រាជធានីភ្នំពេញ ៖ កាលពីព្រឹកថ្ងៃទី២៦ កក្កដា លោកអឿង សៀង ចៅក្រមសាលាដំបូងរាជធានីភ្នំពេញ បានសម្រេចចេញដីកាឱ្យឃុំខ្លួនអ្នកបើកបរស្រវឹងដែលបង្កើតឱ្យមានសោកនាដកម្មកិនមនុស្សស្លាប់៣នាក់ និងរបួសធ្ងន់កុមារម្នាក់ ក្រោមបទបើកបរធ្វើឱ្យស្លាប់អ្នកដទៃ ដោយដាក់ពន្ធនាគារជាបណ្តោះអាសន្ន រង់ចាំសវនាការផ្តន្ទាទោសតាមផ្លូវច្បាប់ ។
ជនជាប់ពិរុទ្ធជនខាងលើនេះឈ្មោះអឿង ប៊ុនធឿន ភេទប្រុស អាយុ៣៩ឆ្នាំ មានទីលំនៅភូមិជ័យនិគម ឃុំកណ្តោលជ្រំ ស្រុកពញាក្រែក ខេត្តកំពង់ចាម ។ ឯជនរងគ្រោះដែលបាត់បង់អាយុជីវិតទាំង៣នាក់នោះគឺឪពុក ម្តាយ និងកូនម្នាក់ ព្រមទាំងបន្សល់ទុកកូនម្នាក់ទៀតដែលរងរបួសយា៉ងធ្ងន់ធ្ងរកំពុងសង្គ្រោះក្នុងមន្ទីរពេទ្យ ។
គួររំលឹកថា គ្រោះថ្នាក់ចរាចរណ៍គួរឱ្យរន្ធត់មួយបានកើតឡើងនៅតាមបណ្ដោយផ្លូវព្រៃស ស្ថិតក្នុងក្រុមទី៧ ភូមិប្រការ សង្កាត់ព្រៃស ខណ្ឌដង្កោ កាលពីវេលាម៉ោង៧និង៣០នាទីយប់ ថ្ងៃទី២៣ កក្កដា ដោយរថយន្ដបែនដឹកដីកង់១០ ម៉ាកអ៊ីស៊ុយហ្ស៊ុយមួយគ្រឿង បុកម៉ូតូសេ១២៥ រមូរចូលក្រោមរថយន្ដ បណ្ដាលឱ្យប្ដី-ប្រពន្ធស្លាប់នៅកន្លែងកើតហេតុ កូនប្រុសអាយុ៨ឆ្នាំស្លាប់នៅពេលបញ្ជូនទៅដល់មន្ទីរពេទ្យ និងកូនស្រីអាយុ៣ឆ្នាំរងរបួសធ្ងន់ ។
គ្រោះអកុសលនេះបានកើតឡើងខណៈពេលក្រុមគ្រួសារប្ដីប្រពន្ធនិងកូន២នាក់ជិះ ម៉ូតូសេ១២៥ ពណ៌ខ្មៅ ពាក់ស្លាកលេខ ភ្នំពេញ 1E-4811 ត្រឡប់មកពីលេងផ្ទះបងប្អូននៅភូមិព្រៃស លុះមកដល់ចំណុចខាងលើក៏ជួបនឹងរថយន្ដបែនដឹកដីកង់១០ ម៉ាកអ៊ីស៊ុយហ្ស៊ុយពណ៌សំបក ឪឡឹក ពាក់ស្លាកលេខ ក-២២៣៧ ភព៣ បើកបរក្នុងទិសដៅបញ្ច្រាសគ្នា ហើយរថយន្ដបានបុកចំពីមុខបណ្ដាលឱ្យម៉ូតូ និងប្ដី-ប្រពន្ធរមូរចូលក្រោមរថយន្ដ ចំណែកកូនទាំងពីរនាក់ខ្ទាតចេញក្រៅរថយន្ដ។ ក្នុងហេតុការគ្រោះថ្នាក់នេះបណ្ដាលឱ្យស្លាប់បុរសជាប្ដីឈ្មោះនាង កេនមន្ថា អាយុ៣៦ឆ្នាំ មានទីលំនៅតាមបណ្តោយប្រឡាយក្នុងសង្កាត់ស្ទឹងមានជ័យ ខណ្ឌមានជ័យ ប្រពន្ធឈ្មោះស្រីមុំ អាយុ៣៦ឆ្នាំ និងកូនប្រុសឈ្មោះកេន មុន្នីរ៉េត អាយុ៨ឆ្នាំ ចំណែកកូនស្រីឈ្មោះកេន ណារី អាយុ៣ឆ្នាំ បាក់ដៃទាំងសងខាង បញ្ជូនទៅព្យាបាលនៅមន្ទីរពេទ្យគន្ធបុបា្ផទី៤។
ប្រភពដដែលបន្ដថា ពេលបុកម៉ូតូហើយរថយន្ដមិនបានជាន់ហ្រាំ្វងបន្ថយល្បឿនទេ គឺបើកអូសទាំងកម្រោល រួចហើយព្យាយាមបើករត់គេចបានចម្ងាយប្រមាណ៣០ម៉ែត្រទើបឈប់ ហើយអ្នកបើកបរបើកទ្វាររថយន្ដចុះរត់គេចទៅក្នុងវាលស្រែ ស្របពេលនោះដែរ មានអ្នកម៉ូតូ២គ្រឿងផ្សេងទៀត ឃើញហេតុការណ៍ក៏ជិះដេញតាមទាន់ និងចុះទៅចាប់បាន។ ពេលសមត្ថកិច្ចទៅដល់ក៏បានចាប់ឃាត់ខ្លួនអ្នកបើកបររថយន្តដាក់ខ្នោះនាំយកទៅប៉ុស្ដិ៍រដ្ឋបាលព្រៃសដាក់ក្នុងបន្ទប់ចាក់សោ ព្រោះពេលនោះមានប្រជាពលរដ្ឋទៅចោមរោមនៅមុខប៉ុស្ដិ៍ក្នុងបំណងបម្រុងវាយព្រមាន តែសមត្ថកិច្ចហាមឃាត់មិនឱ្យចូលទៅជិតទេ។ ប្រជាពលរដ្ឋនិយាយថា ពេលចាប់បានអ្នកបើកបររថយន្ដនោះមានធុំក្លិនស្រា និងមើលទៅស្រវឹងជោកជាំផង ៕
ចែករំលែកព័តមាននេះ