ទីក្រុងប៉េកាំង៖ ប្រទេសចិនបង្ហាញការប្រឆាំងជំទាស់នឹងផែនការរបស់អាមេរិកដែលចង់អភិវឌ្ឍប្រព័ន្ធការពារដែនអាកាសដ៏ទំនើបឈ្មោះហ្គោលដឹនដូម (Golden Dome) ដែលបើកប្រតិបត្តិការនៅក្នុងទីអវកាស។ ចិនថាខ្លួននឹងប្រឆាំងជំទាស់យ៉ាងម៉ឺងម៉ាត់ទៅនឹងប្រព័ន្ធមីស៊ីលនេះព្រោះវាធ្វើឱ្យប៉ះពាល់ទៅដល់ប្រព័ន្ធសន្តិសុខរបស់ខ្លួន។ សារនយោបាយនេះចេញផ្សាយនៅក្នុងសៀវភៅសរបស់ប្រទេសចិនស្ដីពីការគ្រប់គ្រងគ្រឿងសព្វាវុធ, ការកាត់រំសាយអាវុធ និងការមិនរីកសាយភាយអាវុធ។ នៅក្នុងសៀវភៅនោះក៏មានចំណុចដែលពិភាក្សាអំពីការកសាងកម្លាំងនុយក្លេអ៊ែរផងដែរ។
ប្រទេសអាមេរិកសព្វថ្ងៃនេះត្រូវបានការពារដោយប្រព័ន្ធការពារជាតិដែលផ្សំគ្នារវាងប្រព័ន្ធរ៉ាដា និងប្រព័ន្ធមីស៊ីលសម្រាប់បាញ់ទម្លាក់មីស៊ីល ឬយន្តហោះរបស់បច្ចាមិត្តដែលហោះចូលដែនអាកាសរបស់ខ្លួន។ ប៉ុន្តែប្រព័ន្ធនេះការពារបានតែចំពោះការវាយប្រហារធម្មតាៗពីមីស៊ីលខ្នាតតូចតែប៉ុណ្ណោះ។ សម្រាប់មីស៊ីលអន្តរទ្វីបធំៗ ឬមីស៊ីលដែលបំពាក់បច្ចេកវិទ្យាទំនើបចុងក្រោយរបស់ចិន និងរុស្ស៊ី ខែលការពារដែនអាកាសនោះមិនអាចទប់ស្កាត់បានឡើយ។ ហេតុនេះហើយអាមេរិកយល់ថាខ្លួនត្រូវតែមានប្រព័ន្ធការពារដែលទំនើបជាងនេះ។
នៅពេលនេះ ការគំរាមកំហែងដោយមីស៊ីលនៅតែបន្តកើតមាន។ ក្នុងនោះ ប្រទេសចិនក៏កំពុងពន្លឿនការអភិវឌ្ឍក្បាលគ្រាប់នុយក្លេអ៊ែរសម្រាប់បំពាក់នៅលើមីស៊ីលជិតតាមទាន់អាមេរិក និងរុស្ស៊ីហើយ។ ដូច្នេះ រដ្ឋាភិបាលរបស់លោកត្រាំក៏កំពុងពន្លឿនការអភិវឌ្ឍប្រព័ន្ធការពារដែនអាកាសដែលមានឈ្មោះថាហ្គោលដឹនដូមដែលជាសំណាញ់មេឃាអាចមើលសព្វជ្រុងជ្រោយនៃភពផែនដី។
ថ្វីដ្បិតប្រទេសចិនធ្លាប់រិះគន់ប្រព័ន្ធការពារដែនអាកាសហ្គោលដឹនដូមរបស់អាមេរិកតាំងពីមុននេះទៅទៀត ប៉ុន្តែនៅក្នុងការហែក្បួនព្យុហយាត្រារំលឹកទិវាជ័យជម្នះកាលពីខែកញ្ញា ឆ្នាំនេះ ប្រទេសចិនក៏បានបង្ហាញអំពីគម្រោងអភិវឌ្ឍប្រព័ន្ធការពារជាតិស្រដៀងគ្នានេះដែរ។ ប្រព័ន្ធការពាររបស់ចិនប្រើប្រាស់ខែលការពារជាច្រើនស្រទាប់។ ចិនរិះគន់ថាហ្គោលដឹនដូមអាចធ្វើឱ្យចុះខ្សោយដល់តុល្យភាព និងស្ថិរភាពជាយុទ្ធសាស្ត្រនៅលើពិភពលោក។
នៅក្នុងសៀវភៅសដែលផ្សព្វផ្សាយដោយការិយាល័យព័ត៌មាននៃក្រុមប្រឹក្សារដ្ឋ ប្រទេសចិនបានចោទប្រកាន់ថាអាមេរិកកំពុងស្វះស្វែងរកការការពារសន្តិសុខដល់កម្រិតខ្ពស់បំផុតដោយអភិវឌ្ឍហ្គោលដឹនដូមដោយគ្មានពិគ្រោះយោបល់ជាមួយអ្នកណាទាំងអស់។ ចិនថាផែនការរបស់អាមេរិកនឹងធ្វើឱ្យប៉ះពាល់សន្តិសុខរបស់ប្រទេសដទៃ។
សៀវភៅសនោះសរសេររៀបរាប់បន្តទៀតថាប្រទេសចិននឹងប្រឆាំងជំទាស់ទៅនឹងសកម្មភាពទាំងឡាយណាដែលគំរាមកំហែង ឬធ្វើឱ្យប៉ះពាល់ផលប្រយោជន៍ជាតិរបស់ខ្លួន។ ប្រព័ន្ធការពារដែនអាកាសប្រឆាំងនឹងមីស៊ីលក្រោមគំនិតផ្ដួចផ្ដើមរបស់លោកត្រាំនឹងដាក់ពង្រាយអាវុធនៅក្នុងទីអវកាស។ ដូច្នេះនឹងគំរាមកំហែងសន្តិសុខនៅក្នុងទីអវកាសទៀត។ នេះបើយោងតាមការផ្សាយរបស់ញូស្វីក (Newsweek) និងប្រភពដទៃទៀត៕
អត្ថបទពាក់ព័ន្ធ
ចិនស្នើឱ្យអាមេរិកបោះបង់ចោលផែនការសាងសង់សំណាញ់មេឃានៅក្នុងទីអវកាស
ចែករំលែកព័តមាននេះ