ខេត្តកំពង់ស្ពឺ ៖ នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ស្ពឺ លោក ជាម ចន្ទ័សោភ័ណ បានធ្វើការក្រើនរំលឹកទៅដល់មន្ទីរជំនាញពាក់ព័ន្ធ និងអាជ្ញាធរក្រុងស្រុកទាំង៩ ឱ្យបង្កើនការយកចិត្តទុកដាក់ឱ្យបានខ្ពស់…
ខេត្តកំពង់ស្ពឺ ៖ នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ស្ពឺ លោក ជាម ចន្ទ័សោភ័ណ បានធ្វើការក្រើនរំលឹកទៅដល់មន្ទីរជំនាញពាក់ព័ន្ធ និងអាជ្ញាធរក្រុងស្រុកទាំង៩ ឱ្យបង្កើនការយកចិត្តទុកដាក់ឱ្យបានខ្ពស់ ដើម្បីឆ្លើយតបប្រកបដោយប្រសិទ្ធិភាព និងតម្លាភាពរាល់សំណើ សំណូមពរ និងតម្រូវការរបស់ប្រជាពលរដ្ឋក្នុងមូលដ្ឋាន។
ការជម្រុញបែបនេះ ធ្វើឡើងក្នុងវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តកំពង់ស្ពឺ ក្នុងក្រុងច្បារមន ខេត្តកំពង់ស្ពឺ ក្រោមវត្តមានលោក យឹម សុខុម ប្រធានក្រុមប្រឹក្សាខេត្ត ថ្ងៃទី២៧ ខែវិច្ឆិកា ឆ្នាំ២០២៥ ។
លោក ជាម ចន្ទ័សោភ័ណ ប្រធានគណបញ្ជាការឯកភាព និងជាអភិបាលខេត្តកំពង់ស្ពឺ បានលើកឡើងថា អាជ្ញាធរដែលបម្រើពលរដ្ឋបានល្អ មូលដ្ឋានមិនមានបញ្ហាប្រឈមនោះទេ ហើយបើសេវាល្អ នោះពលរដ្ឋក៏គ្មានកង្វល់ដែរ ដូច្នេះ ជាមន្ត្រី ជាអាជ្ញាធរគឺត្រូវតែចុះជាប់ និងតាមដានរាល់សំណើសំណូពរ និងតម្រូវការចាំបាច់នានារបស់ពលរដ្ឋ ហើយក្នុងករណីទទួលបាននូវសំណើ សំណូពរ និងតម្រូវការក្នុងនាមជាមន្ត្រី ជាអាជ្ញាធរគឺត្រូវឆ្លើយតបឱ្យទាន់ពេលវេលា ក្នុងករណីមិនអាចដោះស្រាយបានត្រូវដាក់រាល់សំណើរនិងសំនូមពរទាំងនោះមករដ្ឋបាលខេត្តដើម្បីពិនិត្យនិងដោះស្រាយបន្ត ។
លោក ជាម ច័ន្ទសោភ័ណ បានបន្តថា រាល់ការផ្តល់ជូនដល់ប្រជាពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយសម្រាប់លើកកម្ពស់ គណនេយ្យភាព តម្លាភាព ក្នុងដំណើរការពិនិត្យមើល លើការផ្តល់សេវាសាធារណៈរបស់រដ្ឋបាលខេត្ត រដ្ឋបាលស្រុក និង រដ្ឋបាលឃុំ-សង្កាត់ ក្នុងគោលបំណងដើម្បីធានាថា រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋានត្រូវបានពិនិត្យដោះស្រាយ និងឆ្លើយតប។ក្នុងនោះគ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានរួមបញ្ចូលបរិយាប័នទៅក្នុងដំណើរការនៃការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ។
ជាមួយនេះ ប្រធានគណបញ្ជាការឯកភាព និងជាអភិបាលខេត្តកំពង់ស្ពឺក៏បានបញ្ជាក់បន្ថែមថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ស្ពឺ គឺជាការផ្តល់ឱកាសជូនប្រជាពលរដ្ឋ បានប្រាស្រ័យទាក់ទងគ្នាទៅវិញទៅរវាងរដ្ឋបាលខេត្ត ជាមួយរដ្ឋបាលស្រុក-ក្រុងនិងរដ្ឋបាលឃុំ-សង្កាត់ ប្រជាពលរដ្ឋ តំណាងសង្គមស៊ីវិល និងវិស័យឯកជន ក្រុមប្រឹក្សាប្រភេទផ្សេងៗគ្នា ដើម្បីផ្លាស់ប្តូរនូវបទពិសោធន៍ និងផ្តល់ប្រឹក្សាអំពីអាទិភាពនៃការអភិវឌ្ឍន៍មូលដ្ឋានប្រកបដោយ ចីរភាព តម្លាភាព ប្រសិទ្ធភាព និងបរិយាបន្ន។
សូមបញ្ជាក់ថា នៅក្នុងវេទិកាផ្សព្វផ្សាយនេះ តំណាងពលរដ្ឋក្នុងក្រុងច្បារមនបានធ្វើការសំនូមពរដល់អាជ្ញាធរនិងមន្ទីរពាក់ព័ន្ធឱ្យជួយពិនិត្យនិងដោះស្រាយចំពោះប្រជាពលរដ្ឋចំនួន៥គ្រួសាររំលោភយកដីចំណីផ្លូវធ្វើជាកម្មសិទ្ធិ សង់សំណង់មិនរៀបរយបង្កផលប៉ះពាល់ដល់ការធ្វើចរាចរណ៍របស់ប្រជាពលរដ្ឋក្នុងមូលដ្ឋាន សុំឱ្យមានការកែលម្អស្ថានភាពផ្លូវក្នុងក្រុងជាច្រើនខ្សែកំពុងរងផលប៉ះពាល់ក្នុងខែវស្សាពិបាកក្នុងការធ្វើដំណើរ ស្ពានលូមួយចំនួនត្រូវបានជនឱកាសនិយមចាក់ដីរំលោភបិទមុខទឹកបង្កការជនលិច និងសុំឱ្យមានចុះបញ្ជីក្បាលដីបំពេញបន្ថែម។ជាងនេះបានសុំឱ្យមន្ត្រីមូលដ្ឋានយកចិត្តទុកដាក់ក្នុងការបម្រើសេវាសាធារណៈកុំចាំទាល់តែបានប្រយោជន៍ ទើបខ្នះខ្នែង និងពន្លឿនលើកិច្ចការងារផ្តល់សេវា៕
ចែករំលែកព័តមាននេះ