ទីក្រុងគូឡាឡាំពួ ៖ ប្រទេសម៉ាឡេស៊ីបានកំណត់គោលដៅកាត់បន្ថយការពឹងផ្អែកលើការនាំចូលស្បៀងអាហារឱ្យបាន ៥០% ត្រឹមឆ្នាំ២០៥០ ដែលជាផ្នែកមួយនៃកិច្ចខិតខំប្រឹងប្រែងពង្រឹងសន្តិសុខស្បៀងជាតិ។
ឧបនាយករដ្ឋមន្ត្រី និងជារដ្ឋមន្ត្រីក្រសួងអភិវឌ្ឍន៍ជនបទ និងតំបន់របស់ម៉ាឡេស៊ី លោក Ahmad Zahid Hamidi បានថ្លែងកាលពីថ្ងៃទី៤ ខែកក្កដា កន្លងទៅ ថា គោលដៅនេះត្រូវបានបង្កើតឡើង ចំពេលការចំណាយលើការនាំចូលស្បៀងអាហារប្រចាំឆ្នាំរបស់ប្រទេសម៉ាឡេស៊ី បានកើនឡើងដល់ប្រមាណ ២០ ពាន់លានដុល្លារអាមេរិក។
បើតាមលោករដ្ឋមន្ត្រី ផែនការនេះ កំពុងតែត្រូវបានអនុវត្តជាដំណាក់កាលៗ ដោយមានគោលដៅបណ្តោះអាសន្នគឺកាត់បន្ថយឱ្យបាន ១៥% ត្រឹមឆ្នាំ ២០៣០ និងច្រើនជាង ៣០% ត្រឹមឆ្នាំ២០៤០ មុនឈានទៅសម្រេចគោលដៅចុងក្រោយត្រឹមឆ្នាំ២០៥០។ លោកបានបន្តថា យុទ្ធសាស្ត្រនេះ នឹងផ្តោតលើការទាញយកផលប្រយោជន៍ពីដីធ្លីដែលមិនទាន់ប្រើអស់លទ្ធភាព និងដីទំនេរ ដែលជាកម្មសិទ្ធិរបស់ទីភ្នាក់ងារនានាក្រោមឱវាទក្រសួង ដោយបំប្លែងទៅជាតំបន់ផលិតកម្មកសិកម្ម និងការចិញ្ចឹមសត្វ។
លោកក៏បានគូសបញ្ជាក់ថា កម្មវិធីសន្តិសុខស្បៀងនេះ បាននិងកំពុងអនុវត្តនៅក្នុងរយៈពេល៣ឆ្នាំកន្លងមកនេះ ហើយបានរួមចំណែករួចរាល់ក្នុងការរក្សាស្ថិរភាពថ្លៃ ជាពិសេសតាមរយៈគម្រោងផលិតកម្មមាន់សាច់ និងស៊ុត។ លោកបានសង្កត់ធ្ងន់ទៀតថា គំនិតផ្តួចផ្តើមនេះ មិនមែនបង្កើតឡើងក្នុងបំណងប្រកួតប្រជែងជាមួយផលិតករពាណិជ្ជកម្មនោះទេ ប៉ុន្តែគឺដើម្បីធានាឱ្យមានការផ្គត់ផ្គង់គ្រប់គ្រាន់ក្នុងទីផ្សារក្នុងស្រុក និងកាត់បន្ថយការប្រែប្រួលថ្លៃផងដែរ៕ ប្រភព ៖ VNA
ចែករំលែកព័តមាននេះ