សហរដ្ឋអាមេរិកកាលពីថ្ងៃទី២៦ កក្កដា កន្លងមក បានសម្រេចផ្អាកជំនួយ៣៥០លានដុល្លារ សម្រាប់ប្រទេសម៉ាឡាវី ក្រោយពីប្រទេសនៅអាហ្វ្រិកភាគខាងត្បូងមួយនេះបង្ក្រាបបាតុករដោយហិង្សា បណ្តាលឱ្យស្លាប់មនុស្សជាច្រើននាក់ដែលធ្វើបាតុកម្ម ប្រឆាំងលោកប្រធានាធិបតី Bingu wa Mutharika ។
សហរដ្ឋអាមេរិក អង់គ្លេស និងប្រទេសដទៃទៀត បានព្រមានរដ្ឋាភិបាលរបស់លោក Mutharika ថា នឹងប្រឈមមុខចំពោះការកាត់បន្ថយប្រហែល៤០ភាគរយនៃថវិកាជំនួយ ប្រសិនបើនៅតែអនុញ្ញាតឱ្យទាហាន និងកងកម្លាំងសន្តិសុខបង្ក្រាបដោយហិង្សា ប្រឆាំងហ្វូងបាតុករទៀត។
បាតុកម្មប្រឆាំងប្រធានាធិបតីម៉ាឡាវីបានផ្ទុះឡើងកាលពីប៉ុន្មានថ្ងៃមុន បណ្តាលឱ្យស្លាប់មនុស្ស១៩នាក់ហើយ។ សារជីវកម្មប្រជែងសហស្សវត្សដែលជាទីភ្នាក់ងារអាេមរិកមួយផ្តល់ជំនួយអភិវឌ្ឍន៍ដល់បណ្តាប្រទេសមួយចំនួន ដែលមានអភិបាលកិច្ចល្អ បានចុះហត្ថលេខាលើកិច្ចព្រមព្រៀងមួយមានទឹកប្រាក់៣៥០លានដុល្លារ សម្រាប់រយៈពេល៥ឆ្នាំជាមួយប្រទេសម៉ាឡាវី កាលពីខែមេសាកន្លងមក ។
ប៉ុន្តែទីភ្នាក់ងារនេះនិយាយក្នុងសេចក្តីថ្លែងការណ៍មួយចេញផ្សាយកាលពីថ្ងៃទី២៦ កក្កដា កន្លងមកថា ខ្លួនមានការព្រួយបារម្ភយ៉ាងខ្លាំង ដោយសារព្រឹត្តិការណ៍ថ្មីៗនេះនៅក្នុងប្រទេសម៉ាឡាវី ហើយពេលនេះ បានសម្រេចផ្អាកកម្មវិធីផ្តល់ជំនួយនោះវិញ ដើម្បីពិនិត្យមើល និងសើរើឡើងវិញនូវភាពជាដៃគូរបស់ខ្លួនជាមួយប្រទេសម៉ាឡាវី ។
ជំនួយអាមេរិកដែលនឹងត្រូវផ្តល់ទៅឱ្យប្រទេសម៉ាឡាវីនោះគឺដើម្បីជួយប្រទេសនេះកែលម្អបណ្តាញផ្គត់ផ្គង់អគ្គិសនីដែលទ្រុឌទ្រោម ៕
ចែករំលែកព័តមាននេះ