ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី ប្រកាសពីការលាលែងពីតំណែងរបស់លោកអានឌ្រី យេម៉ាក (Andriy Yermak) ដែលជាប្រធានកិច្ចការទូទៅ និងជាមនុស្សជំនិតរបស់លោកហ្សេឡិនស្គីប្រៀបបាននឹងដៃស្ដាំរបស់គាត់។ ផ្ទះរបស់លោកយេម៉ាកត្រូវអង្គភាពប្រឆាំងអំពើពុករលួយ…
ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី ប្រកាសពីការលាលែងពីតំណែងរបស់លោកអានឌ្រី យេម៉ាក (Andriy Yermak) ដែលជាប្រធានកិច្ចការទូទៅ និងជាមនុស្សជំនិតរបស់លោកហ្សេឡិនស្គីប្រៀបបាននឹងដៃស្ដាំរបស់គាត់។ ផ្ទះរបស់លោកយេម៉ាកត្រូវអង្គភាពប្រឆាំងអំពើពុករលួយ សហការជាមួយការិយាល័យរដ្ឋអាជ្ញាចុះឆែកឆេរកាលពីល្ងាចមិញ។ ប្រភពខ្លះបង្ហើបឱ្យដឹងថានេះជាផ្នែកមួយនៃការស៊ើបអង្កេតដ៏ទូលំទូលាយពាក់ព័ន្ធនឹងអំពើពុករលួយបាត់លុយ១រយលានដុល្លារ។ រឿងអាស្រូវនេះនាំទៅដល់ការលាលែងពីតំណែងនៃរដ្ឋមន្ត្រីក្រសួងថាមពល និងរដ្ឋមន្ត្រីក្រសួងយុត្តិធម៌។
គួរកត់សម្គាល់ថាការលាលែងពីតំណែងរបស់លោកយេម៉ាកកើតឡើងចំពេលប្រទេសអ៊ុយក្រែនកំពុងរងសម្ពាធយ៉ាងខ្លាំងពីអាមេរិកដើម្បីទទួលយកផែនការសន្តិភាពដែលផ្ដួចផ្ដើមឡើងដោយលោកត្រាំ។ លោកយេម៉ាកជាអ្នកដឹកនាំគណៈប្រតិភូដើម្បីចរចាជាមួយអាមេរិក និងរុស្ស៊ី។ គាត់ក៏ជាមនុស្សដ៏គួរឱ្យជឿទុកចិត្តរបស់លោកហ្សេឡិនស្គីជាច្រើនឆ្នាំមកហើយ។
អ្នកនាំពាក្យរបស់លោកយេម៉ាកថ្លែងថាអង្គភាពប្រឆាំងអំពើពុករលួយមិនបានកំណត់មុខសញ្ញាថាលោកយេម៉ាកជាជនសង្ស័យនៅក្នុងអំពើពុករលួយទេ។ ប៉ុន្តែការឆែកឆេរនេះទទួលបានការអនុញ្ញាតត្រឹមត្រូវ។ លោកយេម៉ាកបញ្ជាក់ថាក្រុមអ្នកស៊ើបអង្កេតពិតជាបានចុះឆែកឆេរលំនៅដ្ឋានរបស់លោកនៅបរិវេណវិមានប្រធានាធិបតីនៃទីក្រុងកៀវ។ សារព័ត៌មានក្នុងស្រុកចុះផ្សាយថាការិយាល័យធ្វើការរបស់លោកយេម៉ាកក៏ត្រូវបានឆែកឆេរផងដែរ។
គេមិនបានដឹងថាតើលោកយេម៉ាក និងលោកហ្សេឡិនស្គីស្ថិតនៅទីណាទេនៅពេលសមត្ថកិច្ចចុះឆែកឆេរ។ ប៉ុន្តែលោកយេម៉ាកបង្ហោះសារនៅលើតេឡេក្រាមថាក្រុមអ្នកស៊ើបអង្កេតអាចចុះឆែកឆេរដោយគ្មានការប្រទាំងប្រទើសអ្វីទាំងអស់។ លោកបានសហការយ៉ាងពេញលេញជាមួយពួកគេ ហើយមេធាវីរបស់លោកក៏មានវត្តមាននៅទីនោះផងដែរ។
ឥឡូវនេះ ដោយសារអ៊ុយក្រែនកំពុងផ្ទុះរឿងអាស្រូវពុករលួយដ៏ធំមួយបាត់លុយ១រយលានដុល្លារ ដូច្នេះការចូលឆែកឆេរ និងការចុះចេញពីតំណែងទាំងកណ្ដាលទីរបស់មន្ត្រីសំខាន់រូបនេះបានបង្កការភ្ញាក់ផ្អើលទូទាំងពិភពលោក។ ទោះជាយ៉ាងណាក្ដីរហូតមកដល់ពេលនេះ គេមិនទាន់ដឹងច្បាស់ថាតើករណីលោកយេម៉ាកមានជាប់ពាក់ព័ន្ធនឹងរឿងលុយពុករលួយនោះដែរឬទេ? ឬក៏ជាករណីផ្សេង?
