អន្តរជាតិ ៖ តម្លៃប្រេងឆៅអន្តរជាតិបានបន្តចុះរហូតក្រោម ៨០ ដុល្លារអាមេរិកក្នុង១បារ៉ែលជាលើកដំបូង ចាប់តាំងពីដើមខែមីនា ឆ្នាំ២០២៦ ដោយសារទីផ្សារកាន់តែមានទំនុកចិត្តថា ការបិទច្រកសមុទ្រហ័រមូស (Hormuz) ជិតដល់ទីបញ្ចប់ហើយ ដែលនឹងបើកផ្លូវពេញលេញឱ្យមានការងើបឡើងវិញនូវការផ្គត់ផ្គង់ថាមពលពីតំបន់នាំចេញប្រេងដ៏សំខាន់បំផុតមួយរបស់ពិភពលោក។
តម្លៃប្រេងឆៅ Brent ស្តង់ដាពិភពលោកបានជួញដូរនៅក្នុងតម្លៃ ៧៨ ដុល្លារក្នុង១បារ៉ែល គិតត្រឹមម៉ោង ១២ ថ្ងៃត្រង់ថ្ងៃទី១៧ ខែមិថុនា ឆ្នាំ២០២៦ (ម៉ោងនៅកម្ពុជា) ស្របពេលដែលប្រេងឆៅ WTI របស់សហរដ្ឋអាមេរិក មានតម្លៃត្រឹម ៧៥ ដុល្លារក្នុង១បារ៉ែល នៅក្នុងពេលជាមួយគ្នា។
ការផ្លូវដឹកជញ្ជូនតាមច្រកសមុទ្រហ័រមូសត្រូវបានបិទទាំងស្រុង ចាប់តាំងពីសង្គ្រាមនៅអ៊ីរ៉ង់បានចាប់ផ្តើមនៅថ្ងៃទី២៨ ខែកុម្ភៈ ឆ្នាំ២០២៦ ដែលបានរុញតម្លៃប្រេងឆៅ Brent ឱ្យហក់ឡើងជិត ១២០ដុល្លារក្នុង១បារ៉ែល ហើយជាលទ្ធផលបានធ្វើឱ្យតម្លៃទំនិញឡើងថ្លៃនៅទូទាំងសកលលោក។ ទោះយ៉ាងណា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានថ្លែងកាលពីថ្ងៃចន្ទថា ច្រកសមុទ្រនេះនឹងត្រូវបើកដំណើរការឡើងវិញពេញលេញនៅថ្ងៃសុក្រសប្តាហ៍នេះតែម្តង និងដំណើរការដោយគ្មានការគិតថ្លៃឆ្លងកាត់នោះទេ។
យោងតាមរបាយការណ៍ចុងក្រោយពី Bloomberg បានឱ្យដឹងថា នាវាដឹកប្រេងខ្នាតយក្ស Suezmax ១គ្រឿង ដែលដើមឡើយបានធ្វើដំណើរទៅកាន់ប្រទេសហ្គាបុង (Gabon) ឥឡូវនេះកំពុងផ្តល់សញ្ញាថា គោលដៅថ្មីគឺកំពង់ផែ Fujairah របស់ប្រទេសអេមីរ៉ាតអារ៉ាប់រួមដែលនៅក្រៅច្រកសមុទ្រហ័រមូស។ ចំណែកកប៉ាល់ដឹកប្រេងខ្នាតយក្ស១គ្រឿងទៀត ដែលដើមឡើយធ្វើដំណើរទៅកាន់ប្រទេសអាហ្វ្រិកខាងត្បូង ប៉ុន្តែឥឡូវនេះក៏កំពុងផ្តល់សញ្ញាថា គោលដៅគឺកំពង់ផែ Fujairah ដូចគ្នាដែរ។
ព័ត៌មានស្តីពីកិច្ចព្រមព្រៀងសន្តិភាពដែលជិតលេចចេញជារូបរាងរវាងសហរដ្ឋអាមេរិក និងអ៊ីរ៉ង់ បានធ្វើឱ្យតម្លៃប្រេងធ្លាក់ចុះយ៉ាងខ្លាំងកាលពីដើមសប្តាហ៍នេះ ប៉ុន្តែភាពមិនច្បាស់លាស់អំពីវឌ្ឍនភាពជាក់ស្តែង និងកាលវិភាគសម្រាប់ការវិលត្រឡប់ទៅរកភាពប្រក្រតីវិញ នៃលំហូរបណ្តាកប៉ាល់ដឹកប្រេងតាមច្រកហ័រមូសនោះ នៅតែបន្តដាក់សម្ពាធលើតម្លៃប្រេងឡើងវិញ។ ទោះយ៉ាងណាក៏ដោយ របាយការណ៍ចុងក្រោយពីសកម្មភាពរបស់បណ្តាកប៉ាល់ដឹកប្រេង និងកប៉ាល់ដឹកឧស្ម័នធម្មជាតិរាវ (LNG) បានបង្ហាញពីក្តីសង្ឃឹមយ៉ាងមុតមាំនៅក្នុងឧស្សាហកម្មមួយនេះ។
ទន្ទឹមនឹងនេះដែរ ម្ចាស់ក្រុមហ៊ុន និងប្រតិបត្តិករកប៉ាល់ដឹកប្រេងនៅតែស្ថិតនៅក្នុងការប្រុងប្រយ័ត្ន នឹងរង់ចាំរហូតដល់ពួកគេបានឃើញកិច្ចព្រមព្រៀងជាក់ស្តែង និងការធានាសុវត្ថិភាព មុនពេលវិលត្រឡប់ទៅកាន់ចំណុចនៃផ្លូវទឹកដឹកជញ្ជូនប្រេង និងឧស្ម័នដ៏សំខាន់របស់ពិភពលោកនេះឡើងវិញ។ នេះបើតាមសម្តីលោក Jotaro Tamura នាយកប្រតិបត្តិក្រុមហ៊ុន Mitsui OSK Lines ដែលជាប្រតិបត្តិករកប៉ាល់ដឹកប្រេងធំបំផុតមួយនៅលើពិភពលោក បានប្រាប់កាសែត Financial Times កាលពីពេលថ្មីៗនេះ៕ ប្រភព ៖ AP, Reuters, Bloomberg, Financial Times និងប្រភពផ្សេងទៀត
ចែករំលែកព័តមាននេះ