ទីក្រុងប៉ារីស៖ ក្រុមហ៊ុនផលិតយន្តហោះអ៊ែបឺស (Airbus) ប្រកាសឱ្យក្រុមហ៊ុនអាកាសចរណ៍នានាដែលកំពុងប្រើប្រាស់យន្តហោះស៊េរីអេ៣២០ (A320) ចំនួន៦ពាន់គ្រឿងធ្វើបច្ចុប្បន្នភាពសូហ្វវែជាបន្ទាន់។ ការជួសជុលនេះគឺការវិលថយក្រោយទៅរកសូហ្វវែស៊េរីចាស់ឡើងវិញ។ ក្រុមហ៊ុនអាកាសចរណ៍ទូទាំងពិភពលោកមិនថាអាមេរិក អាមេរិកខាងត្បូង អឺរ៉ុប…
ទីក្រុងប៉ារីស៖ ក្រុមហ៊ុនផលិតយន្តហោះអ៊ែបឺស (Airbus) ប្រកាសឱ្យក្រុមហ៊ុនអាកាសចរណ៍នានាដែលកំពុងប្រើប្រាស់យន្តហោះស៊េរីអេ៣២០ (A320) ចំនួន៦ពាន់គ្រឿងធ្វើបច្ចុប្បន្នភាពសូហ្វវែជាបន្ទាន់។ ការជួសជុលនេះគឺការវិលថយក្រោយទៅរកសូហ្វវែស៊េរីចាស់ឡើងវិញ។ ក្រុមហ៊ុនអាកាសចរណ៍ទូទាំងពិភពលោកមិនថាអាមេរិក អាមេរិកខាងត្បូង អឺរ៉ុប ឥណ្ឌា នូវែលហ្សឡង់នោះទេសុទ្ធតែនិយាយដូចៗគ្នាថាការជួសជុលសូហ្វវែនៅក្នុងយន្តហោះអាចពន្យារពេលការហោះហើរ ឬត្រូវលុបចោលការហោះហើរតែម្ដង។
ការប្រកាសប្រមូលយន្តហោះមកវិញដើម្បីធ្វើបច្ចុប្បន្នភាពសូហ្វវែនោះបន្ទាប់ពីមានបញ្ហាមិនប្រក្រតីកើតឡើងចំពោះយន្តហោះមួយគ្រឿងរបស់ក្រុមហ៊ុនចិតប៊្លូ (JetBlue)។ ពេលនោះ យន្តហោះបានចាកចេញដំណើរពីប្រទេសម៉ិកស៊ីកូឆ្ពោះទៅរដ្ឋញូជេស៊ី ប្រទេសអាមេរិក។ នៅពេលហោះដល់ចំណុចមួយនៃរដ្ឋផ្លរីដា យន្តហោះស្រាប់តែចុះចតជាបន្ទាន់ដោយសារពេលនោះយន្តហោះធ្លាក់ចុះមកក្រោម។
ក្រុមហ៊ុនអ៊ែបឺសថ្លែងថាក្រោយការវិភាគទៅលើយន្តហោះរបស់ក្រុមហ៊ុនចិតប៊្លូនោះរួចមក គេឃើញថាបញ្ហាបណ្ដាលមកពីយន្តហោះទទួលរងកាំរស្មីរបស់ព្រះអាទិត្យខ្លាំងពេកជាហេតុធ្វើឱ្យខូចទិន្នន័យរបស់សូហ្វវែដែលចាំបាច់បំផុតសម្រាប់គ្រប់គ្រងការហោះហើរជាប្រក្រតី។ យន្តហោះអ៊ែបឺសផ្សេងទៀតមិនមានបញ្ហាអ្វីទេ បញ្ហាកើតឡើងតែចំពោះអ៊ែបឺសស៊េរីអេ៣២០ប៉ុណ្ណោះ។
ភ្នាក់ងារសុវត្ថិភាពអាកាសចរណ៍របស់អឺរ៉ុបបានចេញបទបញ្ជាមួយតម្រូវឱ្យក្រុមហ៊ុនអាកាសចរណ៍នានាដែលប្រើប្រាស់យន្តហោះអ៊ែបឺសស៊េរីអេ៣២០ប្រញាប់ដោះស្រាយបញ្ហានេះ។ ទីភ្នាក់ងារនេះទទួលស្គាល់ថាការអនុវត្តតាមនីតិវិធីនេះនឹងប៉ះពាល់រយៈពេលខ្លីទៅលើតារាងធ្វើដំណើរ។ ក្រុមហ៊ុនអាមេរិកាំង អ៊ែឡាញមានយន្តហោះអ៊ែបឺសស៊េរីនេះចំនួន៤៨០គ្រឿង។ ក្នុងនោះ ២០៩គ្រឿងរងផលប៉ះពាល់។ ការជួសជុលសូហ្វវែឱ្យដំណើរការបានស្រួលឡើងវិញត្រូវការពេលប្រហែល២ម៉ោង។ នេះបើយោងតាមការផ្សាយរបស់អេភី (AP), រ៉យទ័រ (Reuters) និងប្រភពដទៃទៀត៕
ចែករំលែកព័តមាននេះ