រាជធានីភ្នំពេញ ៖ លោកជំទាវ Anne HÖGLUNG ឯកអគ្គរាជទូតថ្មីប្រទេសស៊ុយអែត ប្រចាំកម្ពុជា បានមានប្រសាសន៍ថា កម្ពុជាជាប្រទេសដែលលោកជំទាវស្រឡាញ់ជាយូរមកហើយ ហើយអ្វីដែលលោកជំទាវចាប់អារម្មណ៍នោះ គឺសក្តានុពលវិនិយោគលើវិស័យទេសចរណ៍ ព្រោះប្រទេសមួយនេះពោរពេញដោយរមណីយដ្ឋានធម្មជាតិដ៏ស្រស់ត្រកាល និងប្រាសាទបុរាណជាច្រើនដែលអ្នកទេសចរចូលចិត្ត។ ម្យ៉ាងទៀតលោកជំទាវក៏បានចាប់អារម្មណ៍ផងដែរ ចំពោះការរីកចម្រើនលើគ្រប់វិស័យនៅកម្ពុជាបច្ចុប្បន្ន។
លោកជំទាវឯកអគ្គរាជទូតថ្មីនៃប្រទេសស៊ុយអែត បានមានប្រសាសន៍ដូច្នេះក្នុងឱកាសចូលជួបសម្តែងការគួរសមជាមួយលោកជំទាវ ស៊ុន សាភឿន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី២៣ មីនា ឆ្នាំ២០១១ នៅទីស្តីការក្រសួងការបរទេស។ លោកជំទាវ Anne HÖGLUNG មានប្រសាសន៍ថា កម្ពុជា និងស៊ុយអែត មានទំនាក់ទំនងល្អជាមួយគ្នាតាំងពីយូរមកហើយ ហើយប្រទេសស៊ុយអែតក៏បានជួយប្រទេសកម្ពុជាលើផ្នែកជាច្រើន ដូចជាគ្រប់គ្រងរដ្ឋបាល សេដ្ឋកិច្ច អភិវឌ្ឍន៍ជនបទ បណ្តុះបណ្តាលធនធានមនុស្ស វិស័យសង្គមកិច្ច សុខាភិបាល និងជំនួយមនុស្សធម៌ ។
លោកជំទាវ ស៊ុន សាភឿន មានប្រសាសន៍ថា កម្ពុជាក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន គឺមានការរីកចម្រើនលើគ្រប់វិស័យទាំងនយោបាយ សន្តិសុខ និងសេដ្ឋកិច្ច ។ ទន្ទឹមនោះ លោកជំទាវក៏បានជម្រាបជូនភ្ញៀវអំពីបញ្ហាទំនាស់ព្រំដែនរវាងកម្ពុជា-ថៃ ផងដែរ ដែលប្រទេសថៃ គឺជាអ្នកបង្កហេតុមុន ដោយភាគីថៃបានបង្ហាញនូវមហិច្ឆតាចង់បានប្រាសាទព្រះវិហារ ដែលជាបេតិកភណ្ឌពិភពលោក និងជាកម្មសិទ្ធិរបស់ប្រទេសកម្ពុជា ។
ក្នុងជំនួបនោះដែរ លោកជំទាវបានសំណូមពរឱ្យប្រទេសស៊ុយអែត បន្តជួយកម្ពុជាលើគ្រប់ផ្នែកដែលស៊ុយអែតបានជួយកន្លងមក ជាពិសេសជួយជំរុញវិនិយោគិនឱ្យមកបណ្តាក់ចុះវិនិយោគសំខាន់លើវិស័យកសិកម្ម និងឧស្សាហកម្ម នៅពេលដែលកម្ពុជា ពុំទាន់មានបច្ចេកទេសខ្ពស់លើផ្នែកផលិតចំណីអាហារដើម្បីនាំចេញ និងពុំទាន់មានម៉ាស៊ីនកិនស្រូវទំនើបដែលអាចផលិតអង្ករឱ្យបានតាមស្តង់ដាទីផ្សារអន្តរជាតិ ។ ជាមួយនេះជួយជំរុញទេសចរមកកាន់កម្ពុជា ឱ្យបានច្រើន និងគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ២០១៣-២០១៤ ដែលការបោះឆ្នោត នឹងប្រព្រឹត្តទៅនៅមហាសន្និបាតអង្គការសហប្រជាជាតិនាឆ្នាំ២០១២ ខាងមុខ៕
ចែករំលែកព័តមាននេះ