ឆ្លើយតបនឹងការឈ្លានពានរបស់ថៃ៖ អាជីវករនៅបន្ទាយមានជ័យ នាំគ្នាធ្វើពហិការឈប់លក់ផលិតផលថៃ ហើយងាកមកគាំទ្រទំនិញក្នុងស្រុក
- បន្ទាយមានជ័យ
ខេត្តបន្ទាយមានជ័យ ៖ អាជ្ញាធរក្រុងប៉ោយប៉ែត និងមន្ត្រីចម្រុះ បានចុះពិនិត្យឃ្លាំង២កន្លែងហើយ សម្រេចបិទទ្វារ១ន្លែងជាបណ្តោះអាសន្ន ពាក់ព័ន្ធគ្មានឯកសារបង់ពន្ធ តែគ្មានទំនិញ ឬសាច់បង្កកនាំចូលពីស្រុកថៃឡើយ នៅក្រុងប៉ោយប៉ែត ។
លោក អែល ប៊ុនថន នាយករដ្ឋបាលក្រុងប៉ោយប៉ែត បានប្រាប់ថា កាលពីថ្ងៃទី១៥ ខែមិថុនា ឆ្នាំ២០២៦ លោក គាត ហ៊ុល អភិបាលក្រុងប៉ោយប៉ែត និងមានការសម្របសម្រួលពីលោក សំរិទ្ធ សុខុន ព្រះរាជអាជ្ញារងអយ្យការអមសាលាដំបូងខេត្ត បានដឹកនាំមន្ត្រីជំនាញចុះពិនិត្យឃ្លាំង២កន្លែងរកសាច់ក្លាស្សេ ឬសាច់បង្កក និងទំនិញផ្សេងៗដែលលួចនាំចូលពីប្រទេសថៃដែលជាទំនិញហាមឃាត់ ។
នៅពេលពិនិត្យឃ្លាំងចំនួន២កន្លែង គឺឃ្លាំង១ស្ថិតក្នុងភូមិប៉ាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត រកមិនឃើញមានទំនិញហាមឃាត់ឡើយ និងបានឱ្យធ្វើអាជីវកម្មជាធម្មតា ។ ចំណែកឃ្លាំងទី២ នៅភូមិផ្សារកណ្ដាល សង្កាត់ផ្សារកណ្តាល ក្រុងប៉ោយប៉ែត មន្ត្រីជំនាញពិនិត្យរកឃើញសាច់ក្លាស្សេ ឬសាច់បង្កក និងទំនិញផ្សេង ជាទំនិញដែលនាំចូលពីប្រទេសផ្សេងក្រៅពីថៃ ។
ប៉ុន្តែឃើញមានទំនិញមួយចំនួនគ្មានឯកសារបង់ពន្ធនាំចូល ទើបមន្ត្រីគយ និងរដ្ឋាករបិទទ្វារជាបណ្តោះអាសន្ន រង់ចាំម្ចាស់ឃ្លាំងយកឯកសារមកបង្ហាញគ្រប់គ្រាន់ ទើបអនុញ្ញាត្តិឱ្យបើកធ្វើអាជីវកម្មវិញ ។លោក អែល ប៊ុនថន បានបញ្ជាក់ថា នៅថ្ងៃទី១៦ មិថុនា ឆ្នាំ២០២៦ លោក គាត ហ៊ុល អភិបាលក្រុងប៉ោយប៉ែត ក្នុងនាមប្រធានគណៈបញ្ជាការឯកភាពក្រុង បានដឹកនាំមន្ត្រីជំនាញចុះពិនិត្យទំនិញនៅផ្សារត្រី កណ្តាលក្រុងប៉ោយប៉ែតឃើញថា អាជីវករដែលលក់ដូរក្នុងផ្សារបាននាំគ្នាធ្វើពហិការ ឈប់លក់ទំនិញថៃហើយអាជ្ញាធរក្រុង និងមន្ត្រីជំនាញ បានណែនាំដល់អាជីវករត្រូវបញ្ឈប់សកម្មភាពលក់ទំនិញថៃ ត្រូវលក់ទំនិញក្នុងស្រុក ជួយដល់ប្រជាពលរដ្ឋ និងប្រទេសជាតិ ។ នេះមិនមែនជាការរើសអើងនោះទេ តែវាជាការឆ្លើយតបទៅនឹងការឈ្លានពានរបស់ថៃ ។
