ខេត្តបាត់ដំបង ៖ នារសៀលថ្ងៃទី៦ សីហា នៅទីស្នាក់ការគណបក្សប្រជាជនស្រុកសង្កែបានរៀបចំពិធីផ្សព្វផ្សាយសន្និបាតគណៈកម្មាធិការកណ្តាលលើកទី៣៦ អាណត្តិទី៥ ក្រោមអធិបតីភាពលោកឡោក ហ៊ួរ នាយករងទី១ខុទ្ទកាល័យសម្តេចអគ្គមហាធម្មពោធិសាល ជា ស៊ីមនិងជាប្រធានក្រុមការងារចុះជួយស្រុកសង្កែដែលមានការអញ្ជើញចូលរួមពីប្រធាន អនុប្រធានក្រុមការងារចុះជួយស្រុក ឃុំ ប្រធាន អនុប្រធានគណៈកម្មាធិការបក្សស្រុក សមាជិក សមាជិកាបក្សឃុំ សាខាបក្សភូមិ ក្រុមប្រឹក្សាបក្សឃុំដែលមានចំនួនទាំងអស់១៨២នាក់។
លោកសួន សាវ៉េត ប្រធានគណៈកម្មាធិការបក្សស្រុកសង្កែមានប្រសាសន៍ថា លទ្ធផលការងារគណបក្សប្រជាជនកម្ពុជាអនុវត្តរួចបាន៣ជំហាននៃការធ្វើ បច្ចុប្បន្នភាពសមាជិកបក្ស និងគ្រប់គ្រងសមាជិកបក្ស ហើយកំពុងអនុវត្តបញ្ចប់នូវជំហានទី៤ក្នុងខែសីហា គឺអំពីរចនាសម្ព័ន្ធគណបក្សដែលមានគណៈកម្មាធិការបក្សចំនួន១១ គណៈកម្មាធិការបក្ស សាខាបក្សមាន៨៣សាខា ក្នុងនោះសាខាភូមិមាន៦៥សាខា ក្រុមបក្សមានចំនួន៥.៦៣៣ក្រុម ដែលមានសមាជិកបក្សសរុបចនួន៤២.៩៩៦នាក់ ស្រី២៣.១៩៨នាក់។ ដោយឡែកសមាជិកក្រុមប្រឹក្សាឃុំនៃគណបក្សប្រជាជនកម្ពុជាធានាថា នឹងទៅបោះឆ្នោតឱ្យបាន១០០%មិនមានបញ្ហាអ្វីទេ។
លោកឡោក ហ៊ួរ បានអានរបាយការណ៍របស់សម្តេចអគ្គមហាសេនាបតីតេជោ ហ៊ុន សែន ស្តីពីសភាពការណ៍ និងការងារគណបក្សឆ្នាំ២០១០ ដើមឆ្នាំ២០១១ និងទិសដៅភារកិច្ចចុងឆ្នាំ២០១១ និងឆ្នាំ២០១២ ។ លោកក៏បានបន្តជំរាបជូនលទ្ធផលសំខាន់ៗដែលសន្និបាតសម្រេចបាននៅក្នុងតួនាទីជាអ្នកដឹកនាំ ការពារអភិវឌ្ឍប្រទេស គឺធានាបានសុវត្ថិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ការពារបូរណភាពទឹកដី និងជំរុញឱ្យតុលាការអន្តរជាតិក្រុងឡាអេបកស្រាយសាលក្រមកាត់ក្តីរឿងប្រាសាទព្រះវិហារបង្ហាញដល់មជ្ឈដ្ឋានជាតិ និងអន្តរជាតិ។ ពីមួយឆ្នាំទៅមួយឆ្នាំការពង្រឹងសេដ្ឋកិច្ច វិស័យដាំដុះ ប្រព័ន្ធធារាសាស្ត្រទូទាំងប្រទេសធានាសុវត្ថិភាព សន្តិសុខស្បៀង ជីវភាពរបស់ប្រជាពលរដ្ឋត្រូវបានលើកកំពស់គួបផ្សំនឹងការងារបន្តបន្ទាប់នៅតាមរោងចក្រ សហគ្រាសធំៗក្នុងតំបន់សេដ្ឋកិច្ចពិសេសនានាទូទាំងប្រទេស៕
ចែករំលែកព័តមាននេះ