រាជធានីភ្នំពេញ ៖ គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈទូទាំងប្រទេស នៃក្រសួងការងារ និងបណ្ដុះបណ្ដាលវិជ្ជាជីវៈ បានចេញញត្តិថ្កោលទោសចំពោះការបាញ់ប្រហាររបស់ភាគីថៃ មកលើប្រជាពលរដ្ឋស្លូតត្រង់កម្ពុជា នៅភូមិព្រៃចាន់ ។…
រាជធានីភ្នំពេញ ៖ គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈទូទាំងប្រទេស នៃក្រសួងការងារ និងបណ្ដុះបណ្ដាលវិជ្ជាជីវៈ បានចេញញត្តិថ្កោលទោសចំពោះការបាញ់ប្រហាររបស់ភាគីថៃ មកលើប្រជាពលរដ្ឋស្លូតត្រង់កម្ពុជា នៅភូមិព្រៃចាន់ ។
ញត្តិថ្កោលទោសរបស់វិទ្យាស្ថានជាតិពហុបច្ចេកទេសកម្ពុជា បានសរសេរថា ថ្នាក់ដឹកនាំ មន្ត្រីរាជការ សាស្ត្រាចារ្យ បុគ្គលិក និងសិស្ស-និស្សិតគ្រប់លំដាប់ថ្នាក់ នៃវិទ្យាស្ថានជាតិពហុបច្ចេកទេសកម្ពុជា ថ្កោលទោសយ៉ាងដាច់អហង្ការ ចំពោះអំពើយង់ឃ្នងបាញ់ប្រហាររបស់ភាគីថៃ មកលើប្រជាពលរដ្ឋស្លូតត្រង់កម្ពុជា នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នាល្ងាចថ្ងៃទី១២ ខែវិច្ឆិកា ឆ្នាំ២០២៥ ដែលបានបណ្តាលឱ្យមានប្រជាពលរដ្ឋខ្មែររបួស៣នាក់ និងស្លាប់បាត់បង់ជីវិត១នាក់ ។
វិទ្យាស្ថានជាតិពហុបច្ចេកទេសកម្ពុជា បានបន្តថា នេះជាអំពើគ្មានមនុស្សធម៌ រំលោភសិទ្ធិរស់រានមានជីវិតរបស់ប្រជាពលរដ្ឋ ស្លូតត្រង់នៃរដ្ឋអធិបតេយ្យមួយ ហើយទង្វើអមនុស្សធម៌ដ៏សាហាវឃោរឃៅនេះបង្ហាញយ៉ាងច្បាស់កាលដែលភាគីថៃបានរំលោភបំពានលើ “សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ” កាលពីថ្ងៃទី២៦ ខែតុលា ឆ្នាំ២០២៥ ដែលចុះហត្ថលេខា ដោយនាយករដ្ឋមន្ត្រីនៃប្រទេសកម្ពុជា និងថៃ ។
ដូចគ្នាដែរ វិទ្យាស្ថានជាតិបណ្តុះបណ្តាលបច្ចេកទេស ក៏បានចេញញត្តិថ្កោលទោសយ៉ាងដាច់អហង្ការ ចំពោះអំពើរំលោភបំពានយ៉ាងគឃ្លីនពីសំណាក់កងទ័ពថៃ ដែលបានបើកការបាញ់ប្រហារមកលើប្រជាពលរដ្ឋខ្មែរ ដែលបណ្តាលឱ្យបាត់បង់ជីវិតប្រជាពលរដ្ឋខ្មែរ ១នាក់ និងរបួសច្រើននាក់។ ថ្នាក់ដឹកនាំ មន្ត្រីរាជការ សាស្ត្រាចារ្យ បុគ្គលិក និងសិស្ស-និស្សិតគ្រប់លំដាប់ថ្នាក់ ក៏បានអំពាវនាវឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ ចំពោះការរំលោភបំពាន សេចក្តីថ្លែងការណ៍រួមស្តីពី កិច្ចព្រមព្រៀងសន្តិភាពរវាងកម្ពុជា និងថៃ និងសកម្មភាពខុសច្បាប់របស់ថៃម្តង ហើយម្តងទៀតនេះ ដោយទាមទារឱ្យថៃទទួលខុសត្រូវទាំងស្រុង ចំពោះការរំលោភបំពានដ៏កំរោលនេះ ។
សម្រាប់វិទ្យាស្ថានជាតិពាណិជ្ជសាស្ត្រវិញ ក៏បានញត្តិថ្កោលទោសយ៉ាងដាច់អហង្ការ ចំពោះអំពើរំលោភបំពានយ៉ាងគឃ្លីនពីសំណាក់កងទ័ពថៃ ដែលបានបើកការបាញ់ប្រហារមកលើប្រជាពលរដ្ឋខ្មែរ បណ្តាល ឱ្យបាត់បង់ជីវិតប្រជាពលរដ្ឋខ្មែរ១នាក់ និងរបួសច្រើននាក់។ បន្ថែមលើនេះ ថ្នាក់ដឹកនាំ មន្ត្រីរាជការ សាស្ត្រាចារ្យ បុគ្គលិក និងសិស្ស-និស្សិតគ្រប់លំដាប់ថ្នាក់ នៃវិទ្យាស្ថានជាតិពាណិជ្ជសាស្ត្រ ក៏បានអំពាវនាវឱ្យភាគីថៃងាកមកគោរពកិច្ចព្រមព្រៀងបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀង សន្តិភាព និងកាតព្វកិច្ចទាំងឡាយ នៅក្រោមច្បាប់អន្តរជាតិឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ ដោយប្រកាន់ខ្ជាប់នូវការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ក៏ដូចជាសន្ធិសញ្ញា អនុសញ្ញា និងកិច្ចព្រមព្រៀងដែលមានស្រាប់ ហើយប្រឆាំងនឹងការគំរាម ឬការប្រើប្រាស់កម្លាំង សំដៅស្វែងរកដំណោះស្រាយ មួយដែលយុត្តិធម៌ ត្រឹមត្រូវ យូរអង្វែង និងស្របតាមច្បាប់អន្តរជាតិ ៕ អត្ថបទសហការ
ចែករំលែកព័តមាននេះ