រាជធានីភ្នំពេញ ៖ អាជីវករលក់ដូរលើដងផ្លូវលេខ២៣៥ ខាងកើតផ្សារដើមគ ស្ថិតក្នុងសង្កាត់ផ្សារដើមគ បានទទូចមិនឱ្យអាជ្ញាធរដាក់លូរំដោះទឹកដោយសំអាងហេតុផលថា ការដាក់លូនេះធ្វើឱ្យប៉ះពាល់ដល់ការលក់ដូររបស់ពួកគាត់ នៅលើទ្រូងផ្លូវ ។ នេះជាសំណូមពររបស់អាជីវករនៅក្នុងឱកាសជួបប្រជុំជាមួយអាជ្ញាធរ ខណ្ឌ
រាជធានីភ្នំពេញ ៖ អាជីវករលក់ដូរលើដងផ្លូវលេខ២៣៥ ខាងកើតផ្សារដើមគ ស្ថិតក្នុងសង្កាត់ផ្សារដើមគ បានទទូចមិនឱ្យអាជ្ញាធរដាក់លូរំដោះទឹកដោយសំអាងហេតុផលថាការដាក់លូនេះធ្វើឱ្យប៉ះពាល់ដល់ការលក់ដូររបស់ពួកគាត់នៅលើទ្រូងផ្លូវ ។ នេះជាសំណូមពររបស់អាជីវករនៅក្នុងឱកាសជួបប្រជុំជាមួយអាជ្ញាធរខណ្ឌទួលគោក នៅសាលាខណ្ឌកាលពីរសៀលថ្ងៃទី២១ កក្កដា ក្រោមអធិបតីភាពលោកធឹម សំអាន អភិបាលរងខណ្ឌ ក្នុងគោលបំណងសម្របសម្រួលរកវិធីដោះស្រាយជូនអាជីវករ ដែលបានធ្វើការតវ៉ា ។
គួរបញ្ជាក់ថា កាលពីព្រឹកថ្ងៃទី១៩ ខែកក្កដាឆ្នាំ២០១១ មានអាជីវករប្រមាណ៥០នាក់ ដែលអះអាងថាជាតំណាងឱ្យអាជីវករប្រមាណ៣០០នាក់ លក់ដូរលើដងផ្លូវលេខ២៣៥ ខាងកើតផ្សារដើមគ បាននាំគ្នាទៅក្រោមដើមពោធិ៍មុខវត្តបទុមវតី ដើម្បីសុំកិច្ចអន្តរាគមន៍ពីសម្តេចអគ្គមហាសេនាបតីតេជោហ៊ុន សែន ដើម្បីឱ្យបានលក់ដូរលើទីតាំងដើមដដែល ។ ការទាមទារនេះ គឺបន្ទាប់ពីសាលាសង្កាត់ផ្សារដើមគ ចេញសេចក្តីជូនដំណឹងដល់បងប្អូនប្រជាពលរដ្ឋមានលំនៅឋានតាមផ្លូវលេខ២៣៩ ផ្លូវលេខ២៣៥ ផ្លូវលេខ២៧២ ក្នុងសង្កាត់ផ្សារដើមគ ពីគម្រោងដាក់ប្រព័ន្ធលូថ្មី ព្រមទាំងសូមឱ្យប្រជាពលរដ្ឋរុះរើសំណង់ទាំងឡាយចេញឱ្យបានមុនថ្ងៃទី១៥ ខែ កក្កដា ឆ្នាំ២០១១ និងបានដឹកនាំកម្លាំងចុះទៅរុះរើកាលពីព្រឹកថ្ងៃទី១៨កក្កដា តែត្រូវអាជីវកររារាំង ។