អ្នកនាំពាក្យគណៈកម្មការអឺរ៉ុប (ដែលជាមែកធាងរបស់សហភាពអឺរ៉ុប) ថ្លែងថាខ្លួនកំពុងតាមដានព្រឹត្តិការណ៍នេះដោយយកចិត្តទុកដាក់។ ការឆែកឆេរនេះបង្ហាញថាស្ថាប័នប្រឆាំងអំពើពុករលួយនៅអ៊ុយក្រែនពិតជាកំពុងធ្វើការយ៉ាងសកម្ម។ មែនទែនទៅ ការប្រយុទ្ធប្រឆាំងនឹងអំពើពុករលួយជាចំណុចគន្លឹះនៃលក្ខខណ្ឌស្នើសុំចូលជាសមាជិកសហភាពអឺរ៉ុប។
ពាក់ព័ន្ធនឹងសំណុំរឿងបាត់លុយ១រយលានដុល្លារ ក្រុមអ្នកស៊ើបអង្កេតសង្ស័យថាបុគ្គលម្នាក់ឈ្មោះតៃមើ មីនឌីច (Tymur Mindich) ដែលធ្លាប់ជាដៃគូរកស៊ីជាមួយលោកហ្សេឡិនស្គីជាមេខ្លោងនៅពីក្រោយរឿងនេះ។ ប៉ុន្តែដោយសារបុគ្គលរូបនេះបានរត់គេចខ្លួនចេញពីប្រទេសអ៊ុយក្រែនបាត់ទៅហើយ ដូច្នេះបើសិនមានការបើកសវនាការកាត់ទោសគាត់ប្រហែលជាត្រូវកាត់ទោសទាំងកំបាំងមុខ។
អ្នកដែលឈឺក្បាលខ្លាំងជាងគេដោយសាររឿងអាស្រូវនេះគឺលោកហ្សេឡិនស្គីដែលត្រូវរ៉ាប់រងកិច្ចការ១រយចំពូក។ ម៉្យាងត្រូវរ៉ាប់រងធ្វើសង្គ្រាមដែលបន្តឆាបឆេះគ្មានថ្ងៃរលត់។ ម៉្យាងទៀត ផែនការសន្តិភាពហាក់ដូចជាធ្វើទៅតាមការចង់បានរបស់រុស្ស៊ី ហើយធ្វើឱ្យអ៊ុយក្រែនខាតបង់ច្រើន។ លោកពូទីនទើបតែនិយាយថ្មីៗនេះថាអ៊ុយក្រែនត្រូវដកកងទ័ពពីទីតាំងដែលពួកគេកំពុងឈរជើងដើម្បីប្រគល់ឱ្យរុស្ស៊ីតាមសម្រួល។ បើមិនដូច្នេះទេ រុស្ស៊ីនឹងបន្តធ្វើសង្គ្រាមដើម្បីវាយយកទឹកដីទាំងនោះដោយកម្លាំងយោធា។
បញ្ហាបាត់លុយនេះជារឿងរសើបព្រោះលោកត្រាំកំពុងតែកិកកុកមិនចង់ផ្ដល់ជំនួយជាបន្តទៀតទៅឱ្យអ៊ុយក្រែន។ លោកហ្សេឡិនស្គីកំពុងខិតខំធ្វើនយោបាយការទូតដើម្បីទទួលបានការគាំទ្រពីក្រុមបស្ចិមប្រទេសជាបន្តទៀត។ តាមពិត លោកយេម៉ាកមិនបានធ្វើអ្វីខុសទេ ប៉ុន្តែក្រុមអ្នកតំណាងរាស្ត្ររបស់គណបក្សប្រឆាំង និងគណបក្សរបស់លោកហ្សេឡិនស្គីផ្ទាល់យល់ថាលោកត្រូវតែទទួលខុសត្រូវនៅក្នុងរឿងនេះ (មានន័យថាត្រូវលាលែងពីតំណែង) ដើម្បីឲ្យរដ្ឋាភិបាលអ៊ុយក្រែនទទួលបានការជឿទុកចិត្តឡើងវិញពីមតិសាធារណៈ។ នេះបើយោងតាមប្រភពពីឡូសអេនជើឡេសថាមស៍ (Los Angeles Times) និងប្រភពដទៃទៀត៕
ចែករំលែកព័តមាននេះ