ខេត្តកំពង់ចាម ៖ ក្រៅពីកិច្ចការពារសន្តិសុខសណ្តាប់ធ្នាប់ជូនប្រជាពលរដ្ឋ ក្នុងពេលកន្លងទៅថ្មីៗនេះលោកវរសេនីយ៍ត្រី ឯម កុសល អធិការនគរបាលស្រុកមេមេត់ និងសហការីបាននាំយកសំភារ ទេយ្យវត្ថុទៅប្រគេនដល់ព្រះសង្ឃ ដែលគង់ចាំព្រះវស្សានៅវត្តគិរីសុវណ្ណរាមបុស្សតាមអ៊ឹម និងវត្តគិរីសុវណ្ណរាមកន្ទួត ស្ថិតនៅក្នុង ឃុំជាំតាម៉ៅ ស្រុកមេមត់ ។
តាមលោក វ៉ា រ៉ា នាយផ្នែកសេនាធិការ នគរបាលស្រុកមេមត់ឲ្យដឹងថា ក្រោមការផ្តួចផ្តើមគំនិតពីលោកអធិការ អធិការរងនគរបាលស្រុកមេមត់ជារៀងរាល់ឆ្នាំតែងតែនាំយកគ្រឿងឧបភោគបរិភោគដើម្បីទៅប្រគេនដល់ព្រះចៅអធិការវត្តទាំង២នោះមិនដែលអាក់ខានម្តងណាឡើយ ។
លោកនាយផ្នែកសេនាធិការបន្តថា នៅ វេលាម៉ោង២និង៣០នាទីរសៀល ថ្ងៃទី១៥ កក្កដា ២០១១ លោកវរសេនីយ៍ត្រី ឯម កុសល ជាសមាជិកអចិន្ត្រៃយ៍បក្សស្រុកមេមត់ជួយ ឃុំជាំតាម៉ៅ និងសហការីនាំកំលាំងនៅក្រោមឱវាទជាច្រើននាក់យក ទៀនវស្សា២គូ សាដក៨ អង្ករ២បាវ ទឹកក្រូច៤កេស ទឹកស៊ីអ៊ីវ៤យួរ ទឹកត្រី៤យួរ កំណាត់ស២០ដុំ មីយើង៤កេស ប្រេងម៉ាស៊ូត២កាន ទឹកបរិសុទ្ធ៨យួរសំរាប់បែងចែក២វត្តនោះ ។
ថវិកាប្រគេនព្រះចៅអធិការវត្ត ព្រមទាំងតាជី យាយជី២០នាក់ សរុបចំណាយអស់ចំនួន១.៩៣៤.០០០រៀល ។
ចំណែកលោកអនុសេនីយ៍ឯក កែវ សំនៀង អធិការរងនគរបាលស្រុកមេមត់ទទួលផែនយុត្តិធម៌វិញបានឲ្យដឹងថា នៅក្នុងរដូវចូល វស្សាឆ្នាំនេះរូបលោកបានយកទៀនវស្សាទៅប្រគេននៅវត្តចាន់មូល ឃុំចាន់មូល ស្រុកមេមត់ ហើយបានសំណេះសំណាលជាមួយតាជី យាយជី និងពុទ្ធបរិស័ទចំណុះជើងវត្ត ដោយលើកឡើងពីគោលនយោបាយភូមិ-ឃុំមានសុវត្ថិភាព ដើម្បីឲ្យបានជ្រួតជ្រាបយល់ដឹងគ្រប់ទាំង១៤ឃុំនៅស្រុកមេមត់ ៕
ចែករំលែកព័តមាននេះ