ក្រុងប៉ោយប៉ែត ៖ ពលករខ្មែរនៅតែបន្តឆ្លងទៅមកដីសៀមតាមច្រករបៀងក្នុងស្រុកម៉ាឡៃទាំងអ្នកទៅព្រឹកវិលល្ងាច និងមានទាំងទៅមិនវិលត្រឡប់ដូចហែកឋិន ។ ច្រករបៀងជាច្រើនក្នុងស្រុកម៉ាឡៃបាននិងកំពុងបើកចំហឱ្យពលករទៅមករកការងារធ្វើលើទឹកដីសៀម ប៉ុន្តែច្រកមួយចំនួនគេអនុញ្ញាតឱ្យតែពលករទាំងឡាយណាដែលទៅព្រឹកវិលល្ងាចប៉ុណ្ណោះ ដូចជាច្រកដែលស្ថិតក្នុងភូមិចាន់គិរី ឃុំអូរស្រឡៅ និងច្រកកោះស្នួល ស្ថិតក្នុងភូមិកោះស្នួល ឃុំទួលពង្រ ។
តាមប្រភពព័ត៌មានពីពលករដែលឆ្លងទៅមកទឹកដីសៀមបានប្រាប់ថា ការឆ្លងទៅមកត្រូវសមត្ថកិច្ចតម្រូវឱ្យបង់លុយតិចតួចតែប៉ុណ្ណោះ។ ទោះបីជាបែបណា ច្រកទាំង២ខាងលើ ត្រូវប្រភពប្រាប់ថា មានលួចចម្លងទំនិញចេញចូលពេលយប់ផងដែរដឹកតាមរថយន្តសុទ្ធតែប្រភេទយីឌុប ។ សម្រាប់ច្រកនេះ ក្រោយពេលដែលអ្នកយកព័ត៌មានថតរូបភាពពលករដែលដើរឆ្លងទៅមកឃើញបុរសម្នាក់បានចេញមុខមកអះអាងថា ខ្លួនឈ្មោះម៉ាប់ ជាមេប៉ុសិ៍្តប៉ូលិសព្រំដែន លេខ៨១៥ នៅទីនោះ ព្រមទាំងនិយាយថា ពេលខាងមុខគេនឹងធ្វើកុងត្រូលមិនឱ្យអ្នកកាសែតចេញចូលថតសេរីទៀតនោះទេ ព្រមទាំងពោលពាក្យមិនគប្បីជាច្រើនដល់អ្នកកាសែត ។
ដោយឡែកច្រកមួយចំនួនទៀតក្នុងឃុំបឹងបេងរួមមានច្រករបៀងភូមិអូរល្វា ច្រកភូមិជ្រៃនិងច្រកភូមិចំបក់គេបើកដៃឱ្យពលករចេញចូលទៅដីសៀមយ៉ាងសេរី ។
ពលករដែលចេញតាមច្រកទាំង៣ខាងលើត្រូវដើរកាត់តាមចំការដំឡូងមី និងចំការពោតឆ្ពោះទៅមាត់អូរព្រំដែនក្រោយពីពួកគេចុះពីរថយន្តកាមរីតូចៗ ។ ពលករដែលឆ្លងទៅដីសៀមមិនវិលល្ងាចបានប្តូររូបភាពមកជិះរថយន្តប្រភេទកាមរីបញ្ឈប់ការជិះតាមរថយន្តនីស្សាន់ហើយ ព្រោះសំពីងសំពោងងាយនឹងសមត្ថកិច្ចដឹង ។ ក្នុងចំណោម៣ច្រក គឺច្រកអូរល្វា និងច្រកចំបក់ពលករមិនដើរកាត់ចំប៉ុសិ៍្តឈរជើងរបស់សមត្ថកិច្ចទេ ។ ចំណែកច្រកភូមិជ្រៃពលករដើរកាត់ចំប៉ុសិ៍្តឈរជើងតែម្តង ។ តាមប្រភពពីស្ត្រីម្នាក់ដែលដើរត្រឡប់ពីអូរព្រំដែនបានប្រាប់ថា ពលករដែលឆ្លងទៅមកតាមច្រកមួយនេះ ក្នុងម្នាក់ត្រូវគេយកប្រាក់១៧០បាត ។
ទោះបីជាបែបណា យោធាសឹករងស្រុកម៉ាឡៃដែលប្រចាំនៅប៉ុសិ៍្តភូមិជ្រៃនិយាយថា ពលករដែលចេញទៅស្រុកសៀមនោះគ្រាន់តែទៅដេកស៊ីឈ្នួលធ្វើការឱ្យគេតាមបន្ទាត់ព្រំដែនតែប៉ុណ្ណោះ ៕
ចែករំលែកព័តមាននេះ