ដោយឡែក នៅក្រុងសិរីសោភ័ណវិញ ក៏មិនខុសពីក្រុងប៉ោយប៉ែតនោះទេ លោក ស្រេង សុផល អភិបាលក្រុងសិរីសោភ័ណបានប្រាប់ថា តាមការណែនាំពីសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ក្រោយភាគីថៃបានបិទច្រកទ្វារព្រំដែនដោយឯកតោភាគី នៅពេលមានជម្លោះព្រំដែនកម្ពុជា-ថៃ និងទាហានថៃបានរំលោភបំពានលើអធិបតេយ្យភាពកម្ពុជា ព្រមទាំងបាញ់ប្រជាពលរដ្ឋស្លូតត្រង់ ហើយព័ទ្ធលួសបន្លា និងដាក់ទូកុងតឺន័រហ៊ុមព័ទ្ធយកលំនៅឋាន និងទ្រព្យសម្បត្តិប្រជាពលរដ្ឋកម្ពុជា បានធ្វើឱ្យប្រជាពលរដ្ឋទូទាំងប្រទេសកម្ពុជាមានការឈឺចាប់ បាននាំគ្នាធ្វើពហិការមិនប្រើប្រាស់ទំនិញរបស់ថៃឡើយ ។
លោកអភិបាលបានបញ្ជាក់ថា តាមការណែនាំពីឯកឧត្តម អ៊ុំ រាត្រី អភិបាលខេត្ត អាជ្ញាធរក្រុងសិរីសោភ័ណ បានសហការជាមួយមន្ត្រីពាណិជ្ជកម្មខេត្ត និងមន្ត្រី ក.ប.ប សាខាខេត្តបន្ទាយមានជ័យ បានចុះពិនិត្យទំនិញនៅផ្សារសិរីសោភ័ណ ផ្សារចំការគ ឬផ្សារថ្មី តាមឃ្លាំង និងម៉ាត រកឃើញមានទំនិញថៃ នៅមានការដាក់លក់តាមទីផ្សារនៅឡើយ និងបានណែនាំដល់អាជីវករបញ្ឈប់សកម្មភាពលក់សាច់បង្កក ដែលប៉ះពាល់សុខភាពអ្នកប្រើប្រាស់ និងផលិតផលផ្សេងៗរបស់ថៃ ។
លោក ស្រេង សុផល បានបញ្ជាក់ថា ក្រោមការណែនាំដល់អាជីវករឱ្យបញ្ឈប់សកម្មភាពលក់ទំនិញរបស់ថៃ និងក្រោយលក់ទំនិញដែលនៅសេសសល់អស់ គឺត្រូវបញ្ឈប់ ហើយនាំគ្នាយកទំនិញក្នុងស្រុកមកលក់វិញ ដើម្បីលើកកម្ពស់ផលិតផលក្នុងស្រុកឱ្យមានទីផ្សារ ជួយដល់ប្រជាកសិករ ។
យើងទាំងអស់គ្នាត្រូវធ្វើពហិការបញ្ឈប់ការលក់ទំនិញថៃលើទឹកដីកម្ពុជា ហើយបើមានទំនិញថៃដែលនាំចូល ដូចជាសាច់បង្កកខូចគុណភាព និងទំនិញផ្សេងៗ បើឃើញត្រូវរាយការណ៍ជូនអាជ្ញាធរមានសមត្ថកិច្ច ដើម្បីមានចំណាត់ការតាមច្បាប់ ៕
ចែករំលែកព័តមាននេះ