ទីក្រុងហុងកុង៖ ពាក់ព័ន្ធនឹងហេតុការណ៍ឆេះអគារស្នាក់នៅរបស់ប្រជាជននៅទីក្រុងហុងកុងដែលបានឆក់យកជីវិតមនុស្ស១២៨នាក់នោះ អាជ្ញាធរកំពុងស្រាវជ្រាវចង់ដឹងថាតើមានករណីរំលោភបំពានទៅលើគោលការណ៍សុវត្ថិភាព និងសំណង់ដែរឬទេ។ កាលពីល្ងាចមិញ អាជ្ញាធរចាប់ខ្លួនមនុស្ស៨នាក់ថែមទៀតដែលជាប់ពាក់ព័ន្ធនឹងការឆេះនេះ។ នៅក្នុងចំណោមនោះមានអ្នកម៉ៅការសំណង់ និងអ្នកចាត់ការក្រុមហ៊ុនផ្ដល់ប្រឹក្សាផ្នែកវិស្វកម្ម។
ចំនួនមនុស្សស្លាប់ពិតប្រាកដប៉ុន្មាននាក់មិនទាន់ដឹងច្បាស់នៅឡើយទេ។ ក្រៅពីជនរងគ្រោះទាំង១២៨នាក់ដែលត្រូវអាជ្ញាធរបញ្ជាក់ថាបានស្លាប់ នៅមនុស្សបាត់ខ្លួន២រយនាក់ទៀតមិនទាន់ដឹងពួកគេមានសុខទុក្ខយ៉ាងណានៅឡើយទេ។ បន្ទាប់ពីភ្នាក់ងារអគ្គិភ័យបិទបញ្ចប់បេសកកម្មពន្លត់ភ្លើងទាំងស្រុង ឥឡូវនេះ ឈានដល់ដំណាក់កាលស្វែងរកអ្នកបាត់ខ្លួនវិញម្ដង។
អាជ្ញាធររកឃើញតម្រុយមួយចំនួនដែលជាកត្តាធ្វើឱ្យហេតុការណ៍នេះក្លាយជាសោកនាដកម្មឆក់យកជីវិតមនុស្សច្រើនដល់ថ្នាក់នេះ។ ក្នុងនោះ គេរកឃើញថានៅពេលភ្លើងចាប់ផ្ដើមឆេះ កណ្ដឹងប្រកាសអាសន្នមិនបានបញ្ចេញសំឡេងរោទិ៍ដើម្បីឱ្យអ្នករស់នៅក្នុងអគារទាំងនោះជម្លៀសខ្លួនទាន់ពេលវេលាទេ។ អាជ្ញាធរបានធ្វើតេស្តរួចហើយអត់ដំណើរការទេ។ មានកត្តាមួយទៀតដែលធ្វើឱ្យភ្លើងឆេះលឿន។ នោះគឺបន្ទះស្នោដែលប្រើប្រាស់សម្រាប់ការងារជួសជុលអគារដែលត្រូវចាត់ទុកថាជាកត្តាជំរុញ។
សូមរំលឹកថាកាលពីថ្ងៃព្រហស្បតិ៍ នគរបាលចាប់ខ្លួនមនុស្សបីនាក់ដែលជាអ្នកទទួលខុសត្រូវនៅក្នុងការជួសជុលអគារ។ ពួកគេអាចនឹងត្រូវចោទប្រកាន់ពីបទមនុស្សឃាត។ នគរបាលអះអាងថាក្រុមហ៊ុននេះធ្វើការខ្ជីខ្ជាឱ្យតែរួចពីដៃ។ ហេតុនេះវាជាកត្តាធំដែលជំរុញឱ្យមានភ្លើងឆេះ។ នៅក្នុងចំណោមមនុស្ស៨នាក់ដែលចាប់ខ្លួនលើកចុងក្រោយនោះ ២នាក់ជានាយកក្រុមហ៊ុនផ្ដល់ប្រឹក្សាខាងសាងសង់។ ពួកគេជាអ្នកផ្ដល់ឱវាទអំពីការជួសជុលត្រូវធ្វើបែបណាៗ។ ២នាក់ជាអ្នកគ្រប់គ្រងគម្រោងដែលមើលការខុសត្រូវលើការជួសជុល, ៣នាក់ជាក្រុមហ៊ុនម៉ៅការបន្តពីគេ និងទទួលបន្ទុកខាងរៀបចំរន្ទាឫស្សី។
អាជ្ញាធរអះអាងថាដំណើរការស៊ើបអង្កេតត្រូវការពេលពី៣ទៅ៤សប្ដាហ៍ដើម្បីកំណត់ថាហេតុអ្វីបានជាភ្លើងនេះមុនដំបូងឆេះចេញពីផ្ទះមួយល្វែងសោះស្រាប់តែឆេះរាលដាលឡើងទៅគ្រប់ជាន់នៃអគារ និងឆេះឆ្លងពីអគារដំបូងទៅអគារដទៃទៀតដែលស្ថិតនៅក្នុងប្លុកជាមួយគ្នា។ រដ្ឋាភិបាលក៏កំពុងគិតគូរផ្ដល់ប្រាក់សំណងមួយចំនួនសម្រាប់ក្រុមគ្រួសារជនរងគ្រោះផងដែរ។
ក្រុមគ្រួសារដែលស្លាប់សាច់ញាតិរបស់ខ្លួនម្នាក់នឹងទទួលបានប្រាក់២សែនដុល្លារហុងកុង (ប្រហែល២៥៧០០ដុល្លារអាមេរិក)។ គ្រួសារដែលរងផលប៉ះពាល់ដោយសារភ្លើងឆេះនឹងទទួលបានប្រាក់ឧបត្ថម្ភ៥ម៉ឺនដុល្លារហុងកុង (ប្រហែល៦៤០០ដុល្លារអាមេរិក) សម្រាប់ដោះស្រាយជីវភាពរស់នៅប្រចាំថ្ងៃ។ នេះបើយោងតាមប្រភពពីស៊ីអឹនអឹន (CNN), អឹនអេចខេ (NHK) និងប្រភពដទៃទៀត៕
ចែករំលែកព័តមាននេះ