អង្គការអូតង់ប្រកាសកាលពីថ្ងៃទី២៩ កក្កដា ថា បានទម្លាក់គ្រាប់បែក ហើយកម្ទេចអង់តែន៣នៃទូរទស្សន៍ផ្កាយរណបរបស់លីប៊ី នៅទីក្រុងទ្រីប៉ូលី ដើម្បីកាត់បន្ថយសមត្ថភាពរបបលោកម៉ូអាម៉ា កាដាហ្វី ក្នុងការបំភិតបំភ័យប្រជាជន ។
អ្នកនាំពាក្យអូតង់វរសេនីយ៍ឯក ROLAND LAVOIE ក្នុងសេចក្តីប្រកាសមួយគូសបញ្ជាក់ថា កាលពីប៉ុន្មានម៉ោងមុននេះអូតង់បានធ្វើការវាយប្រហារតាមអាកាសមួយ ដែលបំផ្លាញមជ្ឈមណ្ឌលផ្សព្វផ្សាយតាមផ្កាយរណប៣កន្លែងរបស់ទូរទស្សន៍លីប៊ីនៅក្រុងទ្រីប៉ូលី ។ អ្នកនាំ ពាក្យរូបនេះបន្តថា អន្តរាគមន៍របស់យើងនេះគឺចាំបាច់ពីព្រោះទូរទស្សន៍ត្រូវបានរបបលោកកាដាហ្វីប្រើប្រាស់ ដើម្បីបង្ក្រាប និងបំភិតបំភ័យជាបន្តបន្ទាប់ចំពោះប្រជាជនស៊ីវិល ហើយអុជអាលឱ្យមានកំហឹងនឹងគ្នារវាងប្រជាជនលីប៊ី ។
ទូរទស្សន៍ផ្លូវការលីប៊ី LBC ដែលបន្តផ្សាយ កាលពីព្រឹកថ្ងៃទី២៩ កក្កដា នោះ បានផ្សាយសេចក្តីប្រកាសមួយដែលរៀបរាប់ពីមនុស្សស្លាប់៣នាក់ និងរបួស១៥នាក់ក្នុងចំណោមបុគ្គលិករបស់ខ្លួន ៕
ចែករំលែកព័តមាននេះ