ខេត្តព្រះវិហារ ៖ ព្រឹកថ្ងៃទី២ សីហា នេះ អគ្គនាយិកាវិទ្យុ និងទូរទស្សន៍បាយ័ន លោកស្រីហ៊ុន ម៉ាណា និងគណៈប្រតិភូ បាននាំអំណោយនិងថវិកាទៅចែកជូននាយទាហាន ពលទាហាន នាយនគរបាល និងពលនគរបាលដែលឈរជើងនៅតាមបន្ទាត់ព្រំដែនប្រាសាទព្រះវិហារ ហើយនឹងបន្តទៅចែកអំណោយ និងចុះសួរសុខទុក្ខប្រជាពលរដ្ឋនៅស្រុករវៀង ខេត្តព្រះវិហារ ជាបន្តទៀត។
ដោយឡែកទាក់ទងទៅនឹងអាកាសធាតុនៅក្នុងខេត្តព្រះវិហារនោះវិញ បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឱ្យដឹងថា ជិតមួយសប្តាហ៍កន្លងមកនេះ ទឹកភ្លៀងបានធ្លាក់ច្រើន ហើយនៅលើប្រាសាទព្រះវិហារក៏ដូចជានៅតាមជួរភ្នំដងរែក និងនៅតាមបណ្តាស្រុកមួយចំនួន អាកាសធាតុមានភាពត្រជាក់ខ្លាំង និងចុះអ័ព្ទ ។ ប៉ុន្តែពុំប៉ះពាល់អ្វីធ្ងន់ធ្ងរទៅដល់សុខភាពប្រជាពលរដ្ឋក៏ដូចជាកងទ័ពដែលកំពុងការពារបូរណភាពទឹកដីនោះដែរ។ ចំណែកជំនន់ទឹកភ្លៀងក៏ពុំទាន់កើតមាននៅឡើយដែរ ៕
ចែករំលែកព័តមាននេះ