ទីក្រុងបាងកក៖ ចំនួនមនុស្សស្លាប់ដោយសារគ្រោះទឹកជំនន់នៅប្រទេសថៃភាគខាងត្បូងកើនឡើងដល់១៤៥នាក់គិតតែសាកសពជនរងគ្រោះដែលបានរកឃើញតែប៉ុណ្ណោះ។ ក្រៅពីនេះមនុស្សជាច្រើននាក់ទៀតនៅតែបន្តបាត់ខ្លួន។ យោងតាមតួលេខជាផ្លូវការរបស់រដ្ឋាភិបាលដែលចេញផ្សាយនៅថ្ងៃនេះ គ្រាន់តែនៅខេត្តសុងខ្លាមួយប៉ុណ្ណោះ មនុស្សជាង១រយនាក់បានស្លាប់។
ហាក់ដូចជាមានបាតុភូតចម្លែកនៅប្រទេសថៃ។ នៅសុខៗ ទឹកជំនន់ស្រាប់តែវាយប្រហារយ៉ាងសន្ធាប់នៅបណ្ដាខេត្តភាគខាងត្បូង។ ជាពិសេសទីក្រុងហាតយ៉ៃ (Hat Yai) ដែលស្ថិតនៅជាប់ព្រំដែនម៉ាឡេស៊ីរងគ្រោះខ្លាំងជាងគេ។ ម៉ាឡេស៊ីក៏រងការវាយប្រហារដោយទឹកជំនន់ផងដែរនៅក្នុងរដ្ឋយ៉ាងតិច៧។ ប៉ុន្តែម៉ាឡេស៊ីស្លាប់តិចតួចតែប៉ុណ្ណោះ។
អ្នកនាំពាក្យរដ្ឋាភិបាលថៃថ្លែងថាអ្នកស្លាប់សរុបនៅបណ្ដាខេត្តភាគខាងត្បូងមានចំនួន១៤៥នាក់។ ក្នុងនោះ ខេត្តសុងខ្លាស្លាប់១១០នាក់។ តំបន់នោះត្រូវទឹកលិចភាគច្រើនបំផុត។ តំបន់ខ្លះលិចល្មមៗ ប្រជាជនចេះតែទ្រាំស្នាក់នៅក្នុងផ្ទះជាបន្តទៀត។ ប៉ុន្តែផ្ទះខ្លះត្រូវទឹកលិចខ្លាំងដល់ថ្នាក់ម្ចាស់ឡើងទៅសំកុកលើដំបូល។ មន្ទីរពេទ្យមួយកន្លែងប្រកាសថាកន្លែងទុកដាក់សាកសពបានពេញប្រៀប។
មន្ត្រីទទួលបន្ទុកខាងគ្រប់គ្រងគ្រោះមហន្តរាយប្រាប់ថាឥឡូវនេះឈានដល់ការស្រាយបញ្ហាក្រោយទឹកជំនន់បានស្រកទៅវិញ និងរៀបចំខេត្ត-ក្រុងនានាឱ្យវិលត្រឡប់ទៅរកសភាពធម្មតាឡើងវិញ។ រដ្ឋាភិបាលថៃអះអាងថាមនុស្សជាង១,៤ម៉ឺននាក់ត្រូវបានជម្លៀសចេញពីតំបន់ដែលរងផលប៉ះពាល់ដោយទឹកជំនន់។
ទីក្រុងហាតយ៉ៃទើបតែលែងមានភ្លៀងធ្លាក់នៅថ្ងៃនេះតែប៉ុណ្ណោះ។ ប៉ុន្តែនៅមានទឹកជំនន់លិចត្រឹមកែងជើង។ ប្រជាជនខ្លះនៅតែបន្តគ្មានភ្លើងអគ្គិសនីប្រើប្រាស់។ អ្នករស់នៅទីក្រុងនេះកំពុងពិនិត្យមើលទំហំនៃការខូចខាតទ្រព្យសម្បត្តិក្រោយពេលចាប់ផ្ដើមស្រកទៅវិញ។ បុរសម្នាក់និយាយថាគាត់បានបាត់បង់អ្វីៗទាំងអស់។ អ្នកខ្លះប្រាប់ថាពួកគេអាចរួចផុតពីសេចក្ដីស្លាប់មែន ប៉ុន្តែនៅតែរងផលប៉ះពាល់ដោយសារឥទ្ធិពលនៃទឹកជំនន់។ នេះបើយោងតាមការផ្សាយរបស់ឆេនណល ញូស៍ អេស៊ា និងប្រភពដទៃទៀត៕
ចែករំលែកព័តមាននេះ