ទីក្រុងប៊ែឡាំង៖ ផែនការសម្ងាត់របស់អាល្លឺម៉ង់ដែលបានបែកធ្លាយកាលពីពេលថ្មីៗនេះបង្ហាញថារដ្ឋាភិបាលប្រទេសនេះកំពុងរៀបជើងព្រួលជាបណ្ដើរៗដើម្បីត្រៀមតតាំងជាមួយរុស្ស៊ីបើសិនមានសង្គ្រាមនាពេលអនាគត។ នៅក្នុងចំណោមផែនការធំៗនៃឯកសារសម្ងាត់នោះ អាល្លឺម៉ង់ត្រៀមចល័តកងទ័ពរបស់អង្គការណាតូរហូតដល់៨សែននាក់ដើម្បីដាក់ពង្រាយនៅតាមគោលដៅសំខាន់ៗ។ អាល្លឺម៉ង់ និងរុស្ស៊ីមិនចាវគ្នាប៉ុន្មានទេព្រោះប្រទេសទាំង២ធ្លាប់សាកកម្លាំងគ្នាកាលពីអំឡុងសង្គ្រាមលោកលើកទី២។ ម៉្យាងទៀត បើសិនផ្ទុះសង្គ្រាមជាថ្មី អាល្លឺម៉ង់គឺជាកំពែងជួរមុខគេនៅអឺរ៉ុបសម្រាប់ទប់ទល់នឹងរុស្ស៊ី។
សារព័ត៌មានវ៉លស្ទ្រីតជើណល (Wall Street Journal) របស់អាមេរិកបានចុះផ្សាយលម្អិតនូវសំណុំឯកសារកម្រាស់១២០០ទំព័រដែលគេឱ្យឈ្មោះថា «ផែនការប្រតិបត្តិការសឹកអាល្លឺម៉ង់ (Operation Plan Germany)»។ ឯកសារនេះត្រូវបានរៀបចំរួចរាល់អស់ហើយដោយមន្ត្រីយោធាជាន់ខ្ពស់របស់អាល្លឺម៉ង់។ ផែនការនេះបង្ហាញថាអាល្លឺម៉ង់ និងក្រុមសម្ព័ន្ធមិត្តរបស់ខ្លួនប្រហែលជាស៊ូទ្រាំរស់នៅក្នុងការសន្សំសុខតទៅទៀតមិនកើតទេ។ ជួនកាលយើងប្រាថ្នាចង់បានតែសុខ ប៉ុន្តែគេមិនឱ្យសុខ។
ដូច្នេះត្រូវរកវិធីតតាំងវិញដើម្បីធានាការរស់រានមានជីវិតនៃប្រទេសជាតិតទៅអនាគត។ នៅក្នុងឯកសារនោះ អាល្លឺម៉ង់ចង់ផ្ដោតសំខាន់លើការប្រើប្រាស់វិធានការសរុបដើម្បីការពារជាតិដូចដែលក្រុមអ្នករៀបចំឯកសារបានរៀបរាប់អីចឹងគឺថាទាំងប្រជាជនស៊ីវិល, ទាំងក្រុមហ៊ុនឯកជន និងទាំងស្ថាប័នរបស់រដ្ឋាភិបាលត្រូវស្រាក់ដៃគ្នានៅក្នុងការពារជាតិមាតុភូមិ។
យោងតាមការចុះផ្សាយរបស់វ៉លស្ទ្រីតជើណល មន្ត្រីយោធាជាន់ខ្ពស់របស់អាល្លឺម៉ង់មួយក្រុមបានចាប់ផ្ដើមបង្កើតផែនការនេះមិនមែនទើបតែពេលថ្មីៗនេះទេ។ ប៉ុន្តែបានរៀបចំតាំងពី២ឆ្នាំកន្លះមុនមកម៉្លេះ ពោលគឺមិនយូរប៉ុន្មានបន្ទាប់ពីរុស្ស៊ីចាប់ផ្ដើមដុតបញ្ឆេះសង្គ្រាមនៅអ៊ុយក្រែនកាលពីចុងខែកុម្ភៈ ឆ្នាំ២០២២។
ឯកសារកម្រាស់១២០០ទំព័រដែលរក្សាទុកជាការណ៍សម្ងាត់ និងដាក់នៅក្នុង «បណ្ដាញពណ៌ក្រហម» មិនងាយអ្នកណាបើកមើលផ្ដេសផ្ដាសបានទេ។ វាបានផ្ដល់នូវគោលការណ៍ណែនាំស៊ីជម្រៅស្ដីពីគម្រោងដាក់ពង្រាយកងទ័ពរបស់អង្គការណាតូ៨សែនាក់រួមទាំងទាហានអាមេរិកផងដែរទៅផ្ដុំគ្នានៅអាល្លឺម៉ង់បើសិនរុស្ស៊ីវាយប្រហារ។
ផែនការនេះក៏បានគូសវាសនូវផែនការផ្គត់ផ្គង់ភស្តុភារយ៉ាងស៊ីជម្រៅ និងទូលំទូលាយផងដែរ។ ក្នុងនោះមានផែនការរៀបចំកំពង់ផែ, ផ្លូវគោក, ទន្លេ និងផ្លូវរថភ្លើងសម្រាប់ដឹកជញ្ជូនកងទ័ព និងគ្រឿងបរិក្ខារយោធា។ ផែនការនេះត្រូវការការចូលរួមពីកងទ័ពផង និងជនស៊ីវិលផង។ ហេតុនេះហើយនៅក្នុងស្ថានភាពនោះ ទាំងក្រុមហ៊ុនឯកជន ទាំងប្រជាជន ទាំងរដ្ឋបាលថ្នាក់មូលដ្ឋាន និងក្រុមហ៊ុនម៉ៅការខាងសាងសង់ហេដ្ឋារចនាសម្ព័ន្ធត្រូវរួមសាមគ្គីគ្នាធ្វើកិច្ចការនេះ។
អ្វីដែលជាចំណុចស្នូលនៃផែនការនេះគឺការរៀបយុទ្ធសាស្ត្រការពារសន្តិសុខផ្ទៃក្នុងដើម្បីទប់ទល់នឹងអំពើវិទ្ធង្សនា (បំផ្លិចបំផ្លាញទ្រព្យសម្បត្តិជាលក្ខណៈស៊ីរូងផ្ទៃក្នុង), ការគំរាមកំហែងផ្នែកសន្តិសុខព័ត៌មានវិទ្យា និងការប្រឌិតព័ត៌មានបំពុលសង្គម។ ចំណុចខ្សោយដ៏ធំគឺអាល្លឺម៉ង់មិនទាន់វិនិយោគឱ្យបានពេញដៃពេញជើងនៅក្នុងវិស័យហេដ្ឋារចនាសម្ព័ន្ធខាងដឹកជញ្ជូននៅឡើយទេ។ របាយការណ៍របស់រដ្ឋាភិបាលបង្ហាញថា២០%នៃផ្លូវហាយវេ និងជាង២៥%នៃស្ពានអាកាសត្រូវការការជួសជុលកែលម្អជាបន្ទាន់។
ហេដ្ឋារចនាសម្ព័ន្ធរបស់អាល្លឺម៉ង់សព្វថ្ងៃនេះអាចប្រើការបានត្រឹមល្មមៗតែប៉ុណ្ណោះ។ ប៉ុន្តែបើចង់ប្រើការពេញបន្ទុកសម្រាប់ដឹកជញ្ជូនគ្រឿងបរិក្ខារយោធាធុនធ្ងន់លុះត្រាជួសជុល។ អ្នករៀបចំផែនការនេះក៏ទទួលស្គាល់ផងដែរថាត្រូវតែកែសម្រួលឡើងវិញបើចង់ឱ្យផែនការធ្វើសង្គ្រាមលើកនេះអនុវត្តដោយប្រសិទ្ធភាព។ វ៉លស្ទ្រីតជើណលបានដក់ស្រង់ពាក្យសម្ដីរបស់មន្ត្រីជាន់ខ្ពស់យោធាអាល្លឺម៉ង់មួយរូបដែលជាអ្នកចូលរួមរៀបចំផែនការនេះ។
លោកថាគោលដៅធំនៃផែនការនេះគឺដើម្បីទប់ស្កាត់មិនឱ្យកើតមានសង្គ្រាម។ យើងចង់ប្រាប់ទៅពួកបច្ចាមិត្តថាបើពួកគេចង់វាយប្រហារមកលើយើង ពួកគេមិនអាចទទួលជោគជ័យជាដាច់ខាត។ អធិការបតីអាល្លឺម៉ង់ធ្លាប់និយាយតាំងពីខែកញ្ញាថាការគំរាមកំហែងពិតជាមាន។ លោកថាថ្វីដ្បិតពេលនេះ យើងមិនទាន់ធ្លាក់ចូលទៅក្នុងភ្លើងសង្គ្រាមមែន ប៉ុន្តែយើងក៏មិនមែនកំពុងរស់នៅក្នុងសម័យសន្តិភាពនោះដែរ។ នេះបើយោងតាមប្រភពពីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