ទីក្រុងកៀវ៖ មេបញ្ជាការកំពូលរបស់អ៊ុយក្រែនអះអាងថាកងទ័ពរបស់លោកនៅតែបន្តការតស៊ូការពារទីតាំងឈរជើងនៅទីក្រុងឃូពីយ៉ាន់ (Kupiansk) ដដែលទោះបីរុស្ស៊ីចេញសេចក្ដីប្រកាសថាកងទ័ពរបស់ពួកគេបានចូលគ្រប់គ្រងទីនោះទាំងស្រុងក៏ដោយ។ គ្រាន់តែចាប់ផ្ដើមផ្ទុះសង្គ្រាមអ៊ុយក្រែនបានតែប៉ុន្មានអាទិត្យប៉ុណ្ណោះ រុស្ស៊ីវាយយកបានទីក្រុងឃូពីយ៉ាន់បាត់ទៅហើយ។ ប៉ុន្តែក្រោយមក អ៊ុយក្រែនអាចវាយយកបានទីក្រុងនេះមកវិញនៅឆ្នាំដដែលនោះ។
ស្រាប់តែកាលពីសប្ដាហ៍មុននេះ លោកពូទីនប្រកាសថាទីក្រុងឃូពីយ៉ាន់ស្ថិតក្រោមការគ្រប់គ្រងរបស់រុស្ស៊ីទាំងស្រុង។ កាលពីថ្ងៃព្រហស្បតិ៍សប្ដាហ៍នេះ នៅពេលបំពេញទស្សនកិច្ចនៅប្រទេសកៀគីស្ថាន (Kyrgyzstan) លោកពូទីនបញ្ជាក់ម្ដងទៀតថាទីក្រុងនេះធ្លាក់ទៅក្នុងដៃរបស់យើងទាំងស្រុងហើយ។ ឆ្លើយតបទៅនឹងការអះអាងនេះ អគ្គបញ្ជាការកងទ័ពអ៊ុយក្រែន ឧត្ដមសេនីយ៍អូឡិចសាន់ដឺ ស៊ីស្គី (Oleksandr Syrskyi) ចេញមុខបដិសេធយ៉ាងដាច់អហង្ការ។
លោកស៊ីស្គីបានបង្ហោះសារនៅលើតេឡេក្រាមថាកងទ័ពរបស់យើងនៅតែបន្តការតស៊ូការពារទីក្រុងនេះ និងបន្តបើកប្រតិបត្តិការស្រាវជ្រាវ និងវាយប្រហារ (ទៅលើក្រុមបច្ចាមិត្ត)។ លោកសរសេររៀបរាប់ដូចខាងលើនេះបន្ទាប់ពីចុះពិនិត្យមើលសភាពការណ៍នៅតំបន់ខាគីវ (Kharkiv)។
លោកសរសេរបន្តទៀតថាសកម្មភាពទាំងនេះកើតឡើងជាប្រចាំថ្ងៃដើម្បីទុកជាវិធានការដ៏ហ្មត់ចត់ក្នុងការថែរក្សាស្ថិរភាពនៅទីក្រុងឃូពីយ៉ាន់។ ទំហំនៃការនិយាយភូតកុហករបស់ថ្នាក់ដឹកនាំរុស្ស៊ីពាក់ព័ន្ធនឹងស្ថានការណ៍សឹកនៅឃូពីយ៉ាន់នោះគួរឱ្យភ្ញាក់ផ្អើល។ មេបញ្ជាការរូបនេះថ្លែងបន្តទៀតថាកងទ័ពអ៊ុយក្រែននៅតែបន្តកាន់កាប់ខ្សែត្រៀមមុខ និងបន្តវាយប្រហារយ៉ាងខ្លាំងក្លាដើម្បីបិទខ្ទប់ផ្លូវដឹកជញ្ជូនរបស់ពួកសត្រូវ។
ក្រៅពីវាយសម្រុកយ៉ាងខ្លាំងក្លារហូតដល់ទីក្រុងឃូពីយ៉ាន់ក្លាយជាផេះដើម្បីដណ្ដើមកាន់កាប់ទីក្រុងនេះ រុស្ស៊ីក៏កំពុងវាយសម្រុកទៅលើទីក្រុងផូករ៉ូសវ (Pokrovsk) ផងដែរ។ ទីនេះជាមជ្ឈមណ្ឌលកណ្ដាលនៃការដឹកជញ្ជូនភស្តុភារទៅតំបន់ដូញែត។ លោកពូទីនអះអាងថារុស្ស៊ីកាន់កាប់ផូករ៉ូសបាន៧០%។ ក្រសួងការពារជាតិរុស្ស៊ីប្រកាសថាកងទ័ពរបស់ខ្លួនទើបតែវាយយកបានសង្កាត់ចំនួន២ទៀតនៃទីក្រុងនេះ។
លោកស៊ីស្គីថ្លែងថាកងទ័ពអ៊ុយក្រែនបន្តបិទខ្ទប់ការប៉ុនប៉ងរបស់រុស្ស៊ីដែលចង់បើកការវាយប្រហារជាថ្មីទៅលើទីក្រុងផូករ៉ូស និងទីក្រុងក្បែរនោះឈ្មោះមៀណូរ៉ាត (Myrnohrad)។ កងទ័ពអ៊ុយក្រែនថ្លែងថារុស្ស៊ីវាយប្រហារ៦៥លើកដើម្បីព្យាយាមបំបែកខ្សែការពាររបស់អ៊ុយក្រែន។ នៅតំបន់ហ្សាប៉ូរីហ្សៀ រុស្ស៊ីក៏កំពុងវាយសម្រុកទៅមុខដោយសន្សឹមៗផងដែរ។ ប្រភពខ្លះថាកងទ័ពអ៊ុយក្រែនកំពុងបង្កើតខ្សែការពារឱ្យបានច្រើនជាន់បន្ថែមទៀតព័ទ្ធជុំវិញទីក្រុងហ៊ូលីយ៉ាប៉ូល (Huliaipole) ដើម្បីទប់ទល់នឹងការវាយប្រហារយ៉ាងសន្ធាប់ពីសំណាក់កងទ័ពរុស្ស៊ី។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