដ្ឋជាសមាជិកអង្គការណាតូភ្ញាក់ផ្អើលមិនតិចឡើយនៅឯកិច្ចប្រជុំកំពូលដែលរៀបចំនៅទីក្រុងអង់ការ៉ា ប្រទេសតួកគី។ លោកថាអាមេរិកត្រូវតែកាត់ផ្ដាច់ទំនាក់ទំនងពាណិជ្ជកម្មជាមួយអេស្ប៉ាញ ហើយលោកទាមទារជាថ្មីនូវកោះហ្គ្រីនលែន។ ដូច្នេះ ភាពតានតឹងចាប់ផ្ដើមកើតឡើងជាថ្មីរវាងអាមេរិក និងដាណឺម៉ាកដែលជាអ្នកមើលខុសត្រូវលើកោះនេះ។ ត្រាំចាត់ទុកអេស្ប៉ាញជាដៃគូដ៏អាក្រក់បំផុតនៅក្នុងអង្គការណាតូ។ លោកថ្លែងដូច្នេះជាផ្នែកមួយនៃយុទ្ធនាការវាយប្រហារក្រុមសម្ព័ន្ធមិត្តដែលមិនព្រមជួយជ្រោមជ្រែងអាមេរិកនៅក្នុងសង្គ្រាមអ៊ីរ៉ង់។ លោកបញ្ជាឱ្យរដ្ឋមន្ត្រីក្រសួងរតនាគារអាមេរិកផ្អាកសកម្មភាពពាណិជ្ជកម្មទាំងស្រុងជាមួយអេស្ប៉ាញ។
លោកថ្លែងដូចខាងលើនេះទន្ទឹមនឹងការចេញសេចក្ដីប្រកាសនៅក្នុងព្រឹត្តិការណ៍ដាច់ដោយឡែកមួយទៀតពាក់ព័ន្ធនឹងអ៊ីរ៉ង់។ លោកថាកិច្ចព្រមព្រៀងបណ្ដោះអាសន្ន ឬអនុស្សារណៈយោគយល់គ្នារវាងអាមេរិក និងអ៊ីរ៉ង់បានឈានដល់ទីបញ្ចប់ហើយ។ ពាក្យសម្ដីរបស់លោកជាផ្ទាំងពពកខ្មៅតាមរំខានសេចក្ដីសង្ឃឹមរបស់ថ្នាក់ដឹកនាំអឺរ៉ុបដែលចង់យកវេទិកាជួបជុំគ្នាលើកនេះដើម្បីធ្វើឱ្យមានឯកភាពផ្ទៃក្នុង, ការបន្តគាំទ្រប្រទេសអ៊ុយក្រែន និងការដោះស្រាយបញ្ហាខ្វែងគំនិតគ្នានៅក្នុងអង្គការណាតូ។
លោកត្រាំប្រកាសនៅក្នុងអង្គប្រជុំណាតូថាបើបន្តទាក់ទងជាមួយអេស្ប៉ាញទៀតនាំឱ្យខ្ជះខ្ជាយពេលវេលាឥតប្រយោជន៍។ យើងមិនត្រូវការធ្វើពាណិជ្ជកម្មជាមួយអេស្ប៉ាញតទៅទៀតទេ។ ដូច្នេះ លោកចង់កាត់ផ្ដាច់ទំនាក់ទំនងនេះចោលតែម្ដង។ អេស្ប៉ាញជាដៃគូដ៏អាក្រក់នៅក្នុងអង្គការណាតូ។ ពួកគេមិនចូលរួមជាមួយយើង (អាមេរិក) ទេ, ពួកគេមិនព្រមបង់ថ្លៃវិភាគទានទេ។ លោកលែងចង់រវីរវល់ជាមួយអេស្ប៉ាញតទៅទៀតហើយ។ លោកបញ្ជាឱ្យកាត់ផ្ដាច់រាល់ទំនាក់ទំនងពាណិជ្ជកម្មគ្រប់យ៉ាង រួមទាំងដំណើរទស្សនកិច្ចផ្សេងៗផងដែរ។
លោកត្រាំថ្លែងដូច្នេះនៅចំពោះមុខអគ្គលេខាធិការអង្គការណាតូ លោកម៉ាករូតថឺ (Mark Rutte) ដែលតែងតែព្យាយាមនិយាយសម្របសម្រួលមិនឱ្យលោកត្រាំព្រួយបារម្ភខ្លាំងពេកពាក់ព័ន្ធនឹងខ្ទង់ចំណាយលើវិស័យការពារជាតិនៅក្នុងអង្គការនេះ រួមទាំងបញ្ហាអ៊ីរ៉ង់ និងកោះហ្គ្រីនលែន។ ប្រភពដែលបានដឹងកិច្ចការផ្ទៃក្នុងច្បាស់បានបង្ហើបឱ្យដឹងថាលោកត្រាំនិយាយដូចខាងលើនេះតែម្ដងប៉ុណ្ណោះ ហើយលោកលែងនិយាយរឿងនេះតទៅទៀតនៅក្នុងកិច្ចប្រជុំបិទទ្វារ។ មិនតែប៉ុណ្ណោះ លោកចង់បន្តរួមរស់ជាមួយអង្គការណាតូជាបន្តទៀត។ លោកថាយើងចង់ស្ថិតនៅជាមួយអ្នក (នៅក្នុងអង្គការណាតូ) ។
អាមេរិក និងអេស្ប៉ាញមានបញ្ហារកាំរកូសនឹងគ្នាមិនមែនទើបតែពេលនេះទេ ប៉ុន្តែចាប់តាំងពីនាយករដ្ឋមន្ត្រីអេស្ប៉ាញថ្មី លោកសានឆេស ឡើងមកកាន់អំណាច។ អេស្ប៉ាញជំទាស់នឹងត្រាំដែលទាមទារឱ្យអឺរ៉ុបបង្កើនខ្ទង់ចំណាយលើវិស័យការពារជាតិដើម្បីកាត់បន្ថយការពឹងផ្អែកទៅលើអាមេរិក។ មិនតែប៉ុណ្ណោះ អេស្ប៉ាញមិនអនុញ្ញាតឱ្យយោធាអាមេរិកប្រើប្រាស់ដែនអាកាសរបស់ខ្លួន ឬមូលដ្ឋានរបស់ខ្លួនដើម្បីវាយប្រហារអ៊ីរ៉ង់ទេ។ ប្រតិកម្មចំពោះពាក្យសម្ដីរបស់ត្រាំថ្ងៃនេះ ខុទ្ទកាល័យរបស់លោកប៉េដ្រូ សាន់ឆេស ចាត់ទុកថានោះជារឿងធម្មតាតែប៉ុណ្ណោះ គ្មានអ្វីប្លែកទេ ទំនាក់ទំនងពាណិជ្ជកម្មធ្វើឱ្យចំណេញប្រទេសទាំងសងខាង៕ ប្រភព៖ Reuters
ចែករំលែកព័តមាននេះ