ខេត្តក្រចេះ ៖ កំណាត់ផ្លូវជាតិលេខ៧៣ ក្រចេះ-ស្រុកឆ្លូងតភ្ជាប់ទល់នឹងផ្លូវជាតិលេខ៧ ត្រង់ចំណុចព្រះធាតុ ស្រុកតំបែរ ខេត្តកំពង់ចាម ដែលបានចាប់ផ្តើមស្ថាបនារយៈពេល៨ឆ្នាំ និងត្រូវចំណាយថវិការអស់ជាង១៦លានដុល្លាររហូតមកដល់ពេលនេះគឺស្ថាបនារួច១០០ភាគរយ និងត្រូវសម្រេចឲ្យមានការប្រើប្រាស់ជាបណ្តើរៗហើយ។
នៅព្រឹកថ្ងៃទី២១ កក្កដា មន្រ្តីនៃមន្ទីរសាធារណការខេត្តដឹកនាំដោយលោកស្រេង ស្រស់ ប្រធានមន្ទីរ លោកស្រី សាខុន អនុប្រធានមន្ទីរ រួមទាំងមន្ត្រីជំនាញជាច្រើនរូបទៀត បានចុះទៅ ពិនិត្យលើកំណាត់ផ្លូវជាតិក្រាលកៅស៊ូក្រចេះ-ស្រុកឆ្លូង ដែលមានប្រវែង៤៣គីឡូម៉ែត្រ ដែលបានស្ថាបនារួចនិងកំពុងតែបើកឱ្យប្រើប្រាស់ជាបណ្តើរៗទៅហើយនោះ។
លោកស្រេង ស្រស់ ប្រធានមន្ទីរសាធារណការខេត្តបានថ្លែងថា ផ្លូវជាតិលេខ៧៣ អតីតផ្លូវ ៣០៨ ប្រវែង៩៣គីឡូមែ៉ត្រ ពីទីរួមខេត្តក្រចេះ ដល់ព្រះធាតុ ដោយឡែកក្នុងទឹកដីខេត្តក្រចេះ ពីស្ពានកំពង់រាំងស្រុកឆ្លូង មកទល់នឹងទីរួមខេត្ត មានប្រវែង៤៣គីឡូមែ៉ត្រ ក្នុងនោះមានស្ពានចំនួន១៣កន្លែងស្ពានបេឡេត៍៦កន្លែង និងស្ពានបេតុង៧កន្លែង ហើយផ្លូវជាតិនេះបានចាប់ផ្តើម សាងសង់ក្នុងឆ្នាំ២០០៣ រហូតមកដល់ពេលនេះបានសម្រេច១០០% ដោយត្រូវចំណាយថវិកាជាតិអស់ចំនួនជាង១៦លានដុល្លាសហរដ្ឋអាមេរិក។
លោកប្រធានមន្ទីរមានប្រសាសន៍បន្តថា អនុវត្តតាមបទដ្ឋានរបស់ក្រសួងសាធារណការ កំណាត់ផ្លូវជាតិក្រាលកៅស៊ូនេះ បានសាងសង់ជាប្រភេទផ្លូវកៅស៊ូ DBST មានទទឹងប្រវែង៦ម៉ែត្រទៅ៧ម៉ែត្រ និងប្រភេទ SBST ១ម៉ែត្រសងខាង។
ជាមួយគ្នានេះ លោកប្រធានមន្ទីរបានថ្លែងអំណរគុណដល់សម្តេចនាយករដ្ឋមន្រ្តី ហ៊ុន សែន ប្រមុខរាជរដ្ឋាភិបាលកម្ពុជា ដែលលោកបានខិតខំអភិវឌ្ឍន៍គ្រប់ទីកន្លែង ជាក់ស្តែងកំណាត់ផ្លូវជាតិ៧៣នេះ កាលពីមុនប្រជាពលរដ្ឋធ្វើដំណើរទៅមកមានការពិបាក តែពេលនេះ គឺមានផ្លូវជាតិក្រាលកៅស៊ូ និងស្ពានស្រស់ស្អាត ហើយលោកសុំឲ្យប្រជាពលរដ្ឋជាអ្នកធ្វើដំណើរ ពេលមានផ្លូវស្អាតហើយកុំបើកបរលឿនពេកជាហេតុបង្កឱ្យមានគ្រោះថ្នាក់ជាយថាហេតុ។
គួររំលឹកថា កំណាត់ផ្លូវជាតិនេះកាលពីមុនពេលស្ថាបនា គឺបង្ករកាពិបាកធ្វើដំណើរទៅមករបស់អ្នកធ្វើដំណើរ ជាពិសេសប្រជាពលរដ្ឋតាមបណ្តាមូលដ្ឋាន ដោយសារតែកំណាត់ផ្លូវជាតិនេះ ជារៀងរាល់ឆ្នាំគឺប្រឈមមុខទៅនឹងការលិចលង់ពីទឹកទន្លេមេគង្គ ហើយការធ្វើដំណើរត្រូវឆ្លងទូកជាច្រើនតំណាក់កាល។ រីឯអ្នកធ្វើដំណើរគ្រប់មធ្យោបាយត្រូវសម្រេចចិត្តធ្វើដំណើរតាមផ្លូវជាតិលេខ៧ ដើម្បីឆ្ពោះទៅកាន់ខេត្តនៅតាមភូមិភាគឦសាន គឺត្រូវចំណាយពេលយូរ និងសោហ៊ុយច្រើនផង ក្នុងការធ្វើដំណើរ។
បុរសឈ្មោះមួង សំអេន អាយុ៤២ឆ្នាំ ជាប្រជាពលរដ្ឋរស់នៅភូមិព្រែកតាថឹង ឃុំបុសលាវ ស្រុកចិត្តបុរី ជាប្រជាពលរដ្ឋម្នាក់ក្នុងចំណោមប្រជាពលរដ្ឋជាច្រើនទៀត ដែលមានទីលំនៅជាប់នឹងកំណាត់ផ្លូវជាតិលេខ៧៣ បានសម្ដែងនូវសេចក្តីត្រេកអរយ៉ាងខ្លាំង ខណៈពេលដែលរាជរដ្ឋាភិបាលមានសម្តេចអគ្គមហាសេនាបតីជាប្រមុខបានផ្តល់ផ្លូវជាតិមួយខ្សែរដ៏ថ្មីសន្លាងនេះសំរាប់ឲ្យពួកគាត់ធ្វើដំណើរ ហើយប្រជាពលរដ្ឋបានរំពឹងទុកថា ចាប់ពីពេលនេះតទៅមុខមិនថាក្នុងរដូវវស្សា ឬរដូវប្រាំងទេ រាល់ការធ្វើដំណើររបស់ពួកគាត់គឺមិនចាំបាច់ឆ្លងទូកទៅមកនោះទៀតឡើយ៕
ចែករំលែកព័តមាននេះ