អាជ្ញាធរឱ្យសិប្បកម្មផលិតជីសរីរាង្គ «ជុងហេង» ប្ដូរទីតាំងថ្មី និងផ្ដល់សំណងជូនពលរដ្ឋ ក្រោយបង្ហូរកាកសំណល់រាវមានក្លិនស្អុ.យពាសវាលពាសកាល
- ភ្នំពេញ
រាជធានីភ្នំពេញ ៖ រដ្ឋបាលខណ្ឌកំបូល និងអាជ្ញាធរពាក់ព័ន្ធបានសុំឲ្យសិប្បកម្មផលិតជីសរីរាង្គ «ជុងហេង ហ្វើថឹឡាយហ្សឺ ខូអិលធីឌី » ដែលមានទីតាំងស្ថិតនៅក្នុងភូមិត្រពាំងក្រសាំង សង្កាត់បឹងធំ ខណ្ឌកំបូល រាជធានីភ្នំពេញ ប្ដូរទីតាំងថ្មី ដែលពុំបង្កផលប៉ះពាល់ដល់សុខភាព ការរស់នៅ និងការបង្កបង្កើនផលរបស់ប្រជាពលរដ្ឋ ព្រមទាំងឲ្យម្ចាស់សិប្បកម្មរូបនោះចេញសំណងជូនប្រជាពលរដ្ឋ ដែលបានរងផលប៉ះពាល់ទាំងនោះផងដែរ ។
ការសុំឲ្យប្ដូរទីតាំង និងចេញសំណងជូនប្រជាពលរដ្ឋនេះបន្ទាប់ពីសិប្បកម្មផលិតជីខាងលើ បានបង្ហូរកាកសំណល់រាវ កាកសំណល់ផ្លែស្វាយ និងកាកសំណល់វត្ថុធាតុដើមផ្សេងទៀត ដែលមានក្លិនស្អុយអសោចិ៍ចូលទៅក្នុងប្រឡាយសាធារណៈ ហើយបានហូរហៀរចូលក្នុងដីស្រែប្រជាពលរដ្ឋមិនអាចបង្កបង្កើនផលបាន ។ មិនតែប៉ុណ្ណោះនៅពេលមានភ្លៀងធ្លាក់ម្ដងៗ ទឹកកាកសំណល់ដ៏ស្អុយទាំងនោះ ក៏បានហូរចាក់ចូលទៅក្នុងស្ទឹងព្រែកត្នោតថែមទៀតផង ដែលជាហេតុបង្កឲ្យមានផលប៉ះពាល់ដល់បរិស្ថាន និងសុខភាពប្រជាពលរដ្ឋធ្ងន់ធ្ងរ ជាពិសេសនៅក្នុងរយៈពេល ២ឆ្នាំចុងក្រោយនេះកាន់តែស្អុយខ្លាំងឡើងហើយ ។
អាជ្ញាធរបានប្រាប់ថា សិប្បកម្មមួយនេះសាងសង់នៅកណ្ដាលវាលស្រែមានទំហំ ៨,០០០ម៉ែត្រការ៉ ចែកចេញជា ៣អគារ មានកម្មករបម្រើការងារនៅទីនោះតែចំនួន ១២នាក់ប៉ុណ្ណោះ ហើយបានកែច្នៃសំណល់ផ្លែស្វាយផ្សំជាមួយវត្ថុធាតុដើមផ្សេងៗទៀតភាគច្រើនជារបស់ស្អុយធ្វើជាជីសរីរាង្គ ។ ដោយបានបើកដំណើរការផលិតនៅក្នុងឆ្នាំ ២០១៩ រហូតមកដល់បច្ចុប្បន្ន ចំណែកម្ចាស់ទីតាំងនិងជាអ្នកគ្រប់គ្រងសិប្បកម្មឈ្មោះគង់ ពីនី ភេទស្រី ជាជនជាតិខ្មែរ មានប័ណ្ណប៉ាតង់ចុះថ្ងៃទី ២២ ខែសីហា ឆ្នាំ ២០២៥ ។
ប្រជាពលរដ្ឋបាននិយាយថា សិប្បកម្មផលិតជីសរីរាង្គខាងលើនោះបានបង្ហូរទឹកស្អុយចេញក្រៅបង្កក្លិនស្អុយពាសវាលពាសកាលរយៈពេលជាង ៧ឆ្នាំមកហើយ ប៉ុន្តែនៅ ២ឆ្នាំចុងក្រោយនេះកាន់តែស្អុយខ្លាំងឡើង មិនថាពេលយប់ឬពេលថ្ងៃនោះទេ ក្លិនស្អុយបានសាយភាយគ្រប់ពេល ដែលបានធ្វើឲ្យពួកគាត់ពិបាករស់នៅជាខ្លាំង ។ សិប្បកម្មនេះបានបំពុលបរិស្ថាន បង្កផលប៉ះពាល់ដល់សុខភាពនិងដីស្រែពួកគាត់មិនអាចធ្វើស្រែកើតឡើយ ហើយទឹកកាកសំណល់ទាំងនោះក៏ហូរចូលស្ទឹងព្រែកត្នោតផងដែរ ដោយសារតែបែបនេះ ទើបពួកគាត់ស្នើរសុំទៅអាជ្ញាធរឲ្យអន្តរាគមន៍ជួយដោះស្រាយ និងមានចំណាត់ការលើក្រុមហ៊ុនមួយនេះផង ។
ដោយឡែកអាជ្ញាធរសង្កាត់បឹងធំ និងរដ្ឋបាលខណ្ឌកំបូល ក្រោយពីបានដឹងនូវទុក្ខលំបាកប្រជាពលរដ្ឋ ក៏បានចុះទៅធ្វើការណែនាំដល់ម្ចាស់សិប្បកម្មនោះជាបន្តបន្ទាប់ច្រើនលើករួចមកហើយ ប៉ុន្តែពុំទទួលបានផលល្អនោះទេ ក្លិនស្អុយនៅតែមានដដែល ហើយលើកចុងក្រោយនៅថ្ងៃទី ៣ ខែមិថុនា ឆ្នាំ ២០២៦ រដ្ឋបាលខណ្ឌកំបូលដឹកនាំដោយលោកអភិបាលខណ្ឌ ឃឹម ស៊ុនសូដា សហការជាមួយមន្ទីរបរិស្ថានរាជធានីភ្នំពេញ ដឹកនាំដោយលោកប្រធានមន្ទីរ គាត រង្សី និងក្រុមការងារនៃក្រសួងបរិស្ថាន បានចុះទៅណែនាំ និងធ្វើកំណត់ហេតុដល់ម្ចាស់សិប្បកម្មមួយនេះ និងបានដាក់ចេញនូវវិធានការចំនួន ៥ ចំណុចដូចខាងក្រោម ៖
១- ម្ចាស់សិប្បកម្មគួរផ្លាស់ប្តូរទីតាំងថ្មីដែលមិនបង្កផលប៉ះពាល់ក្លិនស្អុយដល់បងប្អូនរស់នៅក្បែរខាង ។
២- ម្ចាស់សិប្បកម្មត្រូវធ្វើការទប់ស្កាត់សំណល់រាវមិនឲ្យហូរចូលដីស្រែប្រជាពលរដ្ឋបន្តទៀតឡើយ ។
៣- ម្ចាស់សិប្បកម្មត្រូវបញ្ឈប់នាំចូលសំណល់ទាំងអស់មកធ្វើអាជីវកម្មជាបន្តទៀត ។ ចំពោះសំណល់ដែលស្ថិតនៅក្នុងទីតាំងស្រាប់ត្រូវប្រមូលទុកដាក់នៅក្នុងរោងត្រឹមត្រូវកំឡុងពេល ២សប្តាហ៏ ដើម្បីបញ្ជៀសបញ្ហាក្លិនស្អុយប៉ះពាល់ប្រជាពលរដ្ឋ ។
៤- ម្ចាស់សិប្បកម្មត្រូវទទួលខុសត្រូវផ្តល់ជាសំណងដល់បងប្អូនប្រជាពលរដ្ឋដែលរងផលប៉ះពាល់ដីស្រែមិនអាចបង្កបង្កើនផលបាន។
៥- ក្នុងករណីសិប្បកម្មអាចបើកដំណើរការអាជីវកម្មឡើងវិញ ត្រូវស្នើសុំលិខិតអនុញ្ញាតិពីស្ថាប័នមានសមត្ថកិច្ច និងត្រូវមានការចុះត្រួតពិនិត្យ វាយតម្លៃលើការអនុញ្ញាតិជាមុនសិនទើបអាចដំណើរការឡើងវិញបាន ៕
ចែករំលែកព័តមាននេះ