ខេត្តប៉ៃលិន ៖ សណ្តែកបាយគឺជាដំណាំមួយប្រភេទ មានលក្ខណៈមិនខុសពីដំណាំផ្សេងៗទៀតប៉ុន្មានដែរ ដោយសារដំណាំនេះមានដើមនៅទាបលើដី និងមានផ្លែបន្ទាប់ពីផ្ការួច។ ចំណែកការដាំមិនពិបាកក្នុងការថែទាំស្រោចទឹកទេ វាអាចរស់នៅបានដោយសារទឹកភ្លៀង ឬទឹកសន្សើម។ លើសពីនេះទៅទៀត សណ្តែកបាយត្រូវបានគេដាំស្ទើរតែគ្រប់ខេត្ត-ក្រុងក្នុងព្រះរាជាណាចក្រកម្ពុជា ហើយគេកំណត់ខែដែលត្រូវដាំឱ្យបានច្បាស់លាស់និងរយៈពេលនៃការលូតលាស់តែបីខែប៉ុណ្ណោះ។
បច្ចេកទេសនៃការដាំសណ្តែកបាយខុសរដូវរបស់កសិករឈ្មោះហូន មៀង អាយុ៥៨ឆ្នាំ នៅភូមិបឹងព្រលឹត ឃុំសាលាក្រៅ ស្រុកសាលាក្រៅ បានរៀបរាប់ថា ដំបូងត្រូវភ្ជួរដីយ៉ាងហោចណាស់ពីសា ។ បន្ទាប់មកនៅថ្ងៃទី១០ ឧសភា ឆ្នាំ២០១១ គាត់បានយកគ្រាប់សណ្តែកប្រមាណជា១០គីឡូក្រាម ទៅរុំនឹងកំណាត់ក្រមា ហើយយកគ្រាប់ពូជដែលត្រូវព្រោះលើដី១ហិកតានោះមកចងឱ្យបានជាប់ល្អ ទើបយកទៅជ្រលក់នៅក្នុងទឹកក្តៅដែលកំពុងពុះ រួចស្រង់ភ្លាមយកទៅហាលឱ្យស្ងួត ដែលធ្វើយ៉ាងនេះគឺឱ្យវាងាប់មេរោគដែលគេហៅថា បួសម្យ៉ាង។ កសិកររូបនេះបន្តថា ការដាំសណ្តែកខុសរដូវរបៀបនេះ គឺចាស់ៗបានប្រាប់ឱ្យធ្វើ ហើយក៏បានសាកល្បងរួចរាល់ជាច្រើនដងមកហើយដែរ ក៏ទទួលបានជោគជ័យតែរហូតមក ។
ចំណែកការដាំសណ្តែកដែលមិនបួសគឺគេអាចចាប់ផ្តើមពីខែមករា និងកុម្ភៈ។ ការដាំសណ្តែកបាយនៅក្នុងរដូវប្រាំងអាចដាំនៅលើដីវាលស្រែទំនាបបាន ឯនៅរដូវវស្សាដាំនៅលើដីទួល ដែលទឹកមិនលិច និងភ្លៀងធ្លាក់មិនជោកជាំពេក ហើយការដាំនៅរដូវវស្សា ឬរដូវប្រាំងនៅថ្ងៃណាក៏បានគឺអាស្រ័យទៅលើថា តើមានទឹកអាចឱ្យសណ្តែករស់បាន ហើយត្រូវប្រើវិធីសាស្ត្រដូចខាងលើ។
ចំណែកនៅថ្ងៃទី២០ កក្កដា ឆ្នាំ២០១១នេះ លោកអ៊ុំ ប្រពន្ធ និងកូនបាននាំគ្នាបេះសណ្តែកដែលកំពុងតែទុំជាបណ្តើរហើយគាត់ជឿជាក់ថា នៅថ្ងៃប្រមូលផលរួចខាងមុខនឹងចំណេញបានប្រាក់ជាងដំណាំពោតដែលគាត់ធ្លាប់បានដាំពីមុន។
បើប្រៀបធៀបទៅនឹងដំណាំពោត គឺវាមានលក្ខណៈងាយស្រួលជាង ហើយទទួលបានផលច្រើនជាងឆ្ងាយណាស់ ព្រោះសណ្តែកបាយក្នុង១គីឡូក្រាមតម្លៃពី៣.៨០០រៀល ទៅ៤.០០០រៀល ចំណែកឯពោតវិញបានត្រឹមតែ៥០០រៀល ទៅ៦០០រៀលប៉ុណ្ណោះ ក្នុងមួួយគីឡូក្រាម។ រីឯការចំណាយដើមទុនទៀតដោយទិញគ្រាប់ពូជអស់តែ១០ម៉ឺនរៀល តែនៅពេលទទួលផលគ្រាន់តែ៣ថ្ងៃដំបូងទទួលបានគ្រាប់សណ្តែក៦០គីឡូក្រាម បើគិតជាប្រាក់គឺបាន២៤ម៉ឺនរៀល។
សារប្រយោជន៍សណ្តែកបាយគឺគេអាចយកមកចម្រាញ់ធ្វើប្រេងឆា សម្រាប់យកមកធ្វើម្ហូបដូចជាចៀនត្រី សាច់ ដាក់ក្នុងសម្លជំនួសឱ្យខ្លាញ់ជ្រូក (ដែលទទួលទានច្រើននឹងធ្វើឱ្យស្ទះរន្ធសរសៃឈាម) ធ្វើស្នូលនំអន្សម នំគម បង្អែម និងអាចយកមកធ្វើគ្រឿងបរិភោគបានជាច្រើនមុខទៀត។
ការរំពឹងទុកនៅពេលខាងមុខ រូបគាត់នឹងបន្តដាំសណ្តែកបាយនេះទៀត ហើយក្នុងមួយឆ្នាំអាចដាំបានរហូតដល់ទៅ៣ដង លើសដំណាំពោត ដែលអាចដាំបានត្រឹមតែ២ដង ប៉ុណ្ណោះក្នុងមួយឆ្នាំ ។ រូបគាត់ក៏សូមផ្តាំផ្ញើទៅដល់ប្រជាពលរដ្ឋដែរ បើសិនជាដីដែលដាំពោតហើយខ្សោះជីជាតិ អាចផ្លាស់ប្តូរមកដាំសណ្តែកបាយមួយឆ្នាំឱ្យដីមានជីជាតិឡើងវិញរួចយកដីនោះមកដាំដំណាំផ្សេងៗនេះជារបៀបរក្សាឱ្យដីនៅមានជីជាតិថេរ ៕
ចែករំលែកព័តមាននេះ