សូមរំលឹកថា ការទាមទារសុំលក់នៅលើដងផ្លូវនេះត្រូវបានសាលារាជធានីភ្នំពេញអនុញ្ញាតឱ្យលក់ដូរជាបណ្តោះអាសន្នរួចហើយរង់ចាំអាជ្ញាធរដោះស្រាយរកកន្លែងលក់ដូរថ្មីនៅសង្កាត់ព្រៃស ខណ្ឌដង្កោ តែអ្វីដែលកំពុងប្រឈមមុខគឺអាជីវករបានសំណូមពរមិនឱ្យដាក់លូ ដែលគម្រោងអភិវឌ្ឍន៍សង្កាត់ឆ្នាំ២០១១ត្រូវបានសិក្សារួចរាល់ហើយនោះ ។
លោកគង់ សុផាន់ ចៅសង្កាត់ផ្សារដើមគបានឱ្យដឹងថា នៅឆ្នាំ២០១១ តាមគម្រោងអភិវឌ្ឍន៍សង្កាត់គឺដាក់ប្រព័ន្ធលូចំនួន៣ខ្សែ ដែលមានមុខកាត់០,៥០ម៉ែត្រ ដើម្បីរំដោះទឹកដែលមានប្រវែង៦៤០ម៉ែត្រ ។ ដោយឡែក នៅតាមផ្លូវលេខ២៣៥ មានប្រវែង២០០ម៉ែត្រ ហើយមានការប៉ះពាល់តូបអាជីវករលក់ដូរលើដងផ្លូវ ប្រវែង៥០ម៉ែត្រដែលក្នុងនោះមានតូបប្រមាណ៨ប៉ុណ្ណោះ ។ លោកចៅសង្កាត់បានបន្តទៀតថា មុននឹងធ្វើការអភិវឌ្ឍគឺមានការសិក្សាគម្រោងយ៉ាងច្បាស់លាស់ និងបានដាក់ដេញថ្លៃនៅសាលាខណ្ឌ ព្រមទាំងជូនដំណឹងដល់បងប្អូនត្រឹមត្រូវតែត្រូវបានអាជីវករលក់ដូរលើដងផ្លូវលេខ២៣៥ជំទាស់ ។
នៅក្នុងការជួបប្រជុំនោះ អាជីវករទាំងអស់ក៏បានសំណូមពរដល់អាជ្ញាធរមិនឱ្យដាក់ប្រព័ន្ធលូនោះ ដោយសំអាងហេតុផលថាធ្វើឱ្យមានការប៉ះពាល់ដល់ការលក់ដូររបស់ពួកគាត់។ លោកធឹម សំអាន អភិបាលរងខណ្ឌទួលគោក ឱ្យដឹងថា ការជួបប្រជុំជាមួយអាជីវករនៅពេលនេះគឺដើម្បីពិភាក្សារកវិធីដោះស្រាយដំណើរការអភិវឌ្ឍន៍ដាក់ប្រព័ន្ធលូ ព្រោះទីក្រុងយើងតម្រូវឱ្យមានការអភិវឌ្ឍកាន់តែប្រសើរឡើង ។ លោកអភិបាលរងខណ្ឌក៏បានសំណូមពរដល់អាជីវករឱ្យជួយសម្រួលដល់ការដាក់លូនេះ រួចហើយអាចលក់ដូរបានជាបណ្តោះអាសន្នរង់ចាំសាលារាជធានីភ្នំពេញដោះស្រាយរកកន្លែងថ្មីឱ្យលក់ដូរបាន។ ទោះបីជាយ៉ាងណា អាជីវករនៅតែប្រកាន់ជំហរមិនយល់ព្រមឱ្យរុះរើតូប ហើយទាមទារសុំមិនឱ្យដាក់ប្រព័ន្ធលូ ។
លោកធឹម សំអាន ក៏បានសំណូមពរដល់អាជីវករត្រូវរង់ចាំលោករាយការណ៍ទៅសាលារាជធានីភ្នំពេញសិន ដើម្បីសុំគោលការណ៍ដោះស្រាយបន្ត។ យ៉ាងណាក៏ដោយ ការអភិវឌ្ឍដាក់ប្រព័ន្ធលូមិនអាចអត់បានទេព្រោះប្រជាពលរដ្ឋរស់នៅតំបន់ផ្សារដើមគត្រូវការលូរំដោះទឹក ៕
ចែករំលែកព័តមាននេះ