រាជធានីភ្នំពេញ ៖ រយៈពេល២ថ្ងៃនេះ គឺពីថ្ងៃទី១ មកដល់ថ្ងៃទី២ សីហា ២០១១ កិច្ចប្រជុំពេញអង្គរបស់សាលាក្តីខ្មែរក្រហមបានពិភាក្សាលើសំណើសុំធ្វើវិសោធនកម្មវិធានផ្ទៃក្នុងមួយចំនួន ដើម្បីលើកកម្ពស់ប្រសិទ្ធភាពនៃកិច្ចដំណើរការនីតិវិធីជំនុំជម្រះ។ យោងតាមសុន្ទរកថាបើកកិច្ចប្រជុំរបស់ប្រធានកិច្ចប្រជុំពេញអង្គ លោកគង់ ស្រ៊ឹម បានឱ្យដឹងថា សំណើសុំមួយក្នុងចំណោមសំណើជាច្រើននឹងអនុញ្ញាតឱ្យអនុវត្តទៅតាមនីតិវិធីបណ្តឹងសាទុក្ខភ្លាមៗនៅចំពោះមុខអង្គជំនុំជម្រះតុលាការកំពូលនៃសាលាក្តីខ្មែរក្រហមដើម្បីឱ្យការប្រព្រឹត្តទៅនោះកាន់តែមានប្រសិទ្ធភាព ។
លោកគង់ ស្រីម បានថ្លែងលើកទឹកចិត្តដល់ចៅក្រម និងមន្ត្រីដែលចូលរួមឱ្យចែករំលែកមតិយោបល់ និងចូលរួមពិភាក្សាឱ្យបានទូលំទូលាយ ដើម្បីឱ្យកិច្ចប្រជុំពេញអង្គទទួលបានផ្លែផ្កាជោគជ័យ។ កិច្ចប្រជុំពេញអង្គគឺជាឱកាសមួយផ្តល់ឱ្យយើងទាំងអស់គ្នាចូលរួមដល់អង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្តីខ្មែរក្រហម (អ.វ.ត.ក) ឱ្យសម្រេចបានជោគជ័យក្នុងការផ្តល់យុត្តិធម៌ឆាប់រហ័ស និងមានប្រសិទ្ធភាពក្នុងពេលអនាគតខាងមុខ។
សវនាការជំនុំជម្រះកន្លងមករបស់ អ.វ.ត.ក មានសំណុំរឿង០០១ ដែលកាលណោះកាត់ទោសឌុច (កាំង ហ្គេចអ៊ាវ) ឱ្យជាប់ពន្ធនាគារ៣៥ឆ្នាំ កាត់កងនៅសល់១៩ឆ្នាំ ហើយឌុច បានប្តឹងសាទុក្ខទៅតុលាការកំពូល ដែលអង្គជំនុំជម្រះតុលាការកំពូលបានបើកសវនាការលើបណ្តឹងសាទុក្ខកាលពីចុងខែមីនាកន្លងទៅថ្មីៗនេះ ហើយសង្ឃឹមថា សាលដីកានឹងត្រូវប្រកាសក្នុងពេលឆាប់ៗតាមដែលអាចធ្វើទៅបាន។
សម្រាប់សំណុំរឿង០០២ វិញ អង្គជំនុំជម្រះសាលាដំបូងនៃសាលាក្តីខ្មែរក្រហមបានបើកសវនាការបឋមកាលពីថ្ងៃទី២៧-៣០ មិថុនា កន្លងទៅ ហើយរំពឹងថា ការជំនុំជម្រះលើរឿងក្តីបន្ទាប់នៃសំណុំរឿង០០២នេះ នឹងចាប់ផ្តើមនៅ ចុងឆ្នាំ២០១១។ សំណុំរឿង០០២ នេះនឹងមានការប្រឈមខ្លះៗអំពីបញ្ហាគតិយុត្តិ និងភាពស្មុគស្មាញ ប៉ុន្តែបើផ្អែកលើសុទិដ្ឋិនិយមចំពោះដំណើរការនេះនឹងអាចទៅរួចប្រកបដោយជោគជ័យ។
គួររំលឹកថា កាលពីថ្ងៃទី១ សីហា ២០១១ អង្គជនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ចាប់ផ្តើមបើកកិច្ចប្រជុំពេញអង្គលើកទី១០ របស់ខ្លួនដើម្បីពិភាក្សាលើសំណើសុំធ្វើវិសោធនកម្មចំណុចមួយចំនួននៃវិធានផ្ទៃក្នុងរបស់ អ.វ.ត.ក (សាលាក្តីខ្មែរក្រហម) ។ កិច្ចប្រជុំពេញអង្គលើកទី១០ ដែលនឹងដំណើរការរយៈពេល៣ថ្ងៃនេះ ប្រព្រឹត្តទៅនៅសាលសវនាការនៃ អ.វ.ត.ក ចូលរួមដោយចៅក្រមជាតិ និងអន្តរជាតិ និងថ្នាក់ដឹកនាំគ្រប់ស្ថាប័ននៃ អ.វ.ត.ក ក្រោមអធិបតីភាពលោកគង់ ស្រ៊ឹម ជាប្រធានកិច្ចប្រជុំ និងលោកស្រីស៊ីលវៀ ខាតរ៉ាយ ជាអនុប្រធានកិច្ចប្រជុំ។
ដោយឡែកកាលពីថ្ងៃទី១ សីហា ២០១១ ដដែលនេះ ចៅក្រមអន្តរជាតិថ្មីនៃអង្គបុរេជំនុំជម្រះវិសាមញ្ញ ក្នុងតុលាការកម្ពុជា ជនជាតិកូរ៉េ លោកឆង ឆាងហូ បានស្បថចូលកាន់តំណែងជាផ្លូវការហើយ ។ ចៅក្រមជនជាតិកូរ៉េរូបនេះតែងតាំងដោយលោកអគ្គលេខាធិការអង្គការសហប្រជាជាតិបាន គីមូន និងមានការបោះឆ្នោតសម្រេចដោយឧត្តមក្រុមប្រឹក្សានៃអង្គចៅក្រមនៃព្រះរាណាចក្រកម្ពុជា ៕
ចែករំលែកព័តមាននេះ