សង្គ្រាមអ៊ុយក្រែន ៖ អាជ្ញាធរមូលដ្ឋានរាយការណ៍ កាលពីថ្ងៃទី៩ មិថុនា ថា ការវាយប្រហារខ្លាំងក្លារបស់រុស្ស៊ីលើតំបន់ក្រុង
ខាគៀវ ភាគខាងកើតអ៊ុយក្រែន បណ្ដាលឲ្យមនុស្សស្លាប់៤នាក់ និងរបួសប្រមាណជា១៥នាក់ ។
ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី នាថ្ងៃទី៨ មិថុនា បានជួបពិភាក្សាគ្នាតាមទូរស័ព្ទដ៏វិជ្ជមានបំផុត ជាមួយបេសកជនអាមេរិក លោកSTEVE WITKOFF និងលោកJERED KUSHNER ដើម្បីសាកល្បងជម្រុញការចរចាឡើងវិញ សំដៅស្វែងរកច្រកចេញមួយចំពោះសង្គ្រាមនៅអ៊ុយក្រែន ។
តាមបណ្ដាញសង្គម លោកហ្សេឡេនស្គីថ្លែងថា យើងយល់ដែលពិភពលោកពេលនេះ កំពុងតែផ្ដោតខ្លាំងលើសភាពការណ៍ជុំវិញអ៉ីរ៉ង់ ប៉ុន្តែទិសដៅរួមរបស់យើង គឺស្វែងរកសន្តិភាពនៅអឺរ៉ុប ដែលកំពុងស្ថិតក្នុងរបៀបវារៈជានិច្ចដែរ។
មេដឹកនាំអ៊ុយក្រែនរូបនោះលើកជាច្រើនលើកពីលទ្ធភាពនៃទស្សនកិច្ចរបស់បេសកជនអាមេរិកទាំង២រូប នៅក្រុងគៀវ ដែលនឹងជាលើកដំបូងចាប់តាំងពីរុស្ស៊ីវាយប្រហារអ៊ុយក្រែន ពីខែ កុម្ភៈ ឆ្នាំ២០២២ មក ។ រយៈពេលប៉ុន្មានខែចុងក្រោយនេះ មានការចរចាដោយផ្ទាល់ជាច្រើនរវាងរុស្ស៊ី និងអ៊ុយក្រែនក្រោមការជួយជ្រោមជ្រែងរបស់អាមេរិក តែមិនអាចរកឃើញកិច្ចព្រមព្រៀងមួយ ហើយពេលនេះ អាមេរិកកាន់តែរយាលដៃថែមទៀត ព្រោះតែក្រុងវ៉ាស៊ីនតោនជាប់ផ្ដោតលើសង្គ្រាមនៅអ៉ីរ៉ង់ ។
រុស្ស៊ីបានវាយប្រហារស្ទើររាល់ថ្ងៃ បណ្ដាលឲ្យមនុស្សច្រើននាក់ស្លាប់ និងរបួសនៅអ៊ុយក្រែន។ អ៊ុយក្រែនបានតបតវិញដោយវាយប្រហារជាទៀងទាត់លើបណ្ដាគោលដៅ ក្នុងតំបន់កាន់កាប់និងក្នុងដែនដីរុស្ស៊ីផងដែរ ដោយប្រើជាពិសេសដ្រូន ៕
ចែករំលែកព័តមាននេះ